ل حەفتیا بھێت پارێزگارەکێ نوو بۆ نەینەوا دێ ھێتە ھەلبژارتن
ئەڤرۆ نیوز:
سەرۆکێ لیستا برایەتی وپێکڤەژیانێ ل جڤاتا پارێزگەھا نەینەوا راگەھاند، ھەتا نوکە سێ کەسان یا خوە بەربژارکری بۆ پۆستی پارێزگارێ نەینەوا و ھەتا رۆژا ٣٠-٩ دێ دەرگەھێ خوە بەربژارکرنێ یێ ڤەکری بیت و ل رۆژا ٣-١٠ دێ جڤاتا پارێزگەھا نەینەوا دەنگدانێ ل سەر دانانا پارێزگارێ نوو کەت.
سەیدو چەتو سەرۆکێ لیستا برایەتی وپێکڤەژیانێ ل جڤاتا پارێزگەھا نەینەوا بۆ ئەڤرۆ گوت” ب تنێ ئەندامێن لیستا نەھزە دشێن خوە بەربژار بکەن بۆ پۆستی پارێزگارێ نەینەوا و ئەو پاریزگارێ ھاتیە لادان ژی (ئەسیل نوجێفی) ژ لیستا نەھزە بوو و پاریزگارێ نوو ژی دێ ژ لیستا نەھزە بیت، چونکی ئەو پۆست مافی لیستا نەھزەیە، لێ نە مەرجە پارێزگارێ نوو یێ دھێتە ھەلبژارتن ئەندامێ جڤاتا پارێزگەھا نەینەوا بیت، بەلکو پێدڤیە ژ لیستا نەھزە بیت، لێ بێی بۆچوونا لیستا برایەتی و پێکڤەژیانێ پارێزگارێ نوو ناھێنە دانان”.
سەیدو چەتو زێدەتر گۆت” بریارە جڤاتا پارێزگەھا نەینەوا ل رۆژا ٣-١٠-٢٠١٥ ل ناحیا ئەلقوش کومبوونەکێ ل سەر ھەلبژارتنا پارێزگارێ نوو ئەنجام بدەت و ئەو بەربژارێ پتریا دەنگێن ئەندامێن جڤاتێ وەربگریت، دێ بیتە پاریزگار”.
دھێتە زانین ئەسیل نوجێفی پارێزگارێ بەرێ یێ نەینەوا ژلایێ پەرلەمانێ عیراقێ ژ پۆستێ وی ھاتبوو لادان ب ڕێیا دەنگدانێ.
