هندهك پرسیار پێدڤى بهرسڤانه!!
پشتى ههلبژارتنێن سالا 1992 ههرێما كوردستانێ هاته دامهزراندن و پێناسهكرن وهك ههرێمهك د چارچوڤێ عیراقێ دا و بووینه خودان پهرلهمان و حكوومهت و دهزگایێن میرى و راگههاندنێ و خهلكى باوهریهكا تمام دایێ و پشتى وان ههمى كارهسات و ئهنفال و دهربهدهریێ و خر هیڤى و ئومێدێن خوه ل سهر دهزگایێن ڤێ ههرێمێ داناین! بهلێ مخابن ئهوا وان چاڤهرێ دكر كو بۆ بێته كرن تا نوكه نههاتیه كرن و ئهو خزمهتا هاتیه كرن چ بهراورد نینه دگهل وان قوربانیا ئهوێن هاتینه دان!
ئهگهر ئهم ب هوورى سهحكهینه بارودوخێ نوكه یێ كوردستان تێدا دبۆریت گهلهك پرسیار بهروكا مرۆڤى دگرن و داخوازا بهرسڤان دكهن! یا ژ ههمیێ گرنكتر ئهرێ ئهڤ شۆرهش و قوربانیدانه بۆ چ هاتینه كرن و دان؟! ئهگهر بۆ كوردستانێ بووینه ئهرێ ئهڤه چ بارودوخه كهتینه تێدا!؟ ئهگهر بۆ دهستڤهئینانا بهرژهوهندیێن تاكهكهسى و حزبینه فهره ڤێ چهندێ بۆ خهلكى دیار كهن و زێدهتر نهخاپینن!.
تشتێ سرنجراكێش ئهوه زۆربهیا حزبان ناڤێ كوردستانێ پێڤهیه، بهلێ ب هیچ رهنگهكى نهخزمهتا كوردستانێ كریه و نه یا دۆزا كوردى، بهلكو هاتیه دروستكرن بۆ مهرهمهكا تایبهت و دومدرێژ! لهورا خهلك مهندههوش مایه ئهگهر تو كورد بى و بۆ خزمهتا كوردستانێ دروست بووى ئهڤه چ پیلانگێرى و تێكدانه دكهی؟!!.
بهرامبهر وێ حكوومهت بۆ خزمهتكرنا خهلكى دئێته دامهزراندن، بهلێ دیار بوو كو خهلك بوویه قوربانى بهرژهوهندیێن حزبى و تاكهكهسى و ههر حزبهكێ لیستێن خوه یێن تایبهت ههنه یێن خانهنشینا و پلێن رێڤهبهرێن گشتى و پێههل! ئهگهر مهرهما حزبا دابینكرنا بهرژهوهندیا بیت و ل سهر كیستێ خهلكى و دۆزا كوردى فهره خهلكى بهرسڤ بۆ ههبیت! ئهڤه ژ لایهكى ڤه و ژ لایهكێ دی ڤه خهلك حێبهتى مایه بۆ حكوومهت خوه ل پلان و نهخشێن خوه ناكهته خودان و بهردهوام زێدهگاڤى ل سهر مالێ گشتى دئێنه كرن، ئهرێ ماستهرپلان و نهخشێن باژێران ب پارهكێ ئێكجار مهزن بۆ چ دئێنه دانان؟ و ل دووماهیێ كهسهك یان لیژنهك ب كهیفا خوه دهستكاریێ تێدا بكهت و ل دووڤ بهرژهوهندیێن هندهكا بگهۆریت! ئهرێ راسته حكوومهتێ چ پلانێن ستراتیژى بۆ چ كهرتا نینن تایبهت خواندنێ و چاندنێ و ساخلهمیێ و گهشت و گوزار و باجه و وهبهرهێنانێ؟! ئهرێ راسته حكوومهتێ چ بهرنامه بۆ دابینكرنا خزمهتگوزاریا ب شێوهكێ باش نینن!! ئانكو داخوازیێن خهلكى دگرنگ نینن ل دهف دهستههلاتێ!.
بهرهنگاربوونا راستیا د دهرگههێ چارهسهریێ دا بۆ زۆربهیى كێشا ڤهكهت و ب سهناهى حكوومهت و ب هاریكاریا خهلكى ل سهر كێشا و قهیرانان زال دبیت!! بهلێ ڤهشارتنا راستیا و خاپاندنا خهلكى و كوشتنا وهختى ڤالاتیهكا مهزن د ناڤبهرا خهلكى و دهستههلاتێ دا دروست كریه! نه حكوومهت ب دروستى خوه ل كێشه و قهیرانان دكهته خودان و نه خهلكى ئێدى باوهرى ب چارهسهرى و سۆزێن حكوومهتێ مایه!.
بهلێ پرسیارا ژ ههمیا گرنكتر ئهوه كو خهلك بهردهوام دكهت و حێبهتى مایى رۆلێ عهشیرهتگیریێ و ئاغایه! بۆچی دووباره رۆلێ ڤان ب هێز كهفت و كونترۆلا جڤاكى كر؟! ئهرێ پشتى ئهنفالا و سهرهلدانێ كێ رۆل دا ڤانا و كرنه بالادهست و خودان دهستههلات ڤه ل كوردستانێ؟! ئهرێ حزب و حكوومهت دزانن نوكه جڤاكێ كوردى بوویه جڤاكهكێ تهخ تهخى و ب ئاشكرایى ب ڤى رهنگى رهفتارا دئێتهكرن؟! ئهرێ بۆچی جاش بووینه خودان مووچه؟ ئهرێ بۆچی دز و بێ رهوشت بووینه زیندانیێن سیاسى؟! ئهرێ كورێ ئاغایهكى و جاشهكى ل بهروكێن شهرى ههیه؟! ئهرێ بۆچی بازرگان و وهبهرهێنهر و خودان كۆمپانی ب دروستى خزمهتا كوردستانێ ناكهن و ب تنێ خزمهتا بهرژهوهندیێن خوه دكهن و ل سهر كیستێ خهلكى و حكوومهتێ؟!! ئهڤه و چهندین پرسیارێن دى پێدڤى بهرسڤانه، بهلێ كا بهرسڤ؟!.
ئهرێ پارتى و شۆرهشگێر و رابهرێن شۆرهش و سهرهلدانا كو مالا بارزانه دحازرن خهباتا 70 سالا و قوربانیدانا خهلكى و پرۆژێ سهربخۆیێ گورى پیلانێن هندهك لایهن و كهسێن گهندهل و خراب بكهت؟!! ب دیتنا من ل وى دهمێ شۆرهشگێر و جاش پێكڤه بووینه دهستههلات، كوردستان تووشى ڤان ههمى قهیرانا بوویه، چونكى نهشۆرهشگێران دهستكهفت پاراستن و نه جاشا جاشاتى هێلا!.
