بـ هه‌رێم كرنا سلێمانیی پلانا مێژینه‌یا نوشیروان مسته‌فایه
مێژویا شوره‌شا ئه‌یلول و پلانێن تێكده‌رانه یێن هنده‌ك كه‌سێن دیار یێن سلێمانیێ لـ ده‌مێ شوره‌شێ بو هه‌می خه‌لكی یا دیاره و ئه‌ز نازڤرمه مێژویا 1964 ێ.
پوخته‌یا ستراتژییه‌تا نوشێروان مسته‌فای و سیاسه‌تا فاشل یا بزاڤا گۆڕان لـ خولا سێ یا په‌رله‌مانێ كوردستانێ بـ رێكا په‌رله‌مانته‌رێن بزاڤا گۆڕان دور ژ هه‌می پره‌نسیپێن نه‌ته‌وه‌یی ئیهانه‌یا مه‌زنترین كاراكته‌رێن پاراستنا وه‌لاتی كو بـ خوینا خوه وه‌لاتی د پارێزن بوویه، پێشمه‌رگه‌هـ بـ ملیشیا ناڤ دكرن به‌س نه‌بوو، بێ شه‌رمانه داخوازا دو ئیداره‌یێ و جوداكرنا سلێمانیی ژ هه‌رێما كوردستانێ دكرن و پروتوكولێن په‌رله‌مانی باشترین گروڤه‌نه، داخواز دكرن سلێمانی هه‌رێمه‌ك جودا بیت، كه‌س لـ بیر ناكه‌ت دوهی بو سه‌روكێ ئه‌نجومه‌نێ پارێزگه‌ها سلێمانی هه‌ڤال ئه‌بوبه‌كر سه‌ر بـ بزاڤا گۆڕان لـ سه‌ر شاشه‌كا تێله‌ڤزیونێ گه‌فێن دو ئیداریی و جودا كرنا سلێمانی دكر.
لێ جیاوازی دناڤبه‌را هه‌ر دو خولێن په‌رله‌مانی دا چ بویه، لـ خولا سێ به‌رێز مام جه‌لال یێ ته‌ندروست بوو و هه‌ڤپه‌یمانیه‌كا بهێز د ناڤبه‌را پارتی و ئێكه‌تیێ دا هه‌بوو، و لـ په‌رله‌مانی كوردستانێ هه‌ر دو هێز ئێك فراكسیون بون، ئێكه‌تیا نێشتیمانی كوردستانێ پالپشتیا داخوازیێن بزاڤا گۆڕان و سیاسه‌تا نوشیروان مسته‌فا نه‌دكرن، لێ مخابن د ڤێ خولێ دا غیابا مام جه‌لال كاریگه‌ریه‌كا نه‌رێنی لـ سیاسیێن سلێمانیێ كریه و پشتگه‌رمیا دارێژه‌رێن دو ئیداریی و سیاسه‌تا ئه‌قلیمی یا گرێدایی یه بـ هاریكاری و خوه بـ ده‌ست ڤه به‌ردانا ئێكه‌تیا نشتیمانیا كوردستانێ بو سیاسه‌تا نوشیروان مسته‌فا و بزاڤا گۆڕان، كو زه‌ره‌رمه‌ندێن ئێكه‌م یا ڤێ سیاسه‌تێ لـ زونا كه‌سه‌ك دێ ئێكه‌تیا نشتیمانی یا كوردستانێ بیتن و ده‌رئه‌نجامێن قورس دێ هه‌لگریت!
پلانه‌ك ژ مێژه دارێژكری
نوشیروان مسته‌فا نه‌شیا ئێك سال لـ سه‌ر دروشمێن خوه بو ئارامیێ یێ به‌رده‌وام بیت و ئه‌زموونا ئێك سالیا حكوومه‌تا بنكه فراوان شكه‌ستنا گۆڕان دیار كر كو نه‌شێت ئیدارا وه‌لاتی بكه‌ت هه‌ر وه‌كی چاوا د چوار سالێن بوری دا گۆڕان نه‌شیای ببیته ئۆپۆزسیۆنه‌كا سه‌ركه‌فتی د حكوومه‌تێ دا ژی تووشی شكه‌ستنێ هات، له‌وما دخوازیت هه‌می هه‌ولان بده‌ت بو واز ئینانا پارتی بو سه‌ربه‌خویا كوردستانێ و دێ هه‌می رێكان جه‌ربینیت.
