ئاڤاكرن نه ئیعلانكرن
ل باكوورێ كوردستان هه‌ر رۆژ كوشتن و تالانكرن هه‌یه. پشتێ هه‌لبژارتنێ ژی مخابن ئۆپه‌راسیۆن پرتر بوون و دیاره كو وێ پرتر و دژوار ژی ببه. وه‌ك كو ون ژی دزانن ل سوور, فارقین, جزیر و چه‌ند ناڤچه‌یێن دن ئۆپه‌راسیۆنێ ل سه‌ر گه‌لێ سڤیل به‌رده‌وام دكه. ل ناڤچه‌یا ئامه‌دا فارقینێ 10 رۆژه ده‌ركه‌تنا ده‌رڤا قه‌ده‌خه‌یه و مخابن هه‌ر رۆژ ئاگاهیا كوشتنا مرۆڤا تێ پارڤه‌كرن. ب راستی نێرینێ من ل سه‌ر ڤێ مژارێ ژ گه‌له‌ك كه‌سان جوودا یه. ئه‌و ئیعلانكرنا كو ته‌نێ ل سوور, فارقین و جزیرێ پێك هات بوو یان بێده‌مه یان ژی بێ بنگه‌هه. راسته گه‌لێ كورد دخوازه كو خوه رێخستن بكه. لێ مخابن هه‌گه‌ر ژ بۆ ڤێ رێخستنێ بنگه‌ها ژیانێ نه‌یێ ئاڤاكرن وێ ده‌مێ ب ته‌نێ كوشتن و وێرانكرنێ ل په‌ی خوه دهێله. بنێرێن ل فارقینێ ده‌وله‌ت ب تانك و تۆپا ل به‌ر چاڤێ مه هه‌موویا گه‌لێ مه دكوژه و ئه‌م ژی ته‌ماشه دكن. ژ بۆ چ? ئه‌ڤ شه‌ر و كوشتن ژ بۆ چیه? ئه‌و چالاكڤانێ كو ب ده‌وله‌تێ ره شه‌ر دكن و خه‌نده‌قا دكۆلن داخوازا وان چقاس ب بنگه‌هه? ڤان پرسان مرۆڤ دپرسه. ئه‌ز باوه‌ر دكم كو ون ژی دپرسن لێ نه وه‌ك من ب ده‌نگه‌ك بلند. ئه‌ز دبێژم كو هه‌گه‌ر ژ بۆ گه‌لێ كورد ب ته‌ڤاهی ئیعلانكرنا خوه‌سه‌ریێ به بلا ل ناڤچه و باژارێ دن ژی وه‌رن ئیعلانكرن. یانی ل ناڤه‌ندا ئامه‌دێ قه‌ی ب ته‌نێ سوور هه‌یه? ژ ناڤچه‌یێ ده‌رڤایێ ئامه‌دێ قه‌ی ب ته‌نێ فارقین هه‌یه? هه‌گه‌ر كو هه‌موو كورد داخوازا ڤێ تشتێ دكن ژ بۆ چ سوور و فارقین ب ته‌نێ مانه? ژ بیر نه‌كن كو سیاسه‌تمه‌دارێن كوردا بریارا ده‌مۆكراتیك جومهوریه‌ت دا بوون. ژ به‌ر وێ ژی ئه‌م بخوازن ژی نه‌خوازن ژی نها ڤان ناڤچه و باژارێن مه د بن كۆنترۆلا ده‌وله‌تێ دا یه. هه‌تا كو ئه‌م رێخستنا خوه ئاڤا نه‌كن نه مومكونه كو ڤان ئیعلانكرنا خوه‌رێخستنا ب سه‌ركه‌ڤن. بالا خوه بدنێ كو هه‌ده‌پ د هه‌لبژارتنا پارلامه‌نتۆیێ دا و ده‌به‌پ ژی د هه‌ژبژارتنا شاره‌داریا دا سه‌ركه‌فتی یه. یانی باكوورێ كوردستان ب ته‌ڤاهی دكاره رێخستنێ خوه ئاڤا بكه. پشتێ ڤان رێخستنا كو ب ته‌ڤاهی ب جیه ببن وێ ده‌مێ ئیعلانكرنا خوه‌سه‌ریێ ژی واته‌یه‌ك مه‌زن ب ده‌ست دخه. ئامه‌ده‌كرن: ئه‌ڤرۆ
