شۆره‌ش پرنسیپه‌كا میژوویی یه بوَ سه‌روه‌ری و قوناغا ئاڤاكرنا ده‌وله‌تێ
ل هه‌رده‌م و قوَناغه‌كێ دا كو گه‌لێ كورد بریارا شۆره‌شێ یان به‌رخوه‌دانێ دابیت و به‌رانبه‌ر دوژمن و داگیركه‌رێن كوردستانێ. ل وی ده‌می كوَمه‌كا فاكته‌رێن ڤه‌شارتی ل پشت هێزا ڤێ شۆره‌شێ یان به‌رخوه‌دانێ هه‌بوینه، ئه‌و فاكته‌ر ژی د ناڤ مێشك و ناخێ كه‌سێ كورد دا ره‌نگ ڤه‌دایه، دیسان بلندكرنا دروشمێ شۆره‌شێ ژی ره‌نگ ڤه‌دانا وی فاكته‌ری یه یێ كو د ناڤ مێشك و تێگه‌ها كه‌سێ كورد و سه‌ركردایه‌تی یا شۆره‌شێ دا هه‌یی، چنكو هیچ شۆره‌شه‌ك بێ ی بلندكرنا دروشمان نینه ، وه دانان یان بلند كرنا هه‌ر دروشمه‌كی بوَ هه‌ر شۆره‌ش و به‌رخوه‌دانه‌كێ ئه‌و دروشم دبیته خالا ده‌سپێكێ بوَ كوَمڤه‌كرن و گه‌رمكرن و ئاراسته‌كرنا هێزا جه‌ماوه‌رێ به‌رخوه‌دای به‌ره‌ف ئارمانجا دیاركری كو ئه‌وژی ئازادی یه بوَ گه‌ل و وه‌لاتی. بوَ نموونه : ل وی ده‌مێ كو ( داعش) بریارا داگیركرنا هه‌رێما كوردستانێ دای و هێرش ئینایه سه‌ر كوردستانێ ل شه‌ڤا ( 2/3 ی ئابا 2014 ) و بریارا قركرنا گه‌لێ كوردستانێ راگه‌هاندی، ل به‌رانبه‌ری ڤێ هێزا درنده ( سه‌روَك بارزانی) ب وێره‌كییه‌كا مه‌زن و بێی دوو دلی بریارا شه‌رێ به‌رخوه‌دانێ راگه‌هاند و ل بن دورشمێ ( یان كوردستان یان نه‌مان). یا ئاشكه‌رایه كو ئه‌ڤ دروشمه ژی یێ سه‌رده‌مێ قوَناغا شۆره‌شا ئیلولا مه‌زن بوویه و هه‌تا ئه‌ڤروَ ژی دگه‌لدا بیت یێ به‌رده‌وامه. ئه‌ڤ جوَرێ بریاردانێ ل وان روَژ و كاودانێن به‌رته‌نگێن ئابووری و بێی كو رێكخستنه‌كا له‌شكه‌ری و چه‌كێ پێدڤی و هێلا به‌رگریێ هه‌بیت، لێ بریار بریارا باوه‌ری ب خوه بوونێ و باوه‌ری ب هێزا پێشمه‌رگه‌ی و جه‌ماوه‌رێ كوردستانی َ بوو، وه ژ لایه‌كی ڤه یا ئاشكرایه كو ئه‌ڤروَ هه‌رێما كوردستانێ یا بوویه ده‌وله‌ته‌كا دیفاكتوَ ل سه‌ر ئه‌ردی و خودانێ هێزا له‌شكه‌ره‌كێ پری هزر و بیر و باوه‌ره وه یێ كارا و ئاماده‌یه بوَ “كوردستان یان نه‌مان” ێ شه‌ری دكه‌ت ، ژ لایه‌كێ دیڤه ستراتیجیه‌تا ده‌وله‌تێن هه‌ڤپه‌یمان و زلهێزین جیهانێ د ڤێ قوَناغێ دا سه‌ره‌ده‌ریێ د گه‌ل جڤاكان دكه‌ن، ل سه‌ر بنه‌مایێ هێزا ئاماده و دیفاكتوَ ل سه‌ر ئه‌ردی هه‌یی، وه ئه‌ڤ مودێلا سه‌ره‌ده‌ریكرنێ یا جڤاكێ ناڤ نه‌ته‌وه‌ی ژی د به‌رژه‌وه‌ندیا خه‌لكێ كوردستانێ دایه وه‌كو گه‌ل و وه‌ڵات. ئه‌ڤروَ ئه‌مریكا ل عێراق و سوریێ هیچ دوست و هه‌ڤاله‌ك