جڤاك ب گوتارێن ئاشتیێ دهێته ئاڤاكرن
چ ڤه‌كوَله‌ر یان خانده‌ڤان نه‌شێن به‌حسێ وێ چه‌ندێ بكه‌ن كو گوتارێ رۆلێ خوه یێ گرنگ، نه‌بوویه ل ژیانا تاكه‌كه‌س و جڤاكی، ژبه‌ر كو گوتار نه ب تنێ گاریگه‌ریا خوه یا ده‌مكی ل سه‌ر هزرا خانده‌ڤانی چێدكه‌ت، به‌لكو ره‌هه‌ندێن كارتێكرنا وێ د به‌رده‌وامن و تایبه‌ت كه‌سێ خوانده‌ڤان ئاسوَ و پێنگاڤێن ژیانێ ل به‌ر رۆهن دبن، ژبه‌ر كو د گوتارێ دا، نڤیسه‌ر ب هه‌ناسه‌كا زێده‌تر دشێت ئه‌وا وی بڤێت بێژیت به‌روَڤاژی هونه‌رێن دی یێن رۆژنامه‌ڤانی وه‌كو ده‌نگوباس و راپۆرت كو رۆژنامه‌ڤانێ ب دروستكرنا وان رادبیت یێ چارچوَڤه كریه و نه‌شێن ره‌ئیا خوه دیار بكه‌ت.
رۆلێ راگه‌هاندنێ چ جار ناهێته كێمكرن، ژبه‌ر كو ئه‌گه‌ر په‌یڤ د درێژاهیا مێژوویی دا، هه‌ر مابا ل جهێ خوه و ببا ئێخسیرێ ده‌روبه‌رێن خوه وه‌كو ماسیێ د به‌حرێ دا، تشته‌ك نه‌دبوو ب ناڤێ ده‌رڤه و گه‌هاندنا هزر و بیر و بوَچوونان، له‌وما راگه‌هاندن ب رێیا توَرێن گه‌هاندنێ په‌یڤ ده‌رباز كرن و جیهان كره گونده‌كێ بچووك، و نڤیسه‌رێ هه‌ر ده‌را دونیایێ شیا بۆ نموونه ب رێیا نڤیسینا گوتاره‌كێ رایا خوه بگه‌هینته سه‌رانسه‌ری جیهانی.
گوتارێ گه‌له‌ك گرنگیا خوه یا هه‌ی بۆ پرسێن ئاشتیێ و نه‌هێلانا ململانێ و جوداهیێ، چونكه ئه‌و كه‌سێن گوتارا دنڤیسین هه‌موو ئه‌ون ئه‌وێن خوَدان ئه‌زموون و ب درێژیا ده‌می رایێن وان دهێنه قه‌بوولكرن، له‌وما ئه‌گه‌ر ئه‌م به‌حسێ كوردستانێ بكه‌ین و د مێژوویا وێ دا، كو ئێكه‌م رۆژناما كوردی ب ناڤێ كوردستان ل 22/4/1898 ده‌رچووی، به‌هرا پتر نڤیسه‌رێن وێ یێن بنه‌مالا به‌درخانیان د گوتارێن خوه دا به‌حسێ گرنگیا ئێكگرتنا كوردان كریه كو هه‌موو پێكهاتێن وێ ئێكدوو قه‌بوول بكه‌ن ب تایبه‌ت پێدڤیا پاراستنا په‌یوه‌ندیان د ناڤبه‌را كورد و گه‌لێن دی دا نه‌خاسمه ئه‌رمه‌نان، داكو بشێن كیانه‌كێ سه‌ربه‌خوَ بۆ گه‌لێ كورد ئاڤا بكه‌ن كو ئه‌ڤه د ده‌مه‌كی دا بوو كو به‌رده‌وام سولتانێن ئوَسمانی هه‌ولا دوبه‌ره‌كیێ و فتنێ د ناڤبه‌را پێكهاتێن گه‌لێ كورد دا دروست دكر و ڤه‌رێژا به‌لاڤكرنا فكرا ڤان نڤیسه‌ران ل رۆژناما كوردستان و چه‌ندین