گه‌لی په‌رله‌مانتارا: بوچی توندوتیژی دژی خێزانێ
ئه‌م هه‌می دزانین كو په‌رله‌مانێ كوردستانێ جهێ ته‌شریعا یاسایێن كوردستانێ یه و هه‌ر پروژه بریاره‌كێ ل په‌رله‌مانی ده‌نگدان بو بهێته كرن و بارا پتر ژ ده‌نگان وی پروژی په‌سه‌ندكن دێ ئه‌و پروژه بیته یاسا ودێ ل هه‌رێمێ هێته جێبه‌جێكرن، ژ به‌ر هندێ و ل هه‌می په‌رله‌مانێن جیهانێ په‌رله‌مانتار ب ساناهی چو پروژا ده‌ربازی ده‌نگدانێ ناكهن ئه‌گه‌ر بزانن دێ ئاریشێن جڤاكی یان دارایی ژ بریارێ په‌یدابن، و زوربه‌ی كه‌سانێن دهێنه هه‌لبژارتن بو په‌رله‌مانێن ڤان وه‌لاتا شاره‌زایه‌كا باش هه‌نه و هه‌ر ئێك ل دویف بسپوریا خو ل گوره‌ی باوه‌رنامه و كارێ خو یێ كو به‌ری بهێته په‌رله‌مانی شاره‌زایا خو وه‌رگرتی. چنكو هه‌رێما كوردستانێ ئه‌ڤرۆ به‌ره‌و شارستانیه‌تێ دچت و حكومه‌تا هه‌رێمێ پێنگاڤێن گرنگ دهاڤێژت به‌ره‌و شارستانیه‌تێ و پێشڤه‌چوونێ دا كو شیان هه‌بن په‌یوه‌ندیێن خو ل گه‌ل جیهانا ده‌رڤه گه‌ش كه‌ت و ب هێز بێخیت، ئه‌ڤجا ژماره‌كا پروژه یاسایێن نوی هاتنه په‌سه‌ندكرن ژ لایێ په‌رله‌مانێ كوردستانێ ڤه و پشتی ده‌نگدانێ ئه‌و یاسا هاتنه جێبه‌جێكرن ل دادگه‌ه و دام و ده‌زگه‌هێن میری ل هه‌رێمێ، و ئێك ژ وان یاسایێن هاتینه په‌سه‌ندكرن یاسا نه‌هێلانا توند و تیژیێ دژی ئافره‌تێ بوو، ئه‌ڤ یاسایه ب توندی سزادانا زه‌لامی دكر ده‌مێ توند و تیژی دژی ئافره‌تێ ب كار ئینابا و بنگه‌هێن پولیسی یێن كو ب ڤی كاری رادبن كارێ خو ب دروستی ئه‌نجامدان و ژماره‌كا مه‌زن ژ زلاما ب تومه‌تا توند و تیژی دژی ژنێن خو و خوشكێن خو هاتنه ئه‌شكه‌نجه‌كرن و چوون دناف زیندانێ دا، و ل جڤاكا مه ژی ئه‌ف كاره وه‌كی هه‌می كارا ژ سنورێ خو یێ سروشتی ده‌رچوو چنكو دادگه‌هێ هه‌می زه‌لام وه‌ك ئێك هه‌لسه‌نگاندن د ڤی بابه‌تی دا، چه‌ندین خودان باوه‌رنامێن مه‌زن و ئه‌فسه‌رێن پولیسان هاتنه گرتن و كه‌فتنه د زیندانێ دا ژ به‌ر كو ده‌ستێ خو ل سه‌ر ژنا خو راكرن یان ژی شه‌ره ده‌ڤه‌ك د ناڤبه‌را وان دا په‌یدابویه و گه‌ف ل ژنێن خو كرینه، و چه‌ندین زه‌لام هاتنه هوشداركرن ژلایێ بنگه‌هی پولیسێ توندوتیژیێ ڤه كو دان و ستاندنا وی ل گه‌ل ژنا وی ب