تنهكرنا مافێن كوردا
گۆتنێن بێدهنگ
وهك كو هون ژی دزانن حوكمهتا ئاكهپێ بریارا دهستهسهركرنا ناڤچهیا ئامهدا سوورێ دا. ژ 7144 پارسێلان 6300 پارسێل دهولهت دهست دا سهر و دخوازت ل گۆر بهرژهوهندیێن خوه ب كار بینه. ب راستی ژی ئهڤ بریارا ئاكهپێ بێ واته نینه. ههم ژ بهر كو سوور بوو میراتێ جیهانێ و ئهندامێ یوَنسكۆ ههم ژی ژ بهر كو سوور ناسنامهیا كوردا یه. ئاكهپ دخوازت كو گوههرتنهك پێك بینت و ل گۆر ئارمانجێن خوه سوورێ ژ نوو دا نهخشه بكهت. ب ڤێ گوههرتنێ بیناسازیا ئوِسمانیان لێ زێده بكهت و ب ناڤێ سوورێ پرۆپاگندهیكا مهزن پێك بینت. یانی ژ بهر كو سوور ئهنداما یوَنسكۆ یه د پاشهرۆژێ دا بێژن كو ئهڤ دهره جیهێ ئوسمانیانه.
بالا خوه بدنێ كو ب ناڤچهیا سوورێ ب گشتی هاته تالان كرن و وێران كرن. ئاكهپه ب زانهبوونی د دهما شهر دا گوههرتنێن مهزن پێك ئانینه و ههتا نها یوَنسكۆ تو دهنگ نهكریه. پشتی گوههرتنێ وێ حوكمهتا ئاكهپێ بێژت كو ئهڤ دهره جیهێ میراتێ جیهانێ یه و تو كهس نكارت گوههرتنان پێك بینت. یانی ئاكهپه ل گۆر دلێ خوه گوههرتنا خوه ب داوی بكهت و سوورێ تهسلیمێ یوَنسكۆ بكهت. بفكرن كو وی دهمێ ههر گهشتیارێ كو بهێته ئامهدێ و ل ناڤ سوورێ بگهرهت وێ ب پرانی نهخشهیێ. ئوسمانیان ببینن و ئهڤ ژی سیاسهتا ئاكهپێ یه كهڤنه بۆ شونوارێن كوردستانێ.
گهلهكی بالكێشه كو رێڤهبرێن سیاسهتا كوردا پێشیا خوه نابینن و ههر وهها د ههمان دهمێ دا ژی گهلێ خوه پاشتر دمینن. ل گۆر داخوازێن سهرۆككۆمار ئهردۆگان و ههر وهها حوكمهتا ئاكهپێ، وێ د پاشهرۆژێ دا دهستهسهركرنا شارهداریان ژی پێك بهێت و مخابن وی دهمی ژی تو كهس نكارت بهرتهك نیشان بدهت. نه ب تهنێ شارهداری وێ بهێنه دهستهسهركرن، ههر وهها راگهاندنا باكوورێ كوردستان ب تهڤاهی وێ وهره دهستهسهركرن. یانی ئهو رۆژنامه و تهلهڤیزیۆنێن كو ئۆپۆزسیۆنن وێ بهێنه دهستهسهركرن و وهشانا وان دێ هێته گوههراندن. چاوا كو ژ بۆ دهستهسهركرنا ناڤچهیا سوورێ بهرتهكێن سیاسی كێم مان وێ ژ بۆ دهستهسهركرنا شارهداریا ژی كێم بمینن و ژ خوه ژ بۆ راگهاندنێ تو كهس نكارت ئێدی بهرتهك نیشان ب دهت.
ههگهر كو سیاسهتمهدار پاشهرۆژا خوه نابینن ژ بۆ چ سیاسهتێ دكن? ههگهر كو نكارن ژ بۆ گهلێ خوه ببن رێبهر، ژ بۆ چ رێیا گهل ئاستهنگ دكن? گهلێ كورد ب وه باوهر دكن و دهردكهڤن كۆلانا. گهل ژ مالێن خوه، ژ تیجارهتا خوه، ژ ژیانا خوه بوون و ژ مالباتا خوه ژی بوون! ما ئێدی گهل وێ چ بكهت? دهما ئهم ل كۆلانا شۆپاندنا نووچهیان دكن ب راستی ههر تشت ل بهر چاڤه. گهلێ كورد بهلهنگازه و مخابن بێچارهیه.
شین و شاهی تهڤلی ههڤ بوونه، روورهش و رووسپی تهڤلی ههڤ بوونه، گوڕ و پهز تهڤلی ههڤ بوونه… ژ بهر وێ گهلێ كورد ئێدی وێ ب چ و ب كی/كێ باوهر بكهت? پێوسته كو ئهڤ سیاسهتێن دژاتیا كوردا دكهن بهریا پێكانینێ بهێنه دیتن و ل ههمبهرێ وێ بهرتهك بهێنه نیشاندان. مافێن دهمۆكراتیك مافێن ههر مرۆڤهكینه و ههر مرۆڤ ل گۆر پهیمانا مافێن مرۆڤا ل ههموو جیهانێ خوهدیێ ڤان مافانه. ژ بهر وێ چما كورد ژ ڤان مافێن دهمۆكراتیك بهێنه دوورخستن و مافێن وان بهێنه بنپێكرن? بلا ههر كهس باش ل خوه بنێرت و بفكرت، گهلۆ ئهو سیاسهتا كو تێ مهشاندن ل گۆر پاراستنا مافێن گهلێ كورده ئان نا?
بهرههڤكرن: ئهڤرۆ