نینه ژ بلی گه‌لێ كورد و هێزا پێشمه‌رگێ كوردستانێ. وه هێزا پێشمه‌رگه‌ی ژی بوَ جیهانێ سه‌لماند كو تاكه هێزه یاكو شیای سه‌ركه‌فتنێن مه‌زن تومار بكه‌ت د گوره‌پانا شه‌رێ دژی ( داعش) دا، له‌ورا كو به‌رانبه‌ر ڤان سه‌ركه‌فتنا و ئه‌و ده‌وله‌تا دیفاكتویا كوردستانێ ئاماده ل سه‌ر ئه‌ردی، ئه‌مریكا ژی وه‌كو زلهێزه‌كا جیهانی دیتنا خوه ل سه‌ر گه‌لێ كورد یا گوهارتی و حه‌ز هه‌یه كو ببیته هه‌ڤپه‌یمانه‌كێ راست و دروست دگه‌ل گه‌لێ كوردستانێ. ژ لایێ نافخوه‌یی ژی ڤه كورد پێدڤی ب یه‌ك گرتنێ و یه‌ك گوتاریا سیاسی هه‌یه، هه‌روه‌سا ئه‌ركێ ده‌ستهه‌ڵاتداریا هه‌رێما كوردستانێ یه كو سیسته‌مێ دیموكراسیه‌تێ ب هێز بێخیت و كارابكه‌ت و هه‌روه‌سا كه‌ش و هه‌وایه‌ك بهێته ره‌خساندن كو هه‌موو لایه‌نێن سیاسی د ناڤ سیته‌مێ سیاسی یێ كوردستانێ دا د رازی و ئارامگربن، دا كو ل قوَناغێن ئاینده ی دا بشێن نه‌خشه‌رێكه‌كێ ب دانن و خوه ئاماده بكه‌ن بوَ راپرسیێ ل هه‌رێما كوردستانێ ل بن چاڤدێریا چاڤدێرێن جڤاكێ نێڤ ده‌وله‌تی، وه سه‌ركردایه‌تیا سیاسی یا كوردستانێ ژی ده‌وله‌تێن ده‌ور و به‌ر و جیران ژی هایدار بكه‌ن ژ بابه‌تێ پلانا راگه‌هاندنا سه‌ربه‌خوَیا كوردستانێ، بوَ ده‌وله‌تێن هه‌ڤسوو باوه‌ریێ دروست بكه‌ن كو كوردستان د ئاینده‌ی دا نابیته مه‌ترسی ل سه‌ر به‌رژه‌وه‌ندیا وه‌لاتێن وان و ماتیكرنێ دناڤخوه‌یا وه‌لاتێن واندا ناكه‌ت و پلانا ئاڤاكرنا ده‌وله‌تا كوردستانا مه‌زن نینه. چونكه ئه‌ڤروَ جڤاكێ ناڤ نه‌ته‌وه‌ی ژی ب هووری چاڤدێریا ب رێڤه‌برنا سیسته‌مێ ده‌ستهه‌ڵاتداریا هه‌رێمێ دكه‌ن ژ رویی سیاسی و ئاساییش و ئابووری و دبلوماسی و ئاراسته‌یا تێكه‌لیا ده‌وله‌تی ڤه، ل دووڤ راپوَرتا ( تاسك فوَرس) یا ئاڤاكرنا ده‌وله‌تێ د كوردستانا عیراقێ دا دبیژیت : كه‌سه‌ك نینه سه‌ربه‌خویێ پێشكێشی كوردا بكه‌ت وه كه‌سه‌ك ژی نینه كوردا بكه‌ته ئه‌ندام ل نه‌ته‌وێن ئێكگرتی دا. پێدڤی یه كورد ب خوه سه‌روه‌ریێ ب ده‌ستڤه بینن و ب سه‌لمینن بو جیهانێ كو به‌لێ ئه‌م كورد دشێین خوه برێڤه ببه‌ین و حكومرانیێ ل خوه بكه‌ین ل سه‌ر بنه‌مایێن دیموكراسیه‌تا روَژ ئاڤا. د ئه‌نجام دا كوردستان دبیته موَدێله‌كا تازه یا ده‌وله‌تا دیموَكراسی ل روَژهه‌لاتا ناڤین دا و دێ بیته ئیك ژ هه‌ڤپه‌یمانا ده‌وله‌تێن هه‌ڤپه‌یمان ب سه‌ركێشیا ئه‌مریكا وه ئه‌و ژی دێ شێت پارێزگاریێ ل وه‌لات و ده‌وله‌تا كوردستانێ كه‌ن.