شێوه‌یكی نه‌دروسته و ژنا وی گازندێن خو گه‌هاندیه بنگه‌هێ پولیسان به‌لێ ئه‌فسه‌رێ بنگه‌هی نه‌ڤیایه بكه‌ته سكالا به‌لكو ئاریشه بێ دادگه‌هێ بهێته چاره‌سه‌ركرن، ل ڤێرێ جڤاك هه‌می هاته ئاگه‌هداركرن كو هه‌ر توندیه‌ك دژی ئافره‌تێ دێ بیته ئه‌گه‌را زیندانكرنێ، و ژماره‌كا مه‌زن ژ ژن و ئافره‌تێن كوردستانێ ب ده‌رفه‌ت دیتن كو به‌روڤاژی شیانێن خو ب كار بینن دژی زه‌لامێن خو و ل دووف گوتنێن ئێك ژ پولیسێن بنگه‌هێ توندوتیژیێ دژی ئافره‌تێ، ژماره‌ك ژ زه‌لامان هاتنه بنگه‌هێ پولیسان ژ بو گازندێ ژ توندوتیژیا ژنێن وان ل دژی وان دكه‌ن و ره‌فتارێن زور كرێت یێن ژنان دگه‌ل وان دا دكه‌ن و ژ به‌ر كو هه‌می زه‌لاما شیان نینه ژیانا خو ب دوماهیك بینن ل گه‌ل هه‌ڤژینێن خو ژ به‌ر یاسا توند یا به‌ردانێ و گوژمێ مه‌زن یێ پاره‌ی یێ كو دكه‌ڤیته سه‌ر ملێن زه‌لامی پشتی به‌ردانێ ل دووف یاسا كوردستانێ ئه‌ڤجا ئه‌ڤ زه‌لامه دمینن دبن زورداریێن ڤان جوره ژنا و خێزان دبیته قوربانا ژیانا تێر ئاریشه یا ژن و مێرا، و ژبه‌ر ڤان ئه‌گه‌را و پشتی حكومه‌تێ زانی ب چو شێوه هنده‌ك ژن ره‌فتارێ دكه‌ن ناڤێ بنگه‌هێ توندوتیژیێ هاته گهورین بو توندوتیژی دژی خێزانێ دا كو ژن و مێرا ماف هه‌بن سكالا دژی ئێك توماركه‌ن، ئه‌ڤه‌یه ئێك ژ ده‌ستكه‌فتیێن په‌رله‌مانی بو هاولاتیان دابینكری، و ل ڤێری ئه‌ز هیڤیێن خو دگه‌هینمه په‌رله‌مانتارێن مه یێن به‌رێز كو جاره‌كا دی یاسایێن بارێ كه‌سایه‌تی بهێنه خواندن و گهورینێن نه گونجای ل گه‌ل ژیانا مه بهێنه لادان و گهورین بو یاسایێن گونجای ل گه‌ل جڤاكی و پێداویستیێن وی بن، و نه به‌س ئه‌و یاسا دڤێت بهێته گهورین به‌لێ یاسا بارێ كه‌سایه‌تی یێ كو مافێ دایكا زه‌لامی به‌رزه دكه‌ت و چو مافا ناده‌تێ ل گه‌ل كورێ خو بژیت ده‌مێ ژنا زه‌لامی داخوازا مافێ بیت شرعی بكه‌ت ل دادگه‌هێ دا كو دایكا وی ژ مال ده‌رێخت چنكو دایك ژی ئافره‌ته ومافێ وێ ل سه‌ر كوری هه‌یه، و دا كو ئه‌م كوردستانه‌كا خودان كه‌لتور ئاڤاكه‌ین و بو پێشڤه بچین، پێتڤیه ئه‌م شاشیێن خو بخوینین و په‌سه‌ندكه‌ین و بزانین چه‌وا چاره‌سه‌ركین و ژلایێ هنده‌ك شاره‌زایاڤه رێكا چاره‌سه‌ریێ بو ببینین.
