پارتی و هه‌لبژارتنێن 2017
سه‌ره‌رایی كو هه‌رێم یا دقوناغه‌كا مه‌ترسیدار دا ده‌رباز دبیت و چه‌ندین قه‌یرانێن توند و كویر ل هه‌رێمێ هه‌نه و نه‌هاتینه چاره‌سه‌ركرن به‌لێ قه‌یرانا ژ هه‌میا مه‌زنتر قه‌یرانا بێ باوه‌ریێ یه دناڤبه‌را لایه‌نێن سیاسی یێن هه‌رێما كوردستانێ دا و روژ بو روژ ئه‌ڤ بێ باوه‌ریه یا مه‌زنتر لێ دهێت و ده‌ستێن ده‌ره‌كی ب ده‌لیڤه دیتیه راسته‌وخو مایتكرنێ ل بارودوخێ هه‌رێمێ بكه‌ن و ئه‌جندێن خو ب لایه‌نێن سیاسی بده‌نه جێبه‌جیكرن به‌رامبه‌ر بده‌ستڤه ئینانا پشته‌ڤانیێ بو ڤان لایه‌نا دهێته پێشبینیكرن ئه‌ڤ قه‌یرانا هه‌یی یا پوستێ سه‌روكاتیا هه‌رێمێ به‌رده‌وام بیت تا هه‌لبژارتنێن سالا 2017 و زوربه‌یی لایه‌نا ژ پێگه‌هێ خو یێ جه‌ماوه‌ری دترسن چونكی ڤێ قه‌یرانێ ده‌رزێن مه‌زن ئێخستینه دناف هه می حزباندا !!
تاكه حزب تانوكه خو راگرتی به‌رامبه‌ر ڤان قه‌یرانان پارتیه و توشی چ كێشه و ده‌رزا دنافخو دا نه‌بوویه به‌لێ كێشا مه‌زنا پارتی لاوازبونا ئیرادا خه‌لكێ كوردستانێ یه بو پرسا نه‌ته‌وه‌یی و بێ باوه‌ریا وان ب حزبا و پاشه‌روژا كوردستانێ كو ببیته ئه‌گه‌ر رێژه‌كا مه‌زن پشكداری هه‌لبژارتنان نه‌بن و ل وی ده‌می پارتی دبیته زه‌ره‌رمه‌ندێ ئێكێ ل هه‌لبژارتنا !! له‌ورا فه‌ره پارتی هه‌ر ژ نوكه خو بو هه‌لبژارتنان ئاماده بكه‌ت و ب به‌رنامه و دروشمێن كو دئێنه جێبه‌جێكرن حازریا خو بو هه‌لبژارتنێن داهاتی بكه‌ت و فه‌ر دبینم كو پارتی به‌رنامه‌كێ نوی یێ رێكخستن و ئیداره‌كرنا حكومه‌تێ په‌یره‌و كه‌ت و گهورین و چاكسازیێن مه‌زن تێدا بكه‌ت بو نموونه كێمكرنا رێژا وه‌زاره‌تا و هه‌لوه‌شاندنا جڤاتێن پارێزگه‌ها و خورتكرنا جڤاتێن باژێرڤانیا بو پتر خزمه‌تكرنا خه‌لكێ كوردستانێ و هه‌لوه‌شاندنا پوستێ قائیمقاما و دانانا ده‌ستهه‌لاتێن وی بو سه‌روكێن جڤاتا باژێرڤانیا، ئه‌ڤه و چه‌ندین گهورینێن دی د سیسته‌مێ ئیداره‌كرنا حكومه‌تێ دا !
ئه‌ڤه ژ لایێ حكومه‌تێ ڤه ژلایێ حزبێ ڤه فه‌ره هه‌ر زی سه‌ركردایه‌تیا پارتی بریارێ بده‌ت كو حازری بهێته كرن بو هه‌لبژارتنان و ئه‌ندامێن سه‌ركردایه‌تیا پارتی بهێنه دابه‌شكرن ل سه‌ر میحوه‌رێن هه‌لبژارتنان و بچنه د ناڤ خه‌لكی دا دا پتر و بره‌نگه‌كێ باشتر خه‌لكه‌كی حازركه‌ن و هانده‌ن بو هه‌لبژارتنا و زورا گرنكه رێژا لقا بیته كێمكرن داكو رێكخستن بشێوه‌كی باشتر بێته كرن و بارێ پارتی ژ لایێ دارایڤه و چالاكیاڤه و سنوداركرنا كارێ لقان بێته سڤكرن و ئه‌ف چه‌نده ببیته ئه‌گه‌ر پارتی خو ژ زونێن ئیداری و عه‌شائیری و زونێن به‌رژه‌وه‌ند په‌رێسا قورتال بكه‌ت !! و ل دویفدا فه‌ره پارتی گهورینێن مه‌زن د راگه‌هاندنا خودا بكه‌ت و بشێوه‌كی نوی و بره‌نگه‌كێ نوی و ب دروشم و به‌رنامێن نوی بچنه دناف مالێن خه‌لكیدا و چه‌ندین به‌ربژێرا هه‌ر ژنوكه ده‌ست نیشان بكه‌ت و ب به‌رنامه و چاڤدێری فرێكه‌ته ناف خه‌لكیدا و بڤی ره‌نگی چ ده‌لیڤه نابن بو كێشه و تشتێ نه چاڤه‌رێكری و ل وی ده‌می پارتی دێ به‌لانسا هه‌لبژارتنان د به‌رژه‌وه‌ندیا خو دا گهوریت!! و دێ سنوره‌ك بو زور كێشه و ده‌ستێن ده‌ره‌كی هێته دانان و به‌رنامێ سه‌ربه‌خویا كوردستان خورتر لێ هێت و قوناغێن مه‌زنتر بریت ! ئه‌گه‌ر نه و پارتی ب ڤان كێشه و قه‌یرانا بچیته هه‌لبژارتنا د خو كوشتنه‌كا سیاسی بیت و ئیدی د پێگه‌هێ وێ سیاسی و جه‌ماوه‌ری لكوردستانێ زور لاواز بیت چونكی پارتی چه‌ندین ركابه‌ر و دوژمن هه‌نه كو ب پیلان و خولقاندنا كێشا شه‌رێ سیاسی دگه‌ل پارتی دكه‌ن و ل ده‌لیڤه‌كا بڤی ره‌نگی دگه‌ریێن كو پارتی لاواز كه‌ن و ژ سه‌ركردایه‌تیا سیاسه‌تا كوردی لاده‌ن.
