خوزی ب تنێ شه‌ڤه‌كێ به‌رپرسان كاره‌ب نه‌بایه!
ده‌مێ پرۆپاگندێن هه‌لبژارتنان دهێنه كرن، هه‌ر پارته‌كێ یان هه‌ر لیسته‌كێ به‌رنامێ خوه یێ تایبه‌ت هه‌یه، هه‌روه‌سا هه‌ر به‌ربژێره‌ك هنده‌ك درووشمان بلند دكه‌ت، بێگومان پارت و لیست و به‌ربژێر هنده‌ك خزمه‌تگوزاری و كێم و كاسیان دكه‌نه د به‌رنامێن خوه دا، مینا دادپه‌روه‌ریا جڤاكی و دامه‌زراندنا وه‌لاتیان و تاپۆكرنا خانیێن زێده‌گاڤی و دروستكرنا كاره‌بێ و بزاڤكرن بۆ راكرنا موه‌لیدێن كاره‌بێ، ئانكو ب ئاوایه‌كێ گشتی به‌رنامێ وان بۆ خوه‌شكرنا ژیانێ یه و وه‌كی دبێژن ”به‌حه‌شتێ دئیننه لێڤێ”.
مخابن د راستی دا پڕانیا وان كاری بۆ خوه‌شگوزه‌رانیا خوه دكه‌ن، چنكو ده‌مێ دبیته پشتی هه‌لبژارتنان و دگه‌هنه پله و پۆستان ب تنێ های ژ خوه و ژیانا خوه یا تایبه‌ت هه‌یه و “نه ئه‌و سیكه و نه‌ئه‌و بازار”! راسته هه‌رێما كوردستانێ د قه‌یرانا دارایی دایه و ئه‌م دبێژین گرێدای حوكمه‌تا به‌غدایه، لێ هنده‌ك تشت هه‌نه چ گرێدان ب به‌غدایێ ڤه نینه. ئه‌ڤجا گه‌له‌ك كێم و كاسی هه‌نه مرۆڤ به‌حس بكه‌ت، لێ دخوازم به‌حسێ ره‌وشا كاره‌بێ بكه‌م، چنكو كاره‌ب ژ وان پێدڤیێن سه‌ره‌كی یه بۆ وه‌لاتیان، مخابن پتر ژ 20 سالایه ئه‌م نیمچه سه‌ربخۆینه و چه‌ند خوَلێن په‌رله‌مانی و چه‌ند كابینێن حوكمه‌تان هاتن و چوون و ئه‌م نه‌شیاینه ب تنێ كاره‌بێ دروست بكه‌ین!!
د ده‌مه‌كی دا مودێلا موه‌لیدان ده‌ركه‌فت كو سیسته‌مێ كاره‌بێ ل عێراقێ و كوردستانێ هاتبوو تێكدان و بۆ وی ده‌می تشته‌كێ گه‌له‌ك باش بوو و سال بۆ سالێ دگه‌ل به‌رفره‌هبوونا باژێران ژمارا موه‌لیدان زێده‌بوو، هه‌تا گه‌هشتیه وێ رادێ لیژنه‌كا بلند بۆ كاروبارێن وان ل قائیمقامیێ بهێته دروستكرن كو خوه ل ئاریشێن موه‌لیدان و وه‌لاتیان بكه‌ته خودان، ب ئاوایه‌كی گازوایل بۆ موه‌لیدان ژ ئالیێ حوكمه‌تێ ڤه دهاته دابینكرن، لێ قه‌یرانێن ب سه‌ر هه‌رێمێ دا هاتین كارتێكرن ل ره‌وشا هه‌ر تشته‌كی كر و ژ به‌ر كێمبوونا كاره‌با گشتی ل ڤێ دووماهیێ بریار ژ ئالیێ كارگێریا پارێزگه‌ها دهۆكێ ڤه (لیژنا بلندا موه‌لیدان) هاته دان كو كاره‌با موه‌لیدان بهێته كێمكرن، هه‌روه‌كی وان دیاركری ئه‌ڤ كێمكرنه د به‌رژه‌وه‌ندیا وه‌لاتیان دایه، چنكو هه‌كه كێم نه‌كربا پێدڤی بوو بهایێ ئه‌مپێرێ كاره‌با موه‌لیدان زێده كربایه! كارگێریا پارێزگه‌ها دهۆكێ وه‌كی وێ گۆتنێ كر (یان ناچیته ئاشی، یان دێ ئاشه‌ڤانی كوژیت)، ئه‌ڤه ژی یان دێ كێم كه‌ن، یان دێ بهایێ ئه‌مپێری زێده كه‌ن، باشه ما چ چاره‌یێن دن نه‌بوون؟