ده‌رگه‌هێ بازرگانى یێ ته‌ویله شۆشمێ دێ جموجۆلا بازرگانى زێده كه‌ت
ئه‌ڤرۆ نیۆز،عه‌زیز ره‌سۆل هه‌ورامانى:
ده‌رگه‌هێ ته‌ویله شۆشمێ دكه‌ڤیته سنۆرێ هه‌له‌بجه،كو تاكه ده‌رگه‌هێ فه‌رمیه ل ڤى سنۆرى سه‌ربارى هندێ كو چه‌ند ده‌رگه‌هێن دى یێن نه سه‌ره‌كى ژى هه‌نه،رێڤه‌به‌رێ ناحیا بیاره ئاماژێ ب هندێ دده‌ت كو د نوكه‌دا جموجولا بازرگانى ل ڤى ده‌رگه‌هى زێده‌بوویه.
حه‌مید بارام رێڤه‌به‌رێ ناحیا بیاره بۆ ئه‌ڤرۆ نیۆز دیاركر:ئینان و برنا كه‌لوپه‌لا دناڤبه‌را هه‌رێما كوردستانێ و ئیرانێ دا ب رێژه‌یه‌كا به‌رچاڤ زێده بوویه ل ده‌رگه‌هێ شۆشمێ ته‌ویله،ل چاڤ هه‌یڤێن به‌رى نوكه‌دا و ئه‌م وه‌ك به‌رپرسێن ڤێ ده‌ڤه‌رێ مه هه‌موو هه‌ما هه‌نگى ل گه‌ل به‌رپرسێن ئیرانى هه‌یه بۆ زێده‌كرن و په‌ره‌پێدانا بازرگانى.
ئه‌وژى گۆتیه:زێده‌كرنا جموجۆلا بازرگانى ل ده‌رگه‌هێ ته‌ویله شۆشمێ،ده‌لیڤێن كارى ژى بۆ وه‌لاتایێن ده‌ڤه‌رێ زێده كریه و ئه‌م دێ هه‌موو كار ئاسانیا كه‌ین بۆ زێده‌كرنا جۆله‌یا بازرگانى ل سنۆرێ مه.
رێڤه‌به‌رێ ناحیا بیاره گۆتیه ژى:مه داخواز ژ حوكمه‌تا هه‌رێما كوردستانێ كریه ب زووترین ده‌م،هه‌ولبده‌ن ل گه‌ل به‌رپرسێن ئیرانێ كو ده‌رگه‌هێ شۆشمه ته‌ویله بكه‌نه نێڤده‌وله‌تى،كو ڤێ چه‌ندێ دێ مفایه‌كێ باش هه‌بیت بۆ ده‌ڤه‌را مه و هه‌موو كوردستانێ.
ناحیا بیاره سه‌ر ب پارێزگه‌ها هه‌له‌بجه ڤه‌یه و ده‌ڤه‌ره‌كا بازرگانى و گه‌شتیارى یه.
