خەلک حەز ناکەن بۆ خوە سترانبێژێن کچ ب خوازن
ئه‌ڤرۆ نیۆز،زنار تۆڤى:
خانما سترانبێژ میدیا حه‌سۆ د دیداره‌كێ دا بۆ ئه‌ڤرۆ نیۆز دیاركر:ژ بلى كارێ سترانگۆتنێ من كارێ ئه‌كته‌ریێ ژى كریه و هه‌روه‌سا من پشكدارى د فلمێ سینه‌مایى یێ بناڤێ”جهنه‌ما سار” دا كریه،كو ئه‌ڤ فلمه ژلایێ ده‌رهێنه‌ره‌كا ژن یا رۆژئاڤایێ كودستانێ یا بناڤێ “نه‌سرین عابدین” ڤه ل پارێزگه‌ها دهوكێ هاتیه به‌رهه‌مئینان و د ئه‌ڤ ساله‌دا ئه‌ڤ فلمه دێ هێته نمایشكرن،هه‌روه‌سا من پشكدارى د فلمێ سینه‌مایى یێ”ره‌شه‌با” ژى دا كریه كو ژ ده‌رهێنانا حسێن حه‌سه‌ن یه،دیسا وه‌ك ئه‌كته‌ر من پشكدارى د فلمێ سینه‌مایى “ئه‌و ئه‌مریكیێ من نه كوشتى” دا كریه كو ژ ده‌رهێنانا جوان بامه‌رنییه و ئه‌ڤ فلمه ژى هێشتا نه‌هاتیه نمایشكرن،میدیایێ ده‌رباره‌ى ژیانا خوه یا تایبه‌ت ژى گۆت:ئه‌ز حه‌ز دكه‌م كو ئه‌و كه‌سێ ئه‌ز شوو پێ دكه‌م هونه‌رمه‌ند بیت،لێ نه‌مه‌رجه سترانبێژ بیت،لێ دڤێت د واره‌كێ هونه‌رى دا كار بكه‌ت و ره‌وشه‌نبیریه‌كا هونه‌رى ژى هه‌بیت،داكو ب شێین ل گه‌ل ئێك ب گونجین،هه‌روه‌سا نه مه‌رجه ئه‌و كه‌س یێ زه‌نگین بیت،لێ بتنێ خودان دله‌كێ پاقژ بیت و دیاركر ژى:نوكه ژى گه‌له‌ك جاران ئاسته‌نگ بۆ كچێن هونه‌رمه‌ند چێدبن،ب تایبه‌تى هه‌كه یا سترانبێژ بیت،چونكى جڤاكێ مه هێشتا ب چاڤه‌كێ كێم ته‌ماشه‌ى كچێن سترانبێژ دكه‌ن و زوو ب زوو خه‌لك حه‌ز ناكه‌ن بۆ خوه ب خوازن،ئه‌ڤ چه‌نده ب سه‌رێ من ب خوه هاتیه،دیسا نوكه هێشتا گه‌له‌ك ژ كوران گوهداریا دایك و بابێن خوه دكه‌ن،د بابه‌تێ پێكئینانا خێزانێ دا و هێشتا گه‌نجێ مه دناڤ جڤاكى دا نه‌بوویه خودان بریار،هه‌روه‌سا من ئه‌ڤینیا خوه ژى گورى سترانگۆتنێ كریه،لێ چ جاران ئه‌ز سترانان ناهێلم،هه‌ر چه‌نده نوكه هونه‌رى و سترانێ ژى چ بوهایێ خوه نینه.
میدیایێ گۆت ژى:هه‌تاكو نوكه من چار ستران و كلیپه‌ك هه‌نه،لێ من نه‌ڤێت ب رێیا سپۆنسه‌ران كلیپا چێكه‌م،چونكى گه‌له‌ك جاران سپۆنسه‌ر مه‌رجان د داننه به‌ر مرۆڤى،له‌ورا من نه‌ڤێت خوه پێدڤى وان بكه‌م،دیسا ب رێیا رۆژناما ئه‌ڤرۆ دخوازم كو ده‌زگه‌هێن راگه‌هاندنێ پتر پووته‌ى بده‌نه هونه‌رمه‌ندێن رۆژئاڤا،هێشتا دبێژیت:ئه‌ز د گۆتنا سترانێ دا سه‌ركه‌فتى ترم و ئه‌ز دشێم ب رێیا سترانێ پتر په‌یاما خوه ب گه‌هینم،هه‌ر چه‌نده من كارێ ئه‌كته‌ریێ ژى كریه،لێ ئه‌ز حه‌ز دكه‌م د سترانێ دا خوه ل ئێش و ئازارێن خه‌لكێ بكه‌مه خودان،هه‌روه‌سا هه‌تاكو نوكه من هه‌موو مه‌زاختنێن خوه ژ به‌ریكا خوه داینه،هه‌ر چه‌نده چ جاران نه‌شێم ب هیڤیا هونه‌رى ڤه بژیم،لێ ژ جاران ده‌ستان ژى ژێ به‌رناده‌م.