ّ! هه‌كه راست به‌رژه‌وه‌ندیا وه‌لاتیان ل به‌ر چاڤ بایه، بلا حوكمه‌تێ بۆ وه‌لاتیان قوربانی دابایه و گازوایل ب بهایه‌كێ گونجای دابا خوَدانێن موه‌لیدان، چنكو حوكمه‌ت و په‌رله‌مان ب وه‌لاتیان هاتینه د هه‌بوونێ دا، ئانكو هه‌كه وه‌لاتی نه‌بن هه‌بوونا وان ژی نابیت. هه‌كه ئه‌ڤ بریاره یا دیراسه‌كری با ئه‌ز باوه‌ر دكه‌م نه‌دهاته ده‌ركرن، چنكو ئه‌م هه‌موو دزانین د ده‌مێ قه‌یرانان دا هه‌ژاری په‌یدا دبیت و هه‌كه هه‌ژاری هات بێكاری ژی دهێت، ئه‌ڤجا پشتی قه‌یران و هه‌ژاری و بێكاری دهێن ئاریشێن ئێمناهیێ ل په‌ی دهێن، مینا دزی و شه‌لاندن و كوشتنێ، ئه‌ڤجا بریارا كێمكرنا كاره‌بێ ژی هاریكاره بۆ ئه‌نجامدانا وان جۆره تاوانان، چنكو سه‌عه‌ت دویێ شه‌ڤێ كاره‌با موه‌لیدان دچیت.
هه‌كه ئه‌م ئاوَره‌كێ ل ئیسلامێ و پێغه‌مبه‌رێن خودێ سلاڤ ل سه‌ر بن و هنده‌ك عیملاقێن ئیسلامێ بده‌ین، وه‌سا دیار دبیت كو ئیسلامێ رۆژیگرتن فه‌رزكرینه داكو كار بده‌ستان و زه‌نگینان های ژ هه‌ژاران و وه‌لاتیان هه‌بیت، هه‌روه‌سا یوسف پێغه‌مبه‌ر سلاڤ ل سه‌ر بن داخواز كر كو ببیته به‌رپرسێ خزینێن مسرێ داكو دادپه‌روه‌ریێ بكه‌ت، دیسان عیملاقێ ئیسلامێ عومه‌رێ كورێ خه‌تابی ده‌مێ گۆتی هندی وه‌لاتی گوشتی نه‌خۆن ئه‌ز ناخۆم! ئه‌رێ كیژ به‌رپرسه ئه‌ڤه بۆ خوه كرینه چاڤلێكه‌ر؟ به‌رۆڤاژی هه‌ر به‌رپرسه‌كی موه‌لیده‌كێ عیملاق هه‌یه كاره‌با گشتی هه‌بیت یان نه‌بیت بۆ وی چ خه‌م نینه و ماشائه‌لا پاره ژی هندی بڤێت یێ هه‌ی، هه‌روه‌سا پرانیا وان زێره‌ڤان ل به‌رده‌گه‌هێن وان هه‌نه و دزیكه‌ر هه‌ر نه‌وێرن نێزیك ببن، ره‌نگه هنده‌ك بێژن مانێ زه‌نگین ژی هه‌نه موه‌لیدێن عیملاق هه‌نه، دبێژمێ راسته، لێ چه‌ند زه‌نگینان موه‌لیده هه‌بن ژی ئه‌و نه پیڤه‌ره، به‌لێ یا گۆتی یێ تێر های ژ یێ برسی نینه، بلا به‌رپرس تێر ل به‌ر كاره‌ب و سپلێتا بنڤن یا دی مشكیلا وه‌لاتیانه ل تاڕیێ بن! دزیكه‌ر بچنێ! یا گرنگ سه‌یدایێ به‌رپرس یێ مرتاح بیت، مه‌ترسی بیت بۆ وه‌لاتیانه و كێمكرنا كاره‌بێ بیت بۆ وه‌لاتیانه و. . هتد، له‌ورا دبێژم خوه‌زی به‌س شه‌ڤه‌كێ به‌رپرسان كاره‌ب نه‌بایه دا پیچه‌ك هه‌ست ب نه‌خوه‌شیا نه‌بوونا كاره‌بێ كربایه.
