بۆچی شه‌هید سه‌بری بامه‌ڕنی دڤیا گوللا تڤه‌نگێ ب نیڤا دلێ من بكه‌ڤیت ؟
رۆژا 12 گولانا 1988 بوو مه پلانه‌كا له‌شكه‌ری دانابوو ژ بۆ گرتنا بنگه‌هێن دوژمنی یێن سه‌رێ بابلۆ-زاویته و باره‌گایێ بابلۆ. وی ده‌می شه‌هیدێ نه‌مر سه‌بری بامه‌ڕنی كارگێڕێ ل. ن. شێخان و به‌رپرسێ له‌شكه‌ری یێ لژنێ بوو و ئه‌ز و ئه‌و، ئه‌و نێزیكی 3 مه‌ها بوو ببوومه كارگێڕێ هه‌مان لژنێ. شه‌هید سه‌بری وی ده‌می ژن خواستبوو لێ هێشتا نه‌ڤه‌گوهاستبوو و شاهیا خوه نه‌كربوو، مه‌ڤیا به‌ری ئه‌نجامدانا وێ چالاكیا له‌شكه‌ری ئه‌و ده‌ستوورێ ژ لقێ وه‌رگریت و بچیت خانما خوه ڤه‌گوهێزیت و شاهیا خوه بكه‌ت، لێ ژ به‌ر كو ئه‌و به‌رپرسێ له‌شكه‌ری بوو و چ جارا ژی وی نه دڤیا چالاكیێن له‌شكه‌ری بێنه كرن و ئه‌و پشكدار نه‌بیت، له‌ۆما وی نه دڤیا بچیت و پشكدار نه‌بیت و ئه‌م ب ته‌نێ وێ چالاكیێ ئه‌نجام بده‌ین. لێ مه ژی نه دڤیا ئه‌و وه‌كی هه‌موو چالاكیێن دی د هێرشێ دا پێشه‌نگ بیت و مه ل به‌ر بوو وی بهێلینه ل گه‌ل گرۆپێ دووێ یێ هێرشێ. لێ ژبه‌ر كو وی چ جارا نه‌دیتبوو هێرشه‌ك بهێته كرن و ئه‌و ل گه‌ل یێن پێشیێ نه‌بیت، له‌ۆما گه‌له‌ك زه‌حمه‌ت بوو ئه‌م بشێین وی ڕازی بكه‌ین كو ل گه‌ل هێرشا پێشیێ نه‌هێت. دوماهیێ من گۆتێ: سه‌بری ئه‌ز ئاماده‌مه ڤێ چالاكیێ تێكبده‌م و نه‌هێته كرن، لێ ئه‌ز ئاماده نینم تۆ ل گه‌ل هێرشا پێشیێ بهێی و پاشی شه‌هید ببی و هه‌موو خه‌لك لۆمه‌ی مه بكه‌ن. ژ به‌ر كو ناڤبه‌را من و وی گه‌له‌كا خۆش بوو و زێده ڕێز ل من دگرت، دوماهیێ نه‌چار بوو بهێته سه‌ر بڕیارا مه.
ژ به‌ر كو ئه‌و هێزا د وان بنگه‌هان دا هه‌موو كوردبوون، مه نه دڤیا ئه‌م زیانێ بگه‌هینینه مرۆڤان، لێ ته‌نێ ئارمانجا مه گرتنا وان بنگه‌هان و چه‌ك و جه‌بلخانێن وان بوون. پشتی مه هه‌موو بنگه‌هێن سرتا سه‌ری ب هێرشه‌كا بله‌زا وه‌ك برووسكێ و بێ زیان گرتین، ئێدی مه به‌رێ خۆ دا باره‌گایێ مه‌زن كو دكه‌فته هنداڤی گوندێ بابلۆ (جهێ نوكه دكانه‌كا بچووك لێ یه). هه‌ر ل سه‌ر هه‌مان هزرا زیان نه‌گه‌هاندنا مرۆڤان، پشتی مه چه‌ند گولله‌یێن ئار پی جیێ به‌رداینه وێ زریپۆشا كو د ناڤ باره‌گای دا گولله به‌رددانه مه، ئه‌م ڕاست ژووردا به‌ره‌ڤ باره‌گای چووین، لێ مخابن ئه‌و چه‌كدارێن كوردێن كو د وی بنگه‌هی دا بوون هه‌لوێستێ وان به‌رۆڤاژی یێ مه بوو و وان مرۆڤ دۆستیا مه بۆ خوه ب ده‌لیڤه زانی و چه‌په‌رێن خوه گرتن و ب دل و جان شه‌ڕێ مه كرن، له‌ۆما د ڤی ده‌می دا هه‌ڤالێ مه ئه‌حمه‌د سیاری شه‌هید كرن و ئه‌م 7 كه‌سێن دی ژی برینداركرین، كو ئه‌و