دبێژن چاكسازی دێ هێنه كرن!
پشتی ((بار گههشتییه سهرشاخێن گای)) و حوكمهتا ههرێما كوردستانێ، ههكه ب دهڤ ژی نهراگههاندبیت، ب كریار مفلسبووی و نهشیای مووچهیێ چارههیڤێن سالا بۆهری یێن فهرمانبهرێن خوه بدهت و پرانییا وهزارهتان تایبهت وهزارهتێن كارهبێ و پیشهزازی و چاندنێ، نهكارین خزمهتێن پێدڤی پێشكێشی خهلكێ خوه بكهن، دهستههلاتا بێ سهرۆك پهڕلهمان و هندهك وهزیرێن بزاڤا گۆڕانێ و سهرۆكێ وهختێ وی یێ قانوونی خلاسبووی، نهچار بوو پهنایێ ببنه چاكزایان و ههر زوو لیژنهیێن تایبهت پێكبینن.
راسته، ب چاڤان، ئهڤ پێنگاڤهك وێرهك و شارستانییه. لێ پرسیارا خوه دسهپینێت ئهوه: ئهرێ ئهڤ لیژنه دێ كارن د ڤان بارودوخێن ئالۆزده، بێی ئهكتڤییا پهڕلهمانی و ههبوونا سهرۆكهكی بۆ ههرێمێ كو ههموو لایهن دانپێدانێ پێ بكهن، ڤی كاری سهركهڤتیانه ئهنجام بدهن؟
من ب خوه گومان ههیه كو ئهڤ لیژنه وهك پێدڤی بكارن ئهركێ خوه ب دووماهی بینن و بارێ گرانێ پتر ژ پێنچ ملیۆن خهلكێ ههرێما كوردستانێ سڤك بكن. ژبلی شهڕێ داعشێ كو بوَدجهیاكا مهزن لێ دچت، زێدهباری ئهرزانبوونا پترۆلێ ب شێوهیهكێ كێم جاران هۆسا ل بازارێن جیهانی پهیدابووی، ئاڕیشهیا ژ ههموویان ئالۆزتر، ناكۆكیا ناڤخوهیی یه كو ئهڤه پتر ژ چار ههیڤانه خهلكێ كوردستانێ باجهیا وێ ددهت، ب ئهگهرێ وێ ئالۆزیا ل ناڤبهرا پارتێن ههرێمێ ههیی، تایبهت د ناڤبهرا پارتی و گۆڕانێ دا. ئهڤ ناكۆیێن سیاسی گههشتینه ئاستهك وهها ب ترس، مه بڤێت نهڤێت ههموو ئالی هاریكار نابن كو پرۆسێسا چاكسازیێ سهر بگرت. ژ بهر كو هێشتا ههر ئالییهك ئالیێ دی ب گهندهلیێ و نهبوونا شهفافیهتێ و ههبوونا پتر فهرمانبهرێن بندیوار تاوان بار دكهت. ئهڤه ژی ب هێچ رهنگهكی د خزمهتا چاكسازیێ دا نابن، ههكه ئهنجام خرابتر نهبن، تنێ دێ بۆرینا دهمی بت و گرانتر كرنا بارێ وهلاتییان بت.
ههموو ژی دزانن، دووری تیۆرییا پیلانێ (نهزهریهت المۆامره)، ئهڤه تنێ د بهرژهوهندییا نهحهز و نهیاران دانه. لێ روكمانییا پرانییا ئالیێن سیاسی و رژدیا ههر ئێكی ل سهر دیتنا خوه كو (ماستێ وان شرینه و یێ ههڤڕكێ وی ترشه)، چو ئالی نینن قوَربانیێ ب بهرژهوهندیێن خوه یێن بهرتهنگێن حزبی بكهن، دهستپێشخهرییهك جوامێرانه د خزمهتا مللهتی دا بكن و ههر ئێك هێشتا ل سهر گوتنێن خوه یێن بهری ههشت ههیڤان گوتین رژده كو دووڤبهردان و داگێڕانێ ژێ نهكهت. ئانكو ئالترناتیڤێ، پێكهاتن و ئاسایكرنا رهوشێ كو بزڤڕته بهری 12-10-1015 دیمنته ب هیڤیا ئالیێن دن یێن بیانیڤه. ههلبهت ههر ئالییهك ژی بت، خوه دی ئهجندایێ خوه یێ تایبهته، چ رۆژئاڤابت، یان دهولهتێن ئهقلیمی و ئالیێن دن بن.
ئهز دوورنابینم، ههكه رهوش هۆسا دۆم بكت، دهستههلاتا ههرێمێ ئێدی ژ قۆناغا فالنجیبوونێ ژی دهربازی قۆناغێن كامباختر ببت و ئهڤا هنده ساله هاتییه كرن جارهكادی ل چارگۆشهیێ بنی رابوهستت. هینگێ ژی، وهك كرمانج دبێژن: ((ههكه كهلهخ كهتن تهیر دزههفن)) و ژبلی پاراستنا بهرژهوهندیێن خوه یێن تایبهت، باوهرناكم چو ئالی دلۆڤانیێ ب ههرێمێ ببن. هیڤییه تنێ ئهڤ دیتنه تنێ رهشبینی و (وههمهك) كهسۆكی بت و شوونێ بلندكرنا ئالایێ كوردستانێ ببته سۆرپرایزهك دیرۆكی و هزر نهكری و پارتێن كوردستانی، چاڤلێكرنا دیمۆكراسییا رۆژئاڤا بكن رهوشهنبیرریا خوه و ناكۆكێن ب ترس د پهرلهمانێ كوردستانێ دا چاره بكن. ههلبهت پشتی ئهكتیڤ دبیت.
