پێگهۆرێ سیاسى، یهكگرتووو وهك نموونه!
گومان تێدا نینه كو دۆزا كوردى و بزاڤێن پارتێن سیاسى ل كوردستانێ چهندین سهر نشیڤى و سهر ئهڤرازى ب خوه ڤه دیتینه و چهندین قووناغێن جودا جودا برینه و چهندین شهر و داستان و شۆرهش تۆمار كرینه بهلێ ئهڤه ههمى بێ كێماسى و خهلهتى نهبووینه و ململانیا حزبى و گهندهلى سهرهل دایه و مهترسیێن خوه بهردهوام ههبووینه!
لهورا پشتى سهرهلدانێ و ئهنجامدانا ههلبژارتنا ل كوردستانێ ل سالا 1992 و چهسپاندنا سیستهمێ فیفتى فیفتى ل ههرێمێ د ناڤبهرا پارتى و ئێكهتیێ دا، لێ ئهڤ سیستهمه ههر نهبوو رێگر كو شهر د ناڤبهرا وان دا دروست نهبیت ئهو بوو ل سالا 1993 شهرى دهست پێ كر و یهكگرتووو شیا مفایى ژ وان كاودانا وهرگریت و ژ كاركهتنا پهرلهمانى ب دهلیڤه ببینیت و خوه ل (6/2/1994) راگههینیت وهك پارتهكا سیاسى ل كوردستانێ پشتى پێگههێ خوه د ناڤ خهلكی دا بهێز ئێخستى ب رێیا كارێن خێرخوازى و ب رێیا مزگهفتان چوویه د زۆربهی مالان ڤه!
و ب ڤى رهنگى یهكگرتووو وهك پارتهكا سیاسى هاته د گۆرهپانا سیاسی دا ل ههرێمێ. و بهردهوامیا شهرى د ناڤبهرا پارتى و ئێكهتیێ دا تا گههشتیه ئاستێ ڤهقهتیانێ و دو ئیدارهیێ و شهرێ پارتى و پهكهكێ و شهرێ ئێكهتیێ و بزوتنا ئیسلامى ههمى بوونه دهلیڤه بۆ سهركردایهتیا یهكگرتووویێ كو ب رۆلێ نیوانگیرى راببیت و خوه وهك لایهنهكێ ئاشتیخواز دیار كهت و لایهنێن دى ب خرابى نیشان بدهت ئهڤه ئهگهر ئهم بزانین كو یهكگرتووو پارتهكا سیاسیه و لایهنێ چهكدار نینه و بۆ بهرژهوهندیێن خوه كار دكهت نهكو ئاینى!
بهلاڤبوونا گهندهلیێ و رهفتارێن شاش و خواندنێن خهلهت یێن پارت و لایهنێن دى بهرامبهر یهكگرتووویێ وهكر كو ههڤههستیهك بۆ خهلكى پهیدا ببیت بهرامبهر ڤێ پارتێ! چونكى جڤاكێ كوردى جڤاكهكێ خوه پارسته و دینداره ئهڤه بوو ئهگهر نێزیك بوونهكا مهزن چێ بوو د ناڤبهرا خهلكى و سهركردێن ڤێ حزبێ دا، ئهڤجا چ ب رێیا كارێن خێرێ و رێكخراوێن جڤاكێ سڤیل بیت یان گێرانا مێزگهردا و خوتبێن ئاینى و چهندین رێكێن دى! ئهڤ ههمى خاله بوونه هێز بۆ یهكگرتووو كو خوه راگریت و قووناغێن گرنگ ببریت!
پشتى رۆخیانا رژێما بهعس ل سالا 2003 و تا ئهڤرۆكه یهكگرتوو شیایه خوه دیار كهت وهك نموونهكا باش یا ئیدارهدانێ و بهشدارى زۆربهیى كابینێن حكوومهتا ههرێمێ بوویه و ههر وهسا حكوومهتا بهغدا و بهردهوام خودان ههلویست بوویه بهرامبهر دۆزا كوردى لهورا ڤێ پارتا ئیسلامى هوسا دهته دیاركرن كو چ كێشه دگهل بابهتێ نهتهوهیى نینن! و بهشداربوویهكێ چالاك و باش بوویه د حكوومهتێ دا و رۆژ بۆ رۆژێ پێگههێ ڤێ پارتێ یێ بهێز دكهڤیت تایبهت پشتى كوردستان تووشى چهندین قهیرانا بووى و ململانیا حزبى گههشتیه ئاستهكێ گهلهك مهترسیدار و گهندهلیێ ب شێوهكێ گهلهك خراب بهلاڤ بووى! یهكگرتوو شیا بێ لایهنیا خوه پارێزیت و خوه ژ ههمى تۆمهتا دووركهت د ڤان كاودانان دا و ببیته ئهگهرێ راگرتنا موعادهلا سیاسى ل ههرێمێ!
ههر چهنده گرۆپێن تیرۆرست ئهوێن ب ناڤێن ئیسلامى خوه ناڤكرین وهك قاعیده و داعش و جێش ئیسلام و چهندین گرۆپێن دى زهرهرهكا مهزن گههاندیه پارتێن ئیسلامى بهلێ دیسا ئهڤ پارته شیایه خوه راگریت و دژایهتیا خوه بۆ فكرا ڤان گرۆپا راگههاند!! چونكى پشتهڤانیهكا مهزن ژ دهرڤه یا بۆ ههی! و بێ دهنگیا یهكگرتوویێ د ڤان كاودانان دا رامانا وێ چهندێ دهت كو خهلك گهلهك بێ زار بوویه ژ كار و رهفتارین پارتێن دى یێن كوردى و ئهو ئێمناهى و بارودوخێ ل ههرێمێ ههی و مژویلبوونا پارتى ب شهرێ داعش و كێشن ناڤخۆیی و ههرێمى ڤه بووینه فاكتهرێن بهێز كو ئهڤ حزبه ب نهێنى كار بكهت تایبهت پشتى پارتى ئهو كریه شریكێ خوه د ئیدارهدانا پاریزگهها دهۆكێ دا! و دبینیت ل پاشه رۆژێ پێگهۆرێ سیاسى بۆ ڤان پارتا ل دهڤهرێ د ئهو بیت چونكى باش دزانیت دهنگدان د سهنگێ سیاسى دا دیار كهن نهكو مێژوو و خهبات! و ئهڤه ژى بۆ لاوازیا هزرا خهلكى دزڤریت!
لهورا سهركردایهتیا یهكگرتوو یا كار دكهت كو ل پاشهرۆژهكا نێزیك ببیته پێگهۆرێ سیاسى بۆ هندهك پارتێن سیاسى وهك گۆران كو ل دویف ههمى پیڤهرا پرۆژهكێ سیاسى یێ خراب بوو و ههر زوو دێ شكهستنێ ئینیت! و ل ڤێ دووماهیێ ئێكهتى ژى گههشیه ئاستهكێ زۆرێ لاواز پشتى تووشى چهندین قهیرانێن ناڤخۆیی بووى! بهلێ ئایا یهكگرتوو دێ بیته پێگهۆرهكێ سیاسى یێ باش ل ههرێمێ؟ ههلبژارتنێن داهاتى دێ دیار كهن كا پرۆژێ ڤێ پارتێ چهند یێ دروست و بهێزه كو ببیته پێگهۆرێ سیاسى!.