به‌لاڤوكێن دی بۆ ئه‌گه‌رێ هوشیاریه‌كا سیاسی و ره‌وشه‌نبیری ل ده‌ف تاكێ كورد په‌یدا ببیت و ئه‌نجامێ وێ ژی كوردان د هه‌موو دانوستاندنێن خوه دا ل گه‌ل به‌غدا داخازا ئاشتیێ دكر و ئه‌وبوو ل سالا 1991 كوردان سه‌رهه‌لدان كر و جڤاكه‌ك پری ئاشتی ئاڤاكر، هه‌كه ل سه‌رهه‌لدانا 2004 یا قامشلوَ ده‌نگێ راست یێ گه‌لی ب رێیا ده‌زگه‌هێن راگه‌هاندنێ گه‌هشتبا هه‌موو كوردان ره‌نگه سه‌رلهدان یا به‌رده‌وام با و نوكه پارچا رۆژئاڤایێ كوردستانێ وه‌كو باشوورێ كوردستانێ یا ئازاد با و د ئاشتیێ دا با، له‌وما بۆ پاراستنا ڤێ ئاشتیێ به‌رده‌وام پێدڤیه نڤیسه‌ر ب رێیا گوتارێن خوه ره‌وشه‌نبریێ به‌لاڤ بكه‌ن كو دڤێت ئاشتیا ل هه‌رێما كوردستانێ بده‌ستڤه هاتی بهێته پاراستن، و كار بو پترێ بهێته كرن، بۆ نموونه نوكه ب ملیونه‌ها ئاوارێن خه‌لكێ ژێریا عێراقێ ل كوردستانێ نه، دڤێت چ جار ل گه‌ل هندێ نه‌بین كو كه‌مپین دژی عه‌ره‌بان بهێنه كر تا كو عه‌ره‌ب ژ كوردستانێ بهێنه ده‌ركرن، ره‌نگه ئه‌ڤ كارڤه‌دانێن ل ڤێ داویێ په‌یدا بووین نه‌خاسمه پشتی سوتاندنا ئالایێ پیروزێ هه‌رێما كوردستانێ ژ لایێ هنده‌ك نه‌فامان كارتێكرن ل تاكێن كورد ژی كریه و هه‌ول هاتینه دان كو ئه‌ڤی هه‌لویستی ب هه‌مان هه‌لویست به‌رسڤ بده‌ن كو ئه‌ڤه شاشیه‌كا مه‌زنه، و ره‌وشت و ئاستێ تاكێ كورد گه‌له‌ك ژ ڤان ره‌فتاران مه‌زن تره، ب تنێ كورد دشێن ب رێیا پێشڤه‌برنا هه‌رێمێ و به‌رخودانا پێشمه‌رگه‌ی و ئێكرێزیا مالا كوردی به‌رسڤا ڤان كریارا بده‌ن و دڤێت به‌رده‌وام نڤیسه‌ر وه‌ها جڤاكی تێبگه‌هینیت كو ژیان ب ئێكدوو قه‌بوولكرنێ یا جوان و خوه‌شه و د ئه‌زموونا هه‌موو گه‌لان دا، چ ملله‌ته‌ك نه‌شیایه ب رێیا هێزێ ملله‌ته‌كی ژ ناڤ ببه‌ت و ئه‌زموونا هه‌رێما كوردستانێ ژی باشترین راستیه كو رژێما به‌عسا ژ ناڤچوویی سه‌ره‌رای كیمیابارانكرنا پێنج هزار كه‌سان ل هه‌له‌بجه و به‌رزه‌كرنا 182 هزار كوردان د ئه‌نفالان دا، به‌لێ هه‌ر ئه‌نجام نه‌بوون و كورد نه‌هاتنه قركرن و نوكه سه‌حكه‌نێ هه‌ر ئه‌و عه‌ره‌ب یێن دخاستن كوردان ژ ناڤ ببه‌ن نوكه یێل سه‌ر ئاخا مه د سه‌قایه‌كێ پڕی ئاشتی و ته‌ناهی و ئاڤه‌دان دا دژین.
