خه‌ونا من
د خه‌ونێ دا پێشه‌وا قازی محمد سه‌رۆكێ كومارا كوردستانێ ل مهاباد ب نڤیساره‌كا فه‌رمی داخوازا دیتنامن كر، من ژی كارێ خوه كر ب دووراتیا 350 كیلومترا و ب درێژاهیا سێ روَژا ب پێیا ئه‌ز گه‌هشتمه مه‌یدانا چوارچرا ، ژ دوورڤه من پێشه‌وا قازی محمد دیت و ئه‌ز به‌ره‌ڤ ویڤه چووم، ده‌مێ ئه‌ز نێزیك بوویم ده‌نگێ خوه ل من بلندكر و گوته من: راوسته زێده‌تر هێرڤه نه هێی. من گوتێ: بوَچی سه‌رۆك؟ گوته من: تو یێ ژ ناڤ ملله‌ته‌كی دهێی هه‌موو ب جنابه‌تن ب گه‌نده‌لیێ، ئه‌ڤجا ناچێبیت تو نێزیكی من ببی، چونكه ئه‌ڤ جهێ ئه‌ز لێ بوَ گه‌نده‌لا و دووڤه‌لانكێن وان قه‌ده‌غه‌یه. فه‌رمانا سه‌رۆكی یه و ئه‌ز ژی راوستیام. من گوتێ: جه‌نابێ سه‌رۆك كوَمار ته ب نامه‌كا فه‌رمی ئه‌ز یێ داخوازكریم. گوته من: به‌لێ من دڤیا ب رێكا گه‌نجه‌كێ هێشتا ده‌ستێن وی ب پارێ ملله‌تی پیس نه‌بووین په‌یامه‌كێ بگه‌هینمه سه‌رۆكێن هنده‌ك گروَپێن كوردستانێ و سه‌رۆكێ هه‌رێما كوردستانێ. من ژی گوته جه‌نابێ سه‌رۆك كوَماری: ئه‌ز یێ به‌رهه‌ڤم بوَ هه‌ر په‌یامه‌كا جه‌نابێ هه‌وه فه‌رمان بكه‌ت، ب ئه‌مانه‌ت بگه‌هینم. گوته من: باشه گوهێن خوه باش ڤه‌كه، ده‌ڤێ خوه بگره، گوهداریا من بكه، ئه‌ڤا ئه‌ز دبێژم ب ئه‌مانه‌ت بگه‌هینه. گوته من: ل ده‌ستپێكێ ده‌مێ تو ژ ڤێرێ دچی رێكا مالا سه‌رۆكێ گروَپه‌كێ ئیسلامی بگره كو دبێژنێ علی باپیر و بێژێ قازی محمدی هنده‌ك ئاموژگاری یێن بوَته هه‌ین ئاموژگاریا ئێكێ، بێژێ ژ نێزیك دێ توشی نه‌خوه‌شیه‌كا ده‌روونی بیت پشتی كومارا دووێ یا كوردستانێ دهێته راگه‌هاندن؛ ئه‌ڤجا بلا هه‌ر ژ نوكه بوَ خوه راهێنانا ل سه‌ر وه‌رگرتنا بوویه‌رێن نه چاڤه‌رێكری بكه‌ت، هه‌ر وه‌سا بێژێ بلا گه‌له‌ك خوه ماندی نه‌كه‌ت ب سیاسه‌تێ ڤه چونكه نه ده‌وله‌تا كوردی پێ ئاڤا دبیت و نه پێ خراب دبیت، و گوته من ژ ده‌ڤ هه‌ره و خاترا خوه نه خوازه چونكه دێ بێژته ته بارودوَخ له‌بار نیه بوَ روَیشتنی تو!! گوته من پشتی تو ژ ده‌ڤ علی باپیری دچی هه‌ره ده‌ڤ ئه‌و زه‌لامێ دبێژنێ نه‌وشێروان مسته‌فا كو ئه‌و ژی سه‌رۆكێ گروَپه‌كێ سنێلایه بێژێ: ده‌یك و بابێن ڤان سنێلا ئه‌ڤه ب ئه‌مانه‌ت یێن داینه‌ڤ ته، تو ژی ب ئه‌مانه‌ت بزفرینه‌ڤه بوَ خودانا و نه‌كه پاریێ ده‌ڤێ دوژمنی و دگه‌ل درێژ نه‌كه، چونكه دێ ب دولكێن ئاڤێ سه‌رێ ته شكێنن!! پاشی گوته من و ئێكسه‌ر هه‌ره سه‌رادانا مام جه‌لالی بكه و سلاڤێن شوَڕه‌ش و خه‌باتێ بگه‌هینێ و بێژێ هشیاربیت خه‌باتا خوه ب پاره نه‌فروَشیت و بلا ڕه‌ش و سپیا ژێك جودا بكه‌ت، هه‌ر وه‌كو چه‌وا تێكه‌ل كرین. پاشی ئێكسه‌ر هه‌ره كوَچكا سه‌رۆكێ هه‌رێمێ كوڕێ مه‌لا مسته‌فایێ بارزانی و بێژێ قازی سلاڤا ل ته دكه‌ت و ژ مێژه‌یه ل هیڤیا په‌یماته یا دووماهیكێ یه و داخوازێ ژێ بكه بلا په‌یمامه‌كێ ب رێكاته بگه‌هینته من؛ دا كو ئه‌ز بارودوَخێ ملله‌تێ خوه بزانم. و گوته من به‌ری تو بچی سه‌رێ خوه ب ئاڤا پایته‌ختێ كۆمارێ بشوَ دا پاقژ ببی و پاشی هه‌ره خودێ دگه‌ل ته بیت. ئه‌ز ژی رابیم هاتم و په‌یمامێن وی من ئێك ب ئێك گه‌هاندنه خوَدانا حه‌تا گه‌هشتیمه به‌ر ده‌روكێ كوَچكا سه‌رۆكێ هه‌رێمێ، من هند گوهـ لێ بوو كو هه‌ڤژینا من ب ده‌نگه‌كێ بلند گازی من كر و ئه‌ز ژ وێ خه‌وا گران راكرم و گوته من رابه كریا ئاڤ و كاره‌بێ یا هاتی و خوَدانێ خانی ژی یێ ل به‌ر ده‌روَكی. من ژی گوتێ هه‌ر بێژه هه‌ر سێكا بلا بچن و ئه‌گه‌ر مووچه هات بلا هینگێ بهێن و ب زوَری من خه‌وا خوه ئینا دا خه‌ونا خوه به‌رده‌وام بكه‌م و په‌یاما سه‌رۆكی بوَ قازی بزانم و ب ئه‌مانه‌ت بگه‌هینم، به‌لێ ژ قه‌هرێن قه‌یارانا دارایی ل به‌ر ده‌روَكێ مالا من خه‌وێ چاڤێن من نه‌گرتنه ڤه. بوَ زانین هه‌چیێ ڤێ خه‌ونێ باوه‌ر نه‌كه‌ت و بێژیت دره‌وه بلا ده‌وله‌ت بوونا كوردستانێ ژی باوه‌رنه‌كه‌ت.
