كاراكرنا پهرلهمانێ كوردستانێ
د خولا چوارێ یا پهرلهمانێ كوردستانێ دا ژمارهكا ئێدیهمێن نووی هاتنه د ناڤ فهرههنگا سیاسییا كوردی دا وهكی: بنكه فراوان، قهیران، لێك ترازان، پێنچ قوَلی، دهستووردان، پارتێن فێس بووكێ و كاراكرن. ههر ئێدیهمهكێ مه رێزكری بابهتهكه لێ ل ڤێره دێ دووماهیك ئێك كهینه بابهت، ئهوژی كاراكرنا پهرلهمانێ كوردستانێ یه. یا زانایه كو دهرئهنجامێ فرههزرییا لایهنێن سیاسی و نهپێگیری ب رێككهفتنان و دوبهرهكییا پهرلهمانی ل سهر هندهك پرسێن ههستیار و هاندان بوَ توَندوتێژیێ و رێگرتن ل سهرۆكێ پهرلهمانی، وهك سهرۆكهكێ نه سهركهفتی و ئهگهرهكێ سهركی یێ تێكدانا پرنسیپا رێككهفتنێ ل دووڤ بَوچوونا پارتی، ئهڤه شهش ههیڤه پهرلهمانێ كوردستانێ یێ ژ كار كهفتی و هیچ كومبونهك نهكریه بوَ ئهنجامدانا ئهركێ خوه یێ یاسادانانێ و چاڤدێریێ. بزاڤ یێن تێنه كرن بوَ چارهسهرییا ڤێ كێشێ لێ سهر ناگرن ژ بهر هزرا ( كاراكرنێ ) ل دووڤ بوَچوونا پارتی ئانكو ههلبژارتنا دهستهیهكا نوو بو سهرۆكاتییا پهرلهمانی و هزرا (دهست ب كاربونێ) ئانكو هاتنا ههمان دهستهییا بهری ل گوَڕهی مهرجێ گۆڕانێ. ئهگهر ئهم ب زڤرین بوَ دهستپێكا كێشێ یا دیار بوو كو چوار لایهنێن سیاسی ب سهركێشییا بزاڤا گۆڕان دڤیا، ب پروژهكێ ل پهرلهمانی، سستهمێ سیاسیێ كوردستانێ و یاسا سهرۆكاتییا ههرێمێ ب گوهوَڕن بهرامبهر پارتی كو د ڤییا ب رێكهفتن ئهڤ بابهته بهێته ئێكلا كرن. لێ نه پهرلهمان شییا پروَژهی ب كهته یاسا و نه كوَمبوونێن پێنچ قوَلی شیان رێك بكهڤن، بهلكو شكهستنا وان بوَ ئهگهرێ پتر ئالوَزبوونا كێشێ و روودانێن توَندوتیژیێ ل سولهیمانیێ و ژ كاركهفتنا پهرلهمانی. د ڤان روودانان دا هندهك راستی دیار بوون، یا گرنگ ئهو بوو كو بێی پارتی پروَژه ل پهرلهمانی دهرباس نابن. ههر وهسا دیار بوو كو فراكسیوَنا ئێكگرتوییا ئیسلامی د ئێك دهنگ نینن، و ئێكهتییا نیشتیمانییا كوردستانێ نهشێت یان نهڤێت ب كهڤیته د سهنگهرێ دژی پارتی دا و پتر د بهرژهوهندییا وان دانه ببیته ناڤبژیڤان و هوَكارێ چارهسهریێ. ب دیتنا من ئهڤرو ئێكهتی یا وی روولێ د گێریت و كار دكهت بوَ دیتنا كلیلا ڤهكرنا دهرگهههكی كو ببیته رێكا چارهسهریا كێشێ ئهو ژی ب لێكنێزیكبوونا وان ل گهل پارتی و گۆڕان. ئێكهتیێ د ڤێت باوهریێ بوَ جهماوهرێ خوه چێ بكهت كو ههستكرن ب بهرپرسایهتیێ و مفا وهرگرتن ژ سهربوَرا سهرهدهریكرنا وان ل گهل پارتی د خوازیت كو نێزیكی پارتی بن. كوَمبوونێن ئێكهتی و پارتی د بهردهوامن ل سهر ئاستێن بلند، و ل گهل پارتی یا پشكداره د حوكمهتا ههرێما كوردستانێ دا و د ئێك سهنگهر دا یێ بهرهڤانیێ ژ كوردستانێ دكهن. ژ لایهكێ دیڤه پروَژهكێ ههی كو رێككهفتنهكا سیاسی د ناڤبهرا ئێكهتیێ و گۆڕان دا بهێته مووركرن. ئێكهتی د زانیت كو تاكه ههڤڕكا وێ ل سولهیمانیێ بزاڤا گۆڕانه و جهماوهرێ ههردوو لا یێ تێكههله و تێته گوهوَڕین ل سهر ههلویستان ژ بهر هندێ ئێكهتیێ د ڤێت یا هشیار بیت د ههلویست وهرگرتنێ دا. فشارا جهماوهر و لایهنگیرێن ئێكهتیێ تێته وهرگرتن د بریار دانێ دا ژ بهر هندێ یا دوو دله كو ل گهل پارتی پهرلهمانی كارا بكهن ههر وهسا، ب هزرا من، ئهو یێن گههشتینه وێ باوهریێ كو گرێیا كێشا پهرلهمانی سهرۆكێ پهرلهمانی یه لێ د ڤێت ب ژیرانه كار بكهت تاكو وێ گرێ ڤهكهت. جودا ژ پارتی و ئێكهتی، بزاڤا گۆڕان یا خوه ئاماده دكهت بوَ ههلبژارتنێن بهێت و ب وێ هزرێ سهرهدهریێ ل گهل كێشێ دكهت. وهسا دیاره كو بوَ گۆڕان یا گرنگ نینه پهرلهمان كارا ببیت یان نه، یا گرنگ ئهوه دێ چهند شێت ڤێ كێشێ ب كار ئینیت بوَ بهرفرههكرنا پێگههێ خوه یێ جهماوهری ل سهر كیستێ ئێكهتیێ و ئێكگرتویێ. ئێك ژ ئهگهرێن نهچارهسهریا كێشان ل گهل گۆڕان ئهوه كو گۆڕان سهركێشییا جهماوهرێ خوه نا كهت بهلكو پاشهكێشا جهماوهریه. بوَ خوه رزگاركرنێ ژ بهرپرسایهتیێ گۆڕان پروَژهك یێ پێشكێشێ ئێكهتیێ كری كو ههردوو فراكسیوَنێن وان ببنه ئێك د پهرلهمانیدا. وان د ڤێت ب رێكا ئێكهتیێ دوباره بێنه پهرلهمانی و ئهگهر سهرۆكێ پهرلهمانی هاته گوهوَڕین، وی دهمی بێژن گوهوَڕینا وی دهرئهنجامێ رێككهفتنا وان و ئێكهتی بوو نه داگێران بوو ژ ههلویستێ وان. ب هزرا من، ئهڤ پروَژه بتنێ بوَ كوشتنا دهمی یه و سهرناگریت ژ بهر گۆڕان د بنیات دا یا ژ ئێكهتیێ جودا بوی و سهركردێن ههر دوو لا د ئاماده نینن داگێرانێ بكهن و دوباره پێكڤه كارێ سیاسی بكهن. دیاره كاراكرنا پهرلهمانی یا گههشتییه رێكهكا گرتی و یا مهترسیدار ئهوه دهستهكی دهرهكی هاتبیته د ناڤ ڤێ كێشێ دا.