ژی ( ئه‌مین گه‌ڤه‌ڕكی، شێخ عه‌لی، شه‌هید سه‌فه‌ر سیاری، حسنی كانیاباسكا،.. .. .. سۆری و ئه‌ز ). یا من ئه‌ز دزانم گولله گه‌له‌ك ژ نێزیك و ب نیشان به‌ردابوو من ژبه‌ر كو ل سینگێ من دا بوو سێ تبلا د سه‌ر دلێ من ڕا، له‌ۆما ژی دزانم گه‌له‌ك ژ نێزیك به‌ردا من چنكو ڤێكه‌فتنا گوللێ من هه‌ست پێنه‌كر ته‌نێ ده‌مێ ل پشتا من ده‌ركه‌فتی من هه‌ست پێكر، هه‌ڤالێن من پڕانیا وان پێن وان بوو ژ بلی من و. .. .. .. سۆری كو یا وی زكێ وی بوو. پشتی ده‌مه‌كی كێم ڕه‌وشا من گه‌له‌ك خراب بوو و بۆ ده‌مه‌كی درێژ من های ژ خوه نه‌مابوو. لێ تشتێ باش هه‌ڤالێن مه د سه‌ر وان هه‌موو زیانان ڕا شه‌ڕه‌كێ شێرانه كرن و هه‌موو ئارمانجێن د پلانێ دا هاتینه دانان و ل گه‌ل باره‌گایێ مه‌زن ژی هه‌موو گرتن و نێزیكی 72 دیلا و هه‌ژماره‌كا مه‌زنا چه‌ك و جه‌بلخانه و ترۆمبێل و كه‌لوپه‌لێن له‌شكه‌ری گرتن. ده‌مه‌كی ئه‌ز هشیاربووم ئێشانا برینا من هندا دژوار بوو كو ناهێته وه‌سف كرن، چه‌ند برینداره‌كێن دی ژی دانابوونه بڕه‌خ من ڤه، لێ ئه‌و دباشتر بوون، من دیت هه‌ڤال بامه‌ڕنی كو دبیته پسمامێ شه‌هید سه‌بری ل هنداڤ سه‌رێ منه بۆ من دكه‌ته گری، پاشی من چاڤێن خوه ڤه‌كرنه ڤه من دیت شه‌هید سه‌بری ژی یێ ل هنداڤی سه‌رێ من، سه‌رێ خۆ نزمكر و ته‌ماشه‌ی برینا من كر و سه‌رێ و خۆ هه‌ژاند، بوو نچه نچا لێڤێن وی، هه‌روه‌كی بێژیت ته‌حه‌م یان مخابن، ئه‌ز نه دشیام باخڤم لێ ب ئیشاره‌تا من گۆتێ: سه‌بری خه‌مێ نه‌خۆ ئه‌زێ باشم چ ل من ناهێت. ل من ڤه‌گێڕا و گۆته من: ما من ژ به‌ر هندێ كا تۆ یێ باشی یان نه، خه‌ما من ئه‌وه كانێ بۆچی ڤی جاشێ پیس گولله سێ تبلا ل سه‌ر دلێ ته دایه و ل نیڤا دلێ ته نه‌دایه دا به‌لا من و ته ژێكڤه ببیت و جارێن بێن ئه‌ز بكه‌یفا خوه د هێرشا پێشیێ دا پشكدار ببم. من زانی كا سه‌بری دڤێت چ په‌یام بگه‌هینیته من و هه‌ڤالێن ل دۆرا من و من دڤیا ب ئاخفتنا وی بكه‌نم لێ ئێشانێ ڕی نه‌دا من.
هه‌لبه‌ت سه‌بری دڤی ده‌مێ هۆسا ته‌نگ دا ڤیا ب ڤێ ئاخفتنا خوه چه‌ند په‌یامه‌كا بگه‌هینیته من و پێشمه‌رگێن ل دۆرا من، كو ئه‌و ژی ئه‌ڤه بوون:
1-پێشمه‌رگه گه‌له‌ك ژ هندێ مه‌زنتره كو ب شه‌هید بوونێ غه‌مگین ببیت و ئه‌م شه‌هید ببین یان نه هیچ بۆ مه نه‌خه‌مه.
2- دڤیا بێژیته و پێشمه‌رگێن دۆرا من ژی ڕه‌وشا ته نه جهێ مه‌ترسیێ یه و پیدڤی دلته‌نگیێ ناكه‌ت.
3- دڤیا حه‌نه‌كا ل گه‌ل من بكه‌ت كو به‌ری ده‌مژمێره‌كێ من و وی دانوستاندن ل سه‌ر پشكداربوونا وی د هێرشا پێشه‌نگ دا كربوو و ب حه‌نه‌كا تۆلێن خوه ژ من ڤه‌كه‌ت.
