توركیا دێ هێزەکا سه‌ربازی ڤرێکەتە قه‌ته‌ر
ئەڤرۆ نیۆز،زنار تۆڤی:
دڤێ حەفتیێ دا په‌رله‌مانێ توركیا دێ کۆمبوونەکا تایبه‌ت ئەنجامدەت بۆ ده‌نگدانێ ل سه‌ر هنارتنا هێزێن سه‌ربازی بۆ وەلاتێ قه‌ته‌ر.
وەسا بریار بوو ل دوماهیا ڤێ هەیڤێ په‌رله‌مانێ توركیا كۆمبوونەکا تایبه‌ت ساز بكەت بۆ ده‌نگدان ل سه‌ر هنارتنا هێزەکا سه‌ربازی یا سوپایێ توركیا کو دێ هژمارا وان 5 هزار سه‌ربازبن بۆ قه‌ته‌ر ب مه‌رەما بنەجهکرنا وێ هێزێ ل بنگەهێ سه‌ربازی كو توركیا ب خوە ل وی وەلاتی دا دامه‌زراندیە، به‌لێ ب ئەگەرێ پێشهاتێن بلەز یێن رۆژهه‌ڵاتا ناڤین و برینا په‌یوه‌ندیێن چه‌ند وەلاتێن عه‌ره‌بی ل گه‌ل قه‌ته‌ر،حوكمه‌تا توركیا بریاردا دڤێ حەفتیێ دا ده‌نگدان بهێتەکرن بۆ هنارتنا هێزەکا جهگیر ل وی وەلاتی دا.
ره‌جه‌ب ته‌یب ئه‌ردۆغان سه‌رۆکكۆمارێ توركیا شه‌ڤا سێشه‌مبی 6 خزیرانێ گوتارەک پێشکێشکر و گۆت برینا په‌یوه‌ندیێن چه‌ند وەلاتێن عه‌ره‌بی ل دژی قه‌ته‌رێ ب بریارەکا نە ساخلەم دانیاسین و جه‌خت ل هندێ کر کو ئەو دێ زێدەتر گرنگیێ ب په‌یوه‌ندیێن خوە ل گه‌ل قه‌ته‌رێ دەن و دێ پشتەڤانیێ لێ ده‌كه‌ن.
ماوێ سال و نیڤایە توركیا مژوولی دروستكرنا بنگەهەکێ سه‌ربازی بوو بۆ 5 هزار سه‌ربازان ل قه‌ته‌ر و هەیڤا بوری ئەو بنگەهە هاتیە دامه‌زراندن و بتنێ 200 ئه‌فسه‌ر و سه‌ربازێن شاره‌زا تێدا هاتینە جهگیرکرن،ئەڤ بنگەهێ سه‌ربازی نوکە د ئاماده‌باشیێ دایە بۆ پێشەوازیكرنێ ل 5 هزار سه‌ربازان.
ئێک ژ ئه‌ركێن سه‌ره‌کی یێ ڤی بنگەهی ئەوە،کو دێ مه‌شق و راهێنانان ب هێزێن ئه‌منی یێن قه‌ته‌رێ کەت.
