بلا راگه‌هاندن ڤێ گهورینێ بكه‌ت
ئێك ژ سه‌خله‌تێن هه‌ره گرنگ یێن راگه‌هاندنێ ئه‌وه كو گوهوَرینان د هه‌موو بوارێن ژیانێ دا په‌یدا دكه‌ت، ئاراسته‌یا كومه‌لگه‌هێ دكه‌ت و كارتێكرنێ ل ده‌رون و هه‌ستێ خه‌لكی دكه‌ت هه‌روسا كارتێكرنێ ل ده‌ركرنا بریاران ژی دده‌ت، راگه‌هاندنا كوردی هه‌ر ژ ده‌ست پێكا په‌یدا بوونا وێ ئه‌ڤ ئه‌ركه ب ستویێ خوه ڤه گرتیه و ملبملێ جوتیاری، سیاسه‌تمه‌داری، پاله‌ی، ئاغای،.. . كار كریه لێ تا چ راده ئه‌ڤی كاری به‌رهه‌مه‌ك هه‌بوویه د گوهوَرین و ئاراسته‌كرنا ملله‌تێ كورد ب گشتی دا ئه‌و جهێ سه‌ر راوستیانێ یه.
ل هه‌رێما كوردستانێ و بتایبه‌ت پشتی سه‌رهلدانێ و تا نوكه هه‌می چینێن جڤاكی د ناڤبه‌را خوه دا هنده‌ك بابه‌تان د ئازرینن و به‌رده‌وام جهێ نه رحه‌تیا وانه و حه‌زا گوهوَرینێ هه‌یه لێ چ نه‌هاتیه كرن، بوَچی چ نه‌هاتیه كرن؟ ب دیتنا من چنكو راگه‌هاندنێ ئه‌و ئه‌رك نه‌گێرایه بوَ نمونه: ئه‌م هه‌موو دخوازین هه‌رێم ژ لایێ كشتوكال و پیشه‌سازیێ پێش بكه‌ڤیت و مه هه‌موو پێدڤی هه‌نه و ئه‌ڤ پێشكه‌فتنه دێ كارڤه‌دانه‌كا مه‌زن ل سه‌ر هه‌موو بوارێن ژیانا خه‌لكێ هه‌رێمێ كه‌ت، لێ تا چ راده راگه‌هاندنێ رولێ خوه د ئازراندنا ڤی بابه‌تی دا دیتیه، راگه‌هاندنێ چه‌ند بابه‌ت و هزر ب رێیا تایبه‌تمه‌ندا پێشكێشی خه‌لكی و جهێن بریارێ كرینه، چه‌ند دووڤچونا وێ پێشنیارێ كریه، راگه‌هاندنا كوردی و ب تایبه‌ت ل ده‌ڤه‌را به‌هدینان یا د قالبه‌كێ ڤه‌مایی د اخوه ئاسێ كری نه دڤێت خوه ژێ بینیته ده‌ر و نه ئه‌و ب خوه یا ب وی حالی رازی یه، ب دیتنا من نڤیسینا ڤان جوَره بابه‌تان بتنێ لاسایكرنه ژ ده‌زگه‌هه‌كی بوَ ده‌زگه‌هه‌كێ دن د نڤیسینێ دا ئانكو ئه‌گه‌ر روژنامه‌كێ بابه‌ته‌ك ئازراند یا دی نایبته تمام كه‌را وێ به‌لكو دێ چیت هه‌مان كوژی گریت، دڤێت ده‌زگه‌هێن مه یێن راگه‌هاندنێ ببنه تمامكه‌رێن ئێك بوَ دروستكرنا رایه‌كا گشتی د ئاراسته‌كرنا حكومه‌ت و ئیدارێن پارێزگه‌هان بوَ پتر گرنگی دان ب ڤان جوَره بابه‌تان و به‌رده‌وام بوَ دیار بكه‌ن كو ئه‌م چاڤه‌رێی ئه‌نجاماینه و ل ده‌مێ ئه‌نجام نه‌بن ژی بوَ خه‌لكی دیار بكه‌ن كو ئه‌نجام نه‌بووینه تا نوكه. بوَچی ل وه‌لاته‌كی شه‌ر دروست ببیت ل پارێزگه‌هێن هه‌رێمێ باجانك نه‌میننه ل بازاری كو مه هه‌موویان ئه‌ڤ چه‌نده دیت ل ده‌ست پێكا سه‌رهلدانێ ل سوریێ، ئه‌ڤه دێ وه‌كه‌ت كو ئێدی حكومه‌ت ب جدی ل سه‌ر ڤان خالان راوه‌ستیت و كارێن به‌رچاڤ بهێنه كرن و دێ ئه‌رك و پیروَزیا په‌یاما راگه‌هاندنێ ژی بوَ خه‌لكی ئاشكرا كه‌ت، ل ڤی ده‌می دا روَژنامه‌ڤانی و ده‌زگه‌هێن راگه‌هاندنێ دێ بایه‌خا خوه هه‌بیت ل نك خه‌لكی.
و ل دوماهیێ بلا ئه‌م ژ بیر نه‌كه‌ین كو هه‌ر پسكێته‌كا ئه‌م هاورده دكه‌ین ئه‌م یێن ژ وان وه‌لاتان هاورده دكه‌ین كو د درێژاهیا مێژویێ دا دژایه‌تیا گه‌لێ كورد كریه و هه‌ر پشتبه‌ستنه‌كا ئابووری یا ئه‌م ب وان د به‌ستین، ئه‌مێ وان ولاتان كو دوژمنێن مه‌نه ژ لایێ ژێرخانا ئابووری بهێز دئێخین و به‌روڤاژی ئه‌م یێ خوه و ملله‌تێ خوه لاواز دكه‌ین، له‌ورا بلا ئه‌م ژ راگه‌هاندنێ ده‌ست پێبكه‌ین و شه‌ره‌كێ دژوار بكه‌ین بو دروستكرنا هنده‌ك گوهوَرینێن رهوَڕیشالی.