بزاڤا گۆڕان پشتی به‌شداربون د حكومه‌تا ته‌وافقی دا نه‌شیان سوزێن داینه خه‌لكی بجهـ بگه‌هینن بو سه‌رپوشكرنا شكه‌ستێن خوه یێن سیاسی، ئێكه‌م پێهنگاڤا هاڤێتی كودتایا په‌رله‌مانی لـ 2015-06-23 لـ سه‌ر پارتی ئه‌نجام دا و پاش پوچه‌لكرنا پلانا كودتایی لـ 2015-08-19 بـ ده‌ستڤه‌نه‌ئینانا نیسابا یاسایا په‌رله‌مانی هاتیه كرن، گۆڕان وه‌ك گورگه‌كێ هار پلانا دارشتنه‌كا مه‌ترسیدار كر و بـ رێكا كه‌نالێن فه‌رمی و سیبه‌ر و نڤیسه‌ر و زه‌لامێن ئاینین سه‌ر بـ وان ڤه هاندانا خه‌لكی و هه‌رزه‌كاران بو سه‌رجادان كر.
پشتی شكه‌ستنا كودتایا په‌رله‌مانی قوناغا دوێ ده‌ست پێكر، بـ كار ئینانا خه‌لكه‌كێ تێكده‌ر و هه‌رزه‌كار و هاندانا وان بو سه‌ر باره‌گاهێن پارتی دیموكراتی كوردستان بو بـ دروشم و ته‌شهیر، كه‌ڤر، هێزا چه‌كی و سوتنا باره‌گایان، و كوشتنا كادر و بریندار كرنا لایه‌نگرێن پارتی، لێ پارتی ئیراده‌یه و كه‌س نكاریت ده‌ست بو كه‌رامه‌ت و پروژێ نه‌ته‌وه‌یی پارتی و سه‌روك بارزانی كو سه‌ربه‌خویی یا كوردستانێ یه ببه‌ت.
رویدانێن ڤان دو روژێن لـ سنورێ سلێمانیی ده‌ركه‌فت كو لـ زونا كه‌سك و نیلی هیچ مانایه‌ك بو دیموكراسیه‌ت و ئازادیی نه‌هێلایه و ته‌قه‌بولا ره‌ئیا جیاواز و ئازادی و دیموكراسی ناكه‌ن و بـ نامه‌ده‌نیترین ره‌نگ و فه‌وزایا سیاسی سه‌ركوتكرنا ره‌ئیێن جیاواز و لێدانا پروژێ سه‌ربه‌خویی دكه‌ن.
بـ دیتنا من بو هندێ كو ئارامی لـ كوردستانێ یا سه‌قامگیر بیت و پێشمه‌رگه لـ سه‌نگه‌ران بـ ئاسوده‌یی لـ دژی درنده‌ترین دوژمنێن ئینسانیه‌ت و وه‌لاتی به‌رگریێ بكه‌ن، و زاروكێن كوردستانێ لـ ژێر په‌روه‌رده‌یه‌كا ساخلم دا بن و پلانا نوشیروان مسته‌فا سه‌رنه‌گریت و كوردستان به‌ره‌ف دو ئیداریێ نه‌چیت و دیموكراسیه‌ت گه‌شه بكه‌ت و حوكمرانیه‌كا بـ هێزو خودان بریار لـ كوردستانێ به‌رپا بیت، پێدڤیه حكومه‌تا بنكه فراوان بـهێته هه‌لوه‌شاندن و هێزێن شاره‌زا د ئیداره و رێڤه‌برن و حوكمرانیێ دا ده‌ست د ناڤ ده‌ست دا بـ ئیراده‌كا بهێز حكومه‌تێ پێك بینن و وه‌ك جاران ژیانا خه‌لكی به‌ره‌ف خوشگوزه‌رانی و ئاڤه‌دانیی و وه‌لاتی به‌ره‌ف سه‌ربه‌خویێ و خه‌ونا دێرینه‌یا گه‌لێ كوردستانێ ببه‌ن.
