تاكتیك د سیاسهتێ دا سهرناگریت
د ئهڤرۆ دا وێنه و روویێ پرۆسا سیاسی یێ ههرێما كوردستانێ یێ ب ئاشكهرایی چهقی و چكلی یه. ههروهسا بارودوخێ سیاسی یێ كوردستانێ پرت و بهلاڤبوونهكا رێژهیی ب خوه ڤه دیتی یه د ناڤبهرا لایهنێن سیاسی دا، و ئهڤ پرت و بهلاڤبوونه راستهوخۆ دێ كارتێكرنێ كهته سهر وان بۆچوون و ئاراستهیێن كو گرێدان ههیی د وارێ پرسا نهتهوهیی و نیشتیمانی ڤه. و ئهڤ چهقی و چكلینه و پرتبوونا لایهنێن سیاسی ژی ژ ئهنجامێ وێ تاكیتك و فێلبازیێ یه یا كو (نهوشێروان) د سیاسهتا خوه دا ب كار دئینیت، واته سیاسهت ژ لایێ (نهوشێروان)ی، تاكتیكه، نهكو ستراتیجیهته بهرامبهر ههڤركێن خوه و ئارمانجا تاكتیكێ یان فێلبازیێ ژی د سیاسهتێ دا ئهوه بۆ خاپاندن و سهردابرنا لایهنێ بهرامبهره و پاراستنا بهرژوهندی یا بهرتهنگ یا پارتایهتی و كهسوكی یه، یا ئاشكرایه كو بزاڤا گۆڕان شكهستن ئینا د ماوهیێ پشكداری یا وێ د دهستههلاتێ دا ب تایبهتی ل سهرۆكاتی یا پهرلهمانێ كوردستانێ.
لهورا ژی ههر زوو و ب لهز ههوارا خوه بره بهر ئێكهتی نیشتیمانی كوردستان و رێككهفتنا سیاسی ل گهل ئیمزا كر. ب بۆچوونا من ب رێكا ڤێ رێككهڤتنێ دێ نهخشه رێكهكێ دانن بۆ چاوانی یا چارهسهركرنا كێشه یێن ههلاویستی یێن ههرێما كوردستانێ ههر وهكو وان دڤێت ئهگهر بۆ وان سهر بگریت. دیسان ب من وهره وهكو ههر جار بۆ دروستكرنا بهرهیهكێ دییه بۆ تێكدانا ئارامی یا ههرێما كوردستانێ، چونكی دێ سهرگهرمیهكا دی و پشتهڤانیهكا دی دهته بزاڤا گۆڕان و دێ پتر ملێ خوه دهته بهر شهرهكێ ب وهكالهت بهرامبهر پارتی دیمۆكراتی كوردستان، گرۆڤه ژی ل سهر ڤێ بۆچوونێ ب تنێ ئامادهبوونا قونسلێ گشتی یێ دهولهتا ئیرانێ بوو ل دهمێ ئیمزاكرنا وێ رێككهفتنێ ئهو ژی بۆ ههلكرنا رۆناهیا كهسكه ب مهرهمێ بۆ بهێزكرن و پشتهڤانیكرنا بزاڤا گۆڕان ژ لایێ سیاسی و مهعنهوی و. . هتد، چونكه وان ژی د دیباجا رێككهفتنا خوه دا ئاماژه پێ كریه كو دهمێ بجهكرنێ بۆ پشتی ههلبژارتنێن (2017)ێ، هێلایه، واته ئهگهر ههیه د ناڤ هۆلا پهرلهمانێ كوردستانێ دا كو شهرێ كێمینه و زۆرینه پێ بهێته كرن بۆ گوهۆرینا سیستهمێ سیاسی ههرێما كوردستانێ، وهسا دیاره كو نوخبا سیاسی ل ههرێمێ یێ بیرێ ب دهرزیكێ بۆ ئێك و دو دكولن، و سهرهرای ڤێ چهپهربهندی یێ مللهت دێ باجا ڤان ناكۆكیان دهت، ئهگهر رێك لێ نههێته گرتن. لێ بۆ ئهڤرۆ ژینگهها سیاسی ل ههرێما كوردستانێ پێدڤی ب گوهۆرینێن ریشالی و ستراتیجیهتهكا تازه ههیه د ناڤبهرا ههموو هێز و لایهنێن كوردستانێ دا ب تایبهتی د ناڤبهرا ئێكهتی و پارتی دا، و دیسان پێدڤی یه ئێكهتی وێ رێككهفتنا د ناڤبهرا وان و بزاڤا گۆران دا ههڤسهنگ بكهت ل گهل وێ رێككهفتنا ستراتیجی یا كو ئێكهتی یێ دگهل پارتی ههیی و بۆ پاراستن و ب رێڤهبرنا سیستهمێ سیاسی ل ههرێما كوردستانێ، چونكه ئهو رێككهفتنا د ناڤبهرا ئێكهتی یێ گۆڕان دا هاتیهكرن ههر ئهو پاكێج و بۆچوونێن بهرێنه، واته یێن لایهنێن ئۆپۆزسیۆنێ نه.
سهبارهتی سیستهمێ سیاسی یێ ههرێما كوردستانێ، ئهڤه ژی ژ لایێ پارتی ڤه نهیا پهسهنده، و یا راست ئهوه كو خواندنهكا راست و دروست ههبیت بۆ ههموو هێز و لایهنێن سیاسی و نابیت هێزێن سیاسی خوه ل هیڤی یا رازیبوونا بزاڤا گۆران بگرن بۆ ههر تشتێ ئهو داخواز بكهن. رازیبوون پێدڤی یه ب رێژهیهكا بلندتر بۆ ههموو لایهنێن سیاسی یێن كوردستانێ بیت و ڤێ رازیبوونێ بكهنه بهرنامه و نهخشهرێ بۆ ریفراندومێ و پاشی بۆ راگههاندنا دهولهتێ و پشتهڤانی یا هێزا پێشمهرگهی و خزمهتكرنا خهلكێ كوردستانێ و ئاڤاكرنا وهلاتی.
