د هه‌ڤكێشا كوردستانی و جیهانی دا
سه‌رۆك بارزانی ئه‌ڤرۆ ل بوارێن سیاسی و له‌شكه‌ری و دیبلۆماسی و ئابووری وه‌ك سه‌رۆكه‌ك ل سه‌ر ئاستێ پڕانیا وه‌لاتێن جیهانێ پێشوازی ل كه‌سایه‌تییا وی یا لێهاتی و بالكێش و بیر و بۆچوون و تێروانینێن وی تێ كرن، پێر ل ئه‌وروپا و ئه‌مریكا ل سه‌ر ئاستێ سه‌رۆك و بریار ب ده‌ستێن جیهانی و دوهی ل وه‌لاتێن كه‌نداڤی وعه‌ره‌بستانا سعوودی ل سه‌ر ئاستێ شاه و میران و ئه‌ڤرۆ ل توركیا ل سه‌ر ئاستێ سه‌ركۆمار و سه‌رۆكوه‌زیران و. .. هتد.
ژ بۆ به‌رسڤدانا هه‌ر ده‌نگویه‌كا ناڤخوه‌یی یاكو خه‌ونێن خراب ب سه‌رۆك بارزانی ڤه دبینن، ئه‌ز دخوازم دلۆپه‌كێ ژده‌ریایا لێهاتن و ژێهاتنا سه‌رۆك بارزانی ب ڤی ره‌نگی خوه‌یا بكه‌م:
ئاماده‌بوونا سه‌رۆك بارزانی ل سه‌نگه‌رێن به‌رگریێ دا جیهان مه‌نده‌هۆشكر، كا چاوا ل ڤی سه‌رده‌میدا سه‌رۆكه‌ك هه‌یه راسته‌وخوَ ل سه‌نگه‌رێن پێشیێدایه و نه ل ناڤ كۆچك و ته‌لاراندا سه‌رپه‌رشتیا شه‌ڕی دكه‌ت. هه‌رچه‌نده ژ مێژه سه‌رۆك بارزانی ب خوه به‌رسڤا ڤێ چه‌ندێ دایه، كو به‌رده‌وام شانازی ب پێشمه‌رگایه‌تیا خوه بریه، لێ ب دیتنا من: نه ته‌نێ سه‌رۆكایه‌تیا كوردستانێ پێویستی ب سه‌رۆك بارزانی هه‌یه، لێ ته‌ڤ جیهانێ پێویستی ب سه‌رۆك بارزانی هه‌یه.
ئه‌ڤ ره‌نگێ پێشمه‌رگایه‌تیێ و ره‌نگێن دن یێن سه‌رۆك بارزانی، چ ل ده‌مێ پێشوازیكرنێ ل شاندێن له‌شكه‌ری و دیپلۆماسیێن وه‌ڵاتێن بڕیار بده‌ستێن جیهانێ، چ ل ده‌مێ ب فه‌رمی بانگهێشتی كۆچكێن سه‌رۆكایه‌تیا وان وه‌لاتان دكه‌ن، چ ل ده‌مێ ئاماده‌بوونا وی ل كۆڕبه‌ند و سه‌نته‌رێن ئه‌كادیمیێن سیاسه‌ت و ئابووریا نێڤده‌وله‌تیدا، چ ل ده‌مێ ب رێیا وی ئالیكاریێن له‌شكه‌ری، نه ته‌نێ بۆ باشوور لێ بۆ رۆژئاڤایێ كوردستانێ ژی تێن كرن، و هه‌لگرێ په‌یاما پرۆسێسا ئاشتی بوونێیه ل باكوور و توركیا به‌رده‌وام كار بۆ دكه‌ت و بۆ رۆژهه‌لاتێ ژی ل هه‌ر ده‌مه‌كێ پێویستدا هاریكاربوویه، پڕانیا خه‌لكێ كوردستانێ ب هه‌موو ره‌نگ و ده‌نگێن سیاسی و نه‌ته‌وه‌یی و ئۆلدارێن جوَدا ڤه دلخوه‌ش دكه‌ت.
