دادگه‌هكرن ب تاوانا پیلانگێریێ
هه‌ر هزركرن ب دادگه‌هكرنا وان كه‌سێن پیلانان دژی ئارامی و ته‌ناهیا كوردستانێ و نه‌خشه‌یێن مه‌ترسیدار دژی ئاسایشا نه‌ته‌وی ل كوردستانێ دكه‌ن و دبنه رێك وه‌لات تووشی زیانێ ببیت هزره‌كا باش و پڕی رامانه تاكێ كورد بزانیت كو وه‌لاتێ وان یێ ژ ڤان جۆره كه‌س و سازی یان پاراستی یه و نابیت سنوورێن ئارامیا وی بهێنه به‌زاندن، وه‌لات و سنوورێن وه‌لاتی و سه‌روه‌ریا وی پیرۆزترین كاره سازیێن په‌یوه‌ندیدار پێ راببن و رادده‌كی بۆ هه‌ر جۆره سه‌رپێچیه‌كێ دانن خو ئه‌و كه‌س كی بیت و ل بن چ چه‌تر بیت و چ جۆره پارێزی یا یاسایی هه‌بیت. ئه‌و په‌یامێ ل ڤان دوو رۆژێن بۆری به‌لاڤبۆیی سه‌باره‌ت دادگه‌هكرنا سه‌رۆكێ لایه‌نه‌كێ سیاسی یێ كوردستانێ پێنگاڤه‌كا وێره‌ك بوو و خاله‌ك بۆ ل سه‌ر رێ یا راست و ئاره‌سته‌یه‌كێ هێژا بوو كو چ لایه‌نه‌ك یان كه‌سه‌ك ل چ جهـ و پله بیت زێده‌گاڤیان ل سه‌ر سه‌روه‌ری یا وه‌لاتی نه‌كه‌ت و سنووره‌ك بۆ هه‌ر بزاڤه‌كا ژ ڤی ره‌نگی بهێته دانان. له‌و باشه ب هه‌مان شێوه هزر دهندێ دا بهێته كرن گشت خه‌مساری یێن د ده‌رهه‌قێ وه‌لاتی دا دهێنه كرن سنووره‌ك بۆ هه‌بیت و گه‌ف بگه‌ڤیته وان لایه‌ن و كه‌سان یێن وه‌لاتی تووشی مه‌ترسیێ دكه‌ن و ل سه‌ر هه‌موو ئاستان، سه‌ره‌ده‌ریا دگه‌ل دۆژمنان و مفاكرنا ژ داهات و سامانێ گشتی و ره‌ڤین ژ به‌رۆكێن شه‌ری و كاركرن دگه‌ل دۆژمنان و رێخۆشكرن بۆ داگیركرنا ئاخا پیرۆز و تێكدان و سه‌رپێچییا ل سه‌ر وه‌لاتی ب هه‌موو شێوه و جۆرێن خوڤه و ب هه‌ده‌ردانا سامانێ ملله‌تی و خیانه‌تكرن ل كوردستانێ و هه‌تا دگه‌هیته بچووكترین كارێ مه‌ترسیدار و گه‌نده‌لی و یێن مینا وان هه‌موو ببنه پرۆژه‌یێن یاسایی و وه‌لات ژ وان سه‌رپێچییان بهێته پاراستن و ده‌رگه‌هێن دادگه‌هان و ته‌رازی یا دادیێ بۆ بهێنه ئاماده‌كرن و رادده‌ك بۆ نه‌هنگێن وه‌لات فرۆش بهێنه به‌رهه‌ڤكرن دا سه‌روه‌ریا وه‌لاتی نه‌هێته بنپێكرن. گرنگه ئه‌ڤ پێشڤه‌چوونه نه ب تنێ كه‌ره‌سته‌كێ میدیایێ بیت و پاشان بكه‌ڤیته د خانێن تاری دا و تۆز ل سه‌ر وان باده‌كان كۆمببیت، بكه‌ڤنه د بیاڤێ بجهـ ئینانێ دا و ئه‌و لایه‌ن و ئه‌و جهـ و ده‌ستێن ل پشت ژی رادده‌ك بۆ بهێته دانان و ده‌لیڤه نه‌هێته دان ب هلكه‌فت و بێ هلكه‌فت ره‌فتار بهێنه كرن و پیلان ل رۆژێن تاری دووری سه‌رۆكاتیا هه‌رێمێ و حكومه‌تا هه‌رێما كوردستانێ بهێنه دراشتن و ده‌ست ب كه‌ڤنه ده‌ستێن نه‌حه‌زێن كوردستانێ و مه‌ترسی یا وێ ب نه‌رێنی بۆ كوردستانێ و خه‌لكێ ڤه‌گه‌ریت.
