ژ بيره‌وه‌ريێن شۆڕه‌شێ
كاك عبدالعزیز ته‌یب چه‌وا ل ساڵا 1985 بوو وه‌زیرێ په‌روه‌ردێ ؟
ل ساڵا 1982 قۆناغه‌كا نوو ده‌ستپێكر و به‌ره به‌ره شوَڕه‌شێ كونترۆلا خوه به‌رفره‌تر لێكر و پتر ده‌ڤه‌رێن چیایی ژ كوردستانێ ڕزگاركرن ژ ده‌ستێ به‌عسیێن داگیركه‌ر و ئێدی ب پراكتیك ڕێڤه‌برنا وان ده‌ڤه‌ران كه‌فته ده‌ستێ شوڕشێ ژ ئالیێ له‌شكه‌ری، سیاسی، جڤاكی و تاكو ئالیێ په‌روه‌رده‌یی ژی.
ل ساڵا 1985 ڕژێما داگیركه‌ر بڕیاره‌ك دا كو قوتابخانا ژ وان ده‌ڤه‌رێن ژبن ده‌ستێ وان ده‌ركه‌فتین ڤه‌كێشت و ده‌رێ وان قوتابخانان بگریت، ئێدی ڤێ بڕیارا وان ڤالاتیه‌كا په‌روه‌رده‌یی په‌یداكر ل وان ده‌ڤه‌ران و ژ بۆ تژی كرنا ڤێ ڤاڵاتیێ ژی لقا ئێكا پارتی دیمۆكراتی كوردستان، كو ده‌سه‌ڵاتدار بوو ل هه‌موو ده‌ڤه‌رێن رزگاركریێن به‌هدینان، بڕیاره‌ك دا كو ب هه‌ر ئاوایه‌كی بیت ڤێ ڤاڵاتیێ تژی بكه‌ت و نه‌هێلیت ده‌رێ ڤان قوتابخانان بهێته گرتن. ئێدی كۆمیته‌یه‌كا په‌روه‌رده‌یی هاته دامه‌زراندن ژ وان مامۆستایێن پێشمه‌رگه یێن شاره‌زا و دوو مامۆستایێن شاره‌زا ژی سه‌رپه‌رشتیا ڤێ كۆمیتێ دكر. ده‌ڤه‌رێن رۆژاڤایێ ڕووبارێ زێی كاك عبالعزیز ته‌یب سه‌رپه‌رشتیا وان دكر و یێن رۆژهه‌لاتێ زێی ژی دكتۆر احمد قه‌ره‌نی دكر. ئه‌ڤ پێنگاڤا شوَڕه‌شێ نه ته‌نێ ده‌رێ وان قوتابخانا ڤه‌كره‌ڤه یێن دوژمنی گرتین، لێ گه‌له‌ك قوتابخانێن نوو ژی ڤه‌كرن، ژبه‌ر كو گه‌له‌ك گوندا به‌ری هینگێ قوتابخانه لێ نه‌بوون و گه‌له‌ك كۆمێن مالا یان گوندێن نوو ژ مالێن پێشمه‌رگا و به‌رگری مللیی و خه‌لكێ دی د وان گه‌لی و نهالا دا هاتبوونه ئاڤاكرن دا كو خوه ژ هێرشێن دوژمنی بپارێزن، شوَڕه‌شێ بۆ وان ژی قوتابخانه ڤه‌كرن.
ئه‌ڤ سه‌رپه‌رشتێن په‌روه‌رده‌یی یێن ناڤ ئینایی ب كاره‌كی گه‌له‌ك هێژا ڕابوون و وان گه‌له‌ك مامۆستایێن باش د ناڤ پێشمه‌رگه و به‌رگری مللی دا په‌یدا كرن ژ بۆ ڕێڤه‌برنا ڤان قوتابخانان، هه‌لبه‌ت هه‌موو مامۆستا ژی ئه‌ڤ كاره وه‌ك خۆبه‌خش دكر و گه‌له‌ك جارا ژی وان قوتابیێن خوه دبرنه د شكه‌فتاڤه ده‌رس دگۆتنێ ژ به‌ر تۆپباران و فرۆكان.
د دڤی ده‌می دا ئه‌ز كادر بووم ل ل. ن. ئامێدیێ كو باره‌گایێ مه ل گه‌لیێ بێشیلێ ل چیایێ مه‌تینا بوو، كاك عبدالعزیز داخواز ژ من كر ل گه‌ل وی سه‌ردانه‌كێ بكه‌ین بۆ گوندێن ده‌ڤه‌را سپنێ بامه‌ڕنێ ( ژ بامه‌ڕنێ تا ڕووبارێ خابووری )، بۆ سه‌ردان و سه‌رپه‌رشتیكرنا قوتابخانێن وێ ده‌ڤه‌رێ، هه‌لبه‌ت بۆ من ژی گه‌له‌ك خوه‌ش بوو ژبه‌ر د زارۆكیا خوه دا هه‌ر من دڤیا ببمه مامۆستا، لێ مخابن دوژمنی ده‌لیڤه نه‌دا من خواندنا خوه ب دوماهی بینم. من و كاك عبالعزیزی گه‌ڕیانا خوه ده‌ستپێكر و تا كو ئه‌م گه‌هه‌شتینه گوندێ ( دهێ ) ل وێرێ ئه‌م ڕاستی ڕێكخراوا شه‌هید سه‌عید سپینداری یا پێشمه‌رگه‌ی بووین كو شه‌هیدێ قاره‌مان سه‌عید چه‌لكی به‌رپرسێ وێ بوو، پشتی سڵاڤ و پرس و كه‌یف خوه‌شیێ شه‌هید سه‌عید چه‌لكی پسیار ژ من كر: ئه‌ڤه هوون ژ كووڤه تێن دێ كووڤه چن، هوون پێدڤی چنه ئه‌م چ هاریكاریا وه بكه‌ین ؟
من ژی ب حه‌نه‌ك ڤه به‌رسڤا وی دا: گه‌له‌ك سوپاس ئه‌م پێدڤی چ تشتا نینین و ئه‌ڤه ئه‌ز و وه‌زیرێ په‌روه‌ردێ خه‌ریكی گه‌ڕیانه‌كا سه‌رپه‌رشتیكرنا قوتابخاناینه. شه‌هید سه‌عید پسیار ژ من كر: وه‌زیرێ په‌روه‌ردێ كیه ؟ من ژی جاره‌كا دی دیسان ب حه‌نه‌كڤه به‌رسڤدا: كاك عبدالعزیزه. وی ژی كره كه‌نی و گۆت: هاااااااا پا باشه من نه‌دزانی مه وه‌زیر ژی هه‌نه. مه خاترا خوه خواست و ئه‌م ل سه‌ر گه‌ڕیانا خوه به‌رده‌وام بووین.
ل ساڵا 2004 ده‌مێ جاره‌كێ ب سه‌ردان هاتیمه كوردستانێ هینگێ كاك عبدالعزیز د كابینا چارێ یا حوكمه‌تا كوردستانێ دا وه‌زیر بوو، به‌لێ ڤێ جارێ بڕاستا نه ب حه‌نه‌ك. من ژی ل وه‌زاره‌تێ سه‌ردانا وی كر و ئه‌و بیره‌وه‌ری من ئینا بیرا وی و گۆتێ: باش بوو حه‌نه‌كا من بوو ڕاستی.
