“شاهدێ رۆڤی دووڤێ رۆڤی یه”
12 رۆژ ده‌رباس بوون كو تاهیر ئه‌لچی هاتیه قه‌تلكرن و مخابن هێ ژی ده‌وله‌ت به‌رپرسێن وێ كریارێ ئه‌شكه‌ره نه‌كرینه. نه ب ته‌نێ ئه‌ڤ رووره‌شیا ده‌وله‌تێ ئه‌و گوله یا كو تاهیر ئه‌لچی پێ هاتیه كوشتن هێشتا نه‌هاتیه دیتن ئان ژی ئه‌شكه‌ره‌كرن. د قه‌تلكرنا تاهیر ئه‌لچی دا ئه‌وقاس تشت ل به‌ر چاڤن لێ مخابن ده‌وله‌تێ چاڤێن خوه گرتینه و ناخازه ببینت. ده‌ما ده‌وله‌ت ب ڤی حالێ خوه بێده‌نگ دمینت، ئه‌م دزانن كو به‌رپرسێ وێ كریارێ ده‌وله‌ت ب خوه یه. د دیرۆكا كوردێن باكوور دا گه‌له‌ك جار ئه‌ڤه هاتیه جه‌رباندن. ب هه‌زاران باده‌كێن كو ل كۆژه‌رێن خوه دگه‌رهن ل دادگه‌ها ده‌وله‌تێ نه!
ده‌وله‌ت دخازت ب ئاوایه‌كی كوشتنا تاهیر ئه‌لچی ژی ب ڤان بوویه‌رێن جوودا بده‌ت ژ بیر كرن. یانی ده‌وله‌ت دفكرت كو وێ پشتێ مه‌هه‌كا دن كه‌سه‌ك به‌حسێ تاهیر ئه‌لچی ناكه‌ت. گه‌لۆ وێ وسان بت یان نه وسان بت، نزانم لێ تشتێ كو دزانم هه‌ر دو ئالی ژی ب هه‌ڤ باش دزانن. یانی ده‌وله‌ت ب گه‌ل، گه‌ل ب ده‌وله‌ت!
بالا خوه بدنێ كو هه‌ر رۆژ تشته‌ك دن ده‌ردكڤه هۆلێ. د كوشتنا تاهیر ئه‌لچی دا ل گۆر لێكۆلینا بالیستیك دا به‌س چه‌كێ پۆلێسان هاتیه ب كار ئانین. یانی 12 پۆلێسێن ده‌وله‌تێ 24 چه‌ك ب كار ئانینه. ئه‌ڤ ژی تشته‌ك گه‌له‌ك بالكێشه. چما بالكێشه ? ژ به‌ر كو ل گۆر قانوونا ده‌وله‌تا توركی تو پۆلێس نكارت 2 چه‌كان (ده‌مانچان) ب هه‌لگرت. یانی هه‌ر پۆلێسه‌ك دكاره به‌س یه‌ك ده‌مانچێ ب هه‌لگرت. لێ د دیمه‌نا دا خوویا یه و ل گۆر راپۆرا بالیستیك ژی ئه‌شكه‌ره‌یه كو هه‌ر پۆلێس 2 ده‌مانچه ل گه‌ل وانن!
د جیهێ خوه دا بسه‌كنن! هێ تشتێن بالكێش نه‌تمام بووینه! ئه‌و پۆلێسێن كو د بوویه‌را كوشتنا تاهیر ئه‌لچی دا ل وێ ده‌رێ بوونه ل سه‌ر داخوازا دۆزگه‌ر د دادگه‌هێ دا وه‌ك شاهد هاتنه گۆهدار كرن. یانی نه وه‌ك كه‌سێن كو ژێ گومان تێكرن، نه وه‌ك شاهد! ما ئه‌ڤه چ ره‌زاله‌تیه? ژ وان پۆلێسان پێشتر تو كه‌س گوله به‌رنه‌دایه و ئه‌و د بن گومانه‌ك مه‌زن دا نه، لێ مخابن دۆزگه‌ر وان وه‌ك شاهد گۆهداری دكه‌ت! بالكێشی هێ ژی به‌رده‌وام دكه‌ت كو ئه‌و پۆلێس دبێژن مه گووله به‌رنه‌دایه! كورۆ ل گۆر دیمه‌نا هه‌ر تشت ئه‌شكه‌ره‌یه! ون زارۆكا دخاپینن ئان خوه دخاپینن!
ئه‌و ده‌وله‌تا كو د رۆژه‌كێ دا تاهیر ئه‌لچی بنچاڤ كر د 12 رۆژان دا نكارت ب ئه‌وقاس دیمه‌نا و به‌لگه‌یا كوژه‌رێ تاهیر ئه‌لچی ئه‌شكه‌ره بكه‌ت! ون چ بكن ژی گه‌ل دزانه كوژه‌رێ ئه‌لچی كی یه! هه‌ما هه‌تا ئێڤارێ ژ خوه ره كولپا ل هه‌ڤ ده‌ینن و راگهاندنێ ب ئاگاهداریێ ده‌ره‌و بخاپینن! ده‌وله‌تێ به‌رێ كورد ل به‌ر چاڤێن هه‌ر كه‌سی قه‌تل دكر لێ مخابن ژ به‌ر كو تو به‌لگه ئان ژی دیمه‌نه‌ك تنه بوو گه‌ل بێچاره دما. لێ ڤێ جارێ هه‌ر تشت ل به‌ر چاڤه و هه‌موو دیمه‌ن ئه‌شكه‌ره‌نه. چقاس بالكێشه، كامیره‌مانێ پۆلێسان دبێژت كو د ده‌ما بوویه‌رێ دا من وێنه نه‌دكر! كورۆ ئه‌م دزانن چ یه، چه‌وا یه! قه‌ت خوه نه‌وه‌ستینن! باش بزانبن كو نه ب ته‌نێ بیرۆیا ئامه‌دێ یا مافێن مرۆڤی ئه‌م رۆژنامه‌ڤانێت ب خیره‌ت ژی كوشتنا تاهیر ئه‌لچی دشۆپینین!
به‌رهه‌ڤكرن: ئه‌ڤرۆ
