پێدڤیه قوتابى ل ده‌مێ تاقیكرنان ئه‌ڤان خالان ل به‌رچاڤ وه‌ربگرن
ئه‌ڤرۆ نیۆز،زنار تۆڤى:
ل ده‌مێ ئه‌نجامدانا تاقیكرنان ترس و دو دلى ل ده‌ف قوتابیان په‌یدا دبیت،هه‌روه‌سا پرانیا قوتابیان گه‌له‌ك خوه ژ تاقیكرنان دترسینن،له‌ورا یا گرنگه كو قوتابى ل دووڤ خشته‌یه‌كێ تایبه‌ت بچن،ژ پێخه‌مه‌ت بشێن تاقیكرنێن خوه ب ره‌نگه‌كێ سه‌ركه‌فتى ئه‌نجام بده‌ن و بشێن نمرێن باش ب ده‌ست خوه‌ڤه بینن.
عه‌بدولجه‌بار عه‌بدولره‌حمان شاره‌زا و ڤه‌كۆله‌رێ جڤاكى یه بۆ ئه‌ڤرۆ نیۆز دبێژیت:ده‌مێ قوتابى دچیته قوتابخانێ پێدڤیه به‌رى تاقیكرنان ب نیڤ ده‌مژمێرێ ئێكجارى نه‌خوینیت،داكو مێشكێ وى نیڤ ده‌مژمێرێ بێهنا خوه ڤه‌كه‌ت د تاقیكرنان دا،هه‌روه‌سا دا بیرا وى ل وان تشتێن وى به‌رى هنگێ خواندین بهێت،دیسا ده‌مێ قوتابى دچیته تاقیكرنان بلا زوو ل جهێ تاقیكرنان ئاماده‌بیت،داكو بزانیت كانێ وى تاقیكرنا چ بابه‌ت هه‌یه،هه‌روه‌سا به‌رى ئه‌نجامدانا تاقیكرنان ژى پێدڤیه قوتابى 20_30 خۆله‌كان به‌رهه‌ڤ ب ببیت،داكو چ دو دلى ل ده‌ف نه‌مینیت،هێشتا دبێژیت:ده‌مێ قوتابى دروونیته خوار ل سه‌ر كورسیكى ژى،بلا هه‌ول بده‌ت گه‌له‌ك مورتاح بیت و نه ترسیت،چونكى ترسا زێده تشتان ژ بیرا مرۆڤى دبه‌ت و هزرا مرۆڤى به‌لاڤه دكه‌ت،دیسا ده‌مێ قوتابى به‌رسڤا پرسیاران دده‌ت،ل ده‌ستپێكێ بلا ژ پرسیارا ساناهى ده‌ست پێبكه‌ت و ل دوماهیێ ژى بلا به‌رسڤێ ل سه‌ر پرسیارا ب زه‌حمه‌ت بده‌ت،ئه‌و ژى گۆت:دڤێت قوتابى زوو ژ ئه‌زموونان ده‌رنه‌كه‌ڤیت و گه‌له‌ك جارا به‌رسڤا بخوینیت و بیرا خوه بینیت،چونكى هه‌ر نمره‌یه‌ك بۆ وى ب گه‌له‌كێ یه و دێ چاره‌نڤیسێ وى دیاركه‌ت،هه‌روه‌سا هه‌كه قوتابى ل ئه‌زموونه‌كێ به‌رسڤ نه‌دا بلا گێولێ وى ژ تاقیكرنان دى نه‌شكێت،به‌لكو باشتر بخوینیت بۆ رۆژا پاشتر،هه‌روه‌سا ل ده‌مێ خواندنێ ژى باشتره قوتابى بێهنا خوه ڤه‌كه‌ت و هه‌ر ل ده‌مژمێره‌كا خواندنێ دا پێدڤیه ماوێ(10_15) خۆله‌كان قوتابى بێهنا خوه ڤه‌كه‌ت و فێقى و شه‌ربه‌تێ و شیرى د به‌را ب خۆت،هه‌روه‌سا یا گرنگ ئه‌وه كو قوتابى خوه بهێلیته ب هیڤیا خوه‌ڤه و بلا قوتابى باوه‌رى ب خوه هه‌بیت،هه‌روه‌سا پێدڤیه هه‌ر قوتابیه‌ك پشت به‌ستنێ ل سه‌ر خوه بكه‌ت و تشتان ژ هه‌ڤالێ خوه وه‌رنه‌گریت،له‌ورا دبیت ئه‌وا ته نڤێسى یا دروست بیت و یا هه‌ڤالێ ته یا خه‌له‌ت بیت،ڤه‌كۆله‌ر و شاره‌زایێ جڤاكى ئه‌و ژى دیاركر:خالا گرنگ ئه‌وه كو ئه‌و تشتێ قوتابى هه‌لدبژێریت د تاقیكرنان دا بلا باش دیاربكه‌ت،بلا رێنڤیسا وى ژى یا باش بیت،ژ پێخه‌مه‌ت نمرێن باش بۆ قوتابى بهێن،چونكى رێنڤیسێ ژى گه‌له‌ك گرنگیا خوه هه‌یه د تاقیكرنان دا،هه‌روه‌سا هه‌ر ده‌مێ قوتابیه‌كێ گێولێ وى ل خواندنێ نه‌دا،بلا ژیانا قوتابیێن زانكۆیێ بینیته بیرا خوه و بلا بێژیته هه‌ڤاله‌كێ خوه یێ ل زانكۆیێ كو به‌حسێ ژیانا زانكۆیێ بۆ وى بكه‌ت،داكو ئه‌ڤه ب بیته پالده‌ره‌ك بۆ وى و ئه‌و ژى باشتر ب خوینیت.
