پێكئینانا هێزێ بۆ چیه و بۆ كێیه؟
بێخش شه‌رێ داعشێ شه‌ره‌كێ نه‌چاڤه‌رێ كری بوو و ژ ڤه‌رێژا وی شه‌ری ترسێن مه‌زن ل سه‌ر كوردستانێ په‌یداكرن، ژ به‌ر كو ڤێ هێزا شه‌ڤێن تاری هه‌موو چه‌كێ له‌شكه‌رێ سوریێ و عێراقێ ل ره‌قه و مووسل كه‌ڤتیه د ده‌ستێن وان دا. دیسان هه‌ر تیروَریسته‌كێ ل دونیایێ ل خوه خرڤه‌كرن، زێده‌باری عه‌ره‌بێن شوفێنی ل عێراقێ ب خوه ژی و ب وێ دڕه‌نده‌یا خوه هێرش كرنه سه‌ر كوردستانێ و هێزێن پێشمه‌رگه‌ی ب چه‌كه‌كێ كه‌ڤن و ساده، به‌لێ ب بیروباوه‌ره‌كا پیلای، شیان هێرشێن وان رابگرن و هه‌ر كه‌سه‌كێ خوه‌دان خیره‌ت و حه‌ز ژێكه‌رێن ئاخا خوه، ب كوَم چوونه هاریكاریا برایێن خوه یێن پێشمه‌رگه ل به‌روكێن شه‌ری و سه‌دان كوردێن ده‌رڤه‌ی وه‌لاتی ژی ڤه‌گه‌ریانه كوردستانێ بوَ به‌ره‌ڤانیكرنێ ژ وه‌لاتێ خوه و كوَمه‌كا وان قه‌هره‌مانان ل مه‌یدانێن شه‌ری هاتینه شه‌هیدكرن، مینا شه‌هیدێ قه‌هره‌مان (سه‌بری بامه‌رنی) و شه‌هیدێ قه‌هره‌مان (خه‌یری به‌رواری) و د گه‌ل هندێ دا ژی ب هزاران ژ هه‌موو ته‌خ و چینێن ملله‌تی وه‌كو خوه‌به‌خش و خوه‌گوَریكه‌رێن كوردستانێ ده‌ست هه‌لاندن و چوونه به‌روكێن شه‌ری.
ئه‌ڤروَكه ئه‌م یێ ل شاشێن ته‌له‌فزیۆنا دبینین كو سه‌ركێشێن بزاڤا گوران و نه‌مازه پشتی كوده‌تا وان یا سه‌رنه‌گرتی ئه‌وا كو بوَ هاتیه دارێنتن؛ ئه‌ڤروَ جاره‌كادی یێ بزاڤێ دكه‌ن كو ئه‌ڤ بزاڤه ژی هێزه‌كا چه‌كداری دروست بكه‌ت. ئه‌رێ گه‌لوَ ئه‌و روَژا كو كوردستان ل به‌ر مه‌زنترین گه‌ف، نه نه‌وشێروان و نه ژی سه‌ركێشێن وان نه تنێ نه‌چوونه ئه‌نیێن شه‌ری حه‌تا سه‌ره‌دانا هێزێن پێشمه‌رگه‌ی ژی نه‌كرن و ئه‌گه‌ر ل وێ روَژێ وان ئه‌ڤ چه‌نده كربا دا ئه‌ڤروَ بوَ هه‌مووان دیاربیت كو ئه‌و وه‌لاتپه‌روه‌رن و ئه‌گه‌ر بێژن مه چه‌ك نه‌بوو پتریا وی خه‌لكێ چوینه به‌روكێن شه‌ری بوَ به‌ره‌ڤانیكرنێ ژ ئاخا وه‌لاتی د بێ چه‌ك بوون هه‌ر بوَ میناك ئه‌ز وه‌كو پێشمه‌رگه‌كێ كه‌ڤن ل 27/6/2014 ده‌مێ گه‌فێن مه‌زن كه‌ڤتینه سه‌ر كوردستانێ ئه‌م وه‌كو خوه‌به‌خش ل ده‌ڤه‌را ئامێدیێ 650 كه‌س ڤێكرا چوینه به‌روكێن شه‌ری ژ هه‌موو ته‌خ و چینان و ژ ڤێ كوَما هه‌نێ تنێ 150 كه‌س ب چه‌ك بوون و یێن دیتر هه‌موو د بێ چه‌ك بوون و ب دله‌كێ گه‌رم قه‌ستا به‌روَكێن شه‌ری كرن ژبوَ به‌ره‌ڤانی كرنێ ژ ئاخا خوه و وه‌لاتێ خوه و بوَ بلندكرنا ده‌قا (مه‌عنه‌ویات) پێشمه‌رگه‌ی.
ئه‌رێ بزاڤا گوَڕان هوون بوَ كێ دبێژن دێ هێزا چه‌كداری دروستكه‌ین؟ هه‌كه ل وێ روَژێ هه‌وه ده‌ست هه‌لاندبان ئه‌ڤروَكه دا وه‌كو نێره‌كه‌وا خوَڕن! به‌لێ دروستكرنا هێزه‌كا چه‌كدار و بێ وه‌زاره‌تا پێشمه‌رگه‌ی و بێی بكه‌ڤیته بن رێدارێن حكومه‌تا كوردستانێ ڤه دیسان درێژی دانه‌كه ب پیلانێن هه‌وه یێن سه‌رنه‌گرتی دژی وه‌لاتێ مه، به‌لێ باش باوه‌ربكه‌ن پێشمه‌رگێ كوردستانێ داعش تێك شكاندن و چیڤانوَكا وان یا كرێت هه‌ڕفاند هشیاربن هوون ژی خوه شاش نه‌كه‌ن.
