گیانێ 20 بریندارێن كیمیابارانا هه‌له‌بجه د مه‌ترسیێ دایه
ئه‌ڤرۆ نیوز:
برینداره‌كێ دی یێ كیمیابارانا هه‌له‌بجه گیانێ خوه ژده‌ستدا و سه‌رۆكێ كۆمه‌لا قوربانیێن كیمیابارانا هه‌له‌بجه ژى ئاشكرا كر كو بیست بریندارێن دی یێن كیمیابارانا ناڤبرى برینێن وان د دژوارن و هه‌كه زوو نه‌هێنه چاره‌كرن دێ گیانێ خوه ژده‌ستده‌ن.
لوقمان عه‌بدولقادر، سه‌رۆكێ كۆمه‌لا قوربانیێن كیمیابارانا هه‌له‌بجه بۆ رۆژناما ئه‌ڤرۆ دیار كر كو ب مخابنیڤه پشتی بۆرینا 27 سالان ژ نالینان ژبه‌ر برینا خوه یا دژوار ل ئه‌ینیا بۆرى 27/11/2015 برینداره‌كێ دی یێ كیمیابارانا هه‌له‌بجه ژبه‌ر دژواریا برینا خوه گیانێ خوه ژده‌ستدا و شه‌هیدبوو و گۆت: “پشتی كۆمه‌لا مه ل سالا 2003ێ هاتیه دامه‌زراندن هه‌تا نوكه 88 بریندارێن چه‌كێ كیمیایی شه‌هیدبووینه و نه‌هاتینه چاره‌كرن”.
ناڤهاتى ئاماژه دا وێ چه‌ندێ كو نوكه 100 بریندارێن دی یێن كیمیابارانێ ل پارێزگه‌ها هه‌له‌بجه هه‌نه و برینا وان یا دژواره و 20 ژوان برینداران برینێن وان مه‌ترسینه بۆ سه‌ر ژیانا وان و هه‌كه زوو نه‌هێنه چاره‌كرن دێ گیانێ خوه ژده‌ستده‌ن.
ل دووماهیێ سه‌رۆكێ كۆمه‌لا قوربانیێن كیمیابارانا هه‌له‌بجه گۆت: “پتریا بریندارێن كاره‌ساتا كیمیابارانا هه‌له‌بجه چاره‌كرنا وان بتنێ ل ده‌رڤه‌ی وه‌لاتی هه‌یه و هه‌تا نوكه حوكمه‌تا هه‌رێما كوردستانێ چه‌ندین جاران بریندارێن كیمیابارانا ناڤهاتى بۆ چاره‌كرنێ هنارتینه ده‌رڤه‌ى، به‌لێ ئه‌ڤان برینداران پێدڤی یا ب چاره‌كرنا به‌رده‌وام هه‌ى ژبه‌ر ڤێ چه‌ندێ پشتی هاتنا قه‌یرانا دارایی مه‌زاختیێن حوكمه‌تا هه‌رێما كوردستانێ بۆ چاره‌كرنا ئه‌ڤان برینداران كێمبوویه و حوكمه‌ت نه‌شێت چاره بكه‌ت”.