ژه‌نه‌ڕالێن پایه بلندێن وه‌لاتێن بڕیاربده‌ست، كو ب ماندیبوون و لێهاتنێ گه‌هشتینه وان پلێن له‌شكه‌ری، ل ده‌مه‌كیدا چاخێ ئه‌و ژه‌نه‌ڕالێن پایه بلند سلاڤا له‌شكه‌ری بۆ بارزانی دكه‌ن، مرۆڤ ل لێهاتن و زانابوونا سه‌رۆكی دگه‌هه‌ت، یان ل ده‌مێ دیپلۆماسیه‌كێ وان وه‌لاتان بۆ تێگه‌هشتنا ره‌وشا ده‌ڤه‌رێ ل گه‌ل سه‌رۆكی كۆم دبت، ژ سوپاسگوزاریا داویا روونشتنێن خوه‌دا ل گه‌ل وی، مرۆڤ تێدگه‌هه‌ت ئه‌و چه‌ند لێهاتی و ژێهاتیه.
بارزانی هه‌رده‌م ب شیان و لێهاتن و خوه‌راگری و ئاماده‌ییا گه‌لێ كوردستانێ پشتگه‌رم بوویه و پشتگه‌رمه ژی، ئه‌گه‌ر ئه‌ڤی گه‌لی ده‌رفه‌ت بۆ په‌یدا ببت، وێ ببت فاكته‌رێ خێرێ بۆ ته‌ڤ مرۆڤایه‌تی و ئاشتی و سه‌قامگیریێ.
بارزانی ل ده‌مه‌كیدا داخاز ژ گه‌لێ كوردستانێ كر، كار بۆ ده‌وڵه‌تا دامه‌زراوه‌یی و دیموكراسی بكن، پیلانێن هه‌رێمی ب تایبه‌تی حكومه‌تا عێراقا فیدرال، كوردستان به‌رهنگاری شه‌رێ تیرۆرستێن داعش كر، سه‌ره‌رای وێ چه‌ندێ سه‌رۆك بارزانی سه‌رپه‌رشتیا شه‌ڕه‌كی جیهانی ل دژی داعش دكه‌ت، هه‌ڤده‌م بۆ وێ ئارمانجا كو ئه‌ڤه چه‌ندین ساله خه‌بات بۆ تێكرن، ژ دو ئالیانڤه خه‌بات و تێكۆشین به‌رده‌وامه.
ژ لایه‌كی بۆ سه‌روبنكرنا ئه‌وان پیلانێن بۆ هاتینه دارشتن، كو ژ ڤێ كوره كۆلانێ و بۆ كوره كۆلانا هه دژی كه‌سایه‌تیا وی و سه‌ركێشیا وی، ژ لایه‌كێ دیڤه بۆ گه‌هاندنا گه‌میا ئازادیا كوردستانێ بۆ كنارێ ئارامی و ته‌ناهیێ و پرۆژێ ده‌وله‌تبوونا كوردستانێ ب ره‌نگه‌كێ ئاشتی و برایه‌تی، پشتی وێ هه‌موو خه‌بات و قوربانیدانێ، و نوكه ل ده‌مه‌كیدا ئه‌م به‌ر ب سه‌دسالیا پیلانا سایكس – پیكۆ دچین كار یێ بۆ سه‌ر ژ نوو دیزاینا وه‌لاتێن رۆژهه‌لاتا ناڤین تێ كرن و ژ وانا دابه‌شبوونا عێراقێ، كو ب راوێژكاری و هه‌ماهه‌نگیا سه‌رۆك بارزانی ب دیتنا من پشتی ب داویهاتنا شه‌رێ تیرۆرستێن داعش وێ ئه‌ڤ كاره ب جی وه‌ره.
