ژ سترانگۆتنێ به‌ره‌ف ئه‌كته‌ریێ ڤه چوویه
ئه‌ڤرۆ نیۆز،زنار تۆڤى:
خانما سترانبێژ مهاباد ئیبراهیم د دیداره‌كێ دا بۆ ئه‌ڤرۆ نیۆز دیاركر:ئه‌ڤه ماوه‌یه‌كه من ده‌ست ب كارێ ئه‌كته‌ریێ كرى،هه‌ر چه‌نده هه‌ر ژ زارۆكینیا خوه من حه‌ز دكر كو ئه‌ز پشكداریێ د كارێن درامایى دا بكه‌م،له‌ورا ده‌مێ ئه‌ز ب ئێكجارى ڤه‌گه‌ریایمه كوردستانێ و ل دهوكێ بنه‌جه بوویم،من پشكدارى د هنده‌ك درامایێن كۆمێدى دا كریه ل گه‌ل چه‌ندین ئه‌كته‌رێن خۆدان شیان ل دهوكێ،هه‌روه‌سا بۆ جه‌ژنا ره‌مه‌زانێ ژى مه سێ درامایێن كۆمێدى به‌رهه‌ڤكرینه و بۆ جارا ئێكێ یه ئه‌ز پشكداریێ وه‌كو ئه‌كته‌ر د درامایێ دا دكه‌م و ئه‌ز گه‌له‌كا كه‌یف خۆشم ب وان رۆلێن من د وان درامایێن كۆمێدى دا گێراین و پتر من ڤیایه رۆلێ دایكێ د وان درامایان دا ب گێرم و گۆت ژى:ئه‌ز گه‌له‌ك حه‌ز ژ كارێن كۆمێدى دكه‌م و خێزانا مه ژى گه‌له‌ك حه‌ز ژ ڤى جۆرێ هونه‌رى دكه‌ن و هه‌روه‌سا هه‌كه ده‌لیڤه هه‌بیت،من ل به‌ره ئه‌ز پشكداریێ ل فلمێن سینه‌مایى دا بكه‌م و دیسا نوكه ئه‌ز وه‌ك ئه‌كته‌ره‌ك ل گه‌ل ده‌رهێنه‌ر فه‌یسه‌ل ئه‌رتۆشى ژى كار دكه‌م و كو مه 30 زنجیرێن درامایى به‌رهه‌ڤكرینه و من د وان زنجیره‌یان ژى دا رۆلێ دایكێ گێرایه،مهابادێ ئه‌و چه‌ند ژى دیاركر:هه‌تاكو نوكه من 6 ئه‌لبۆمێن سترانا چێكرینه و هه‌روه‌سا من 10 كلیپ ژى هه‌نه و دیسا نوكه ژى ئه‌ز یا كار ل سه‌ر دو به‌رهه‌مان دكه‌م،كو سترانه‌ك ژ وان ل سه‌ر پێشمه‌رگه‌یێ كوردستانێ یه و سترانا دى ژى یا ئه‌ڤینى یه،پشتى جه‌ژنا ره‌مه‌زانێ دێ وان هه‌ردو سترانان ژى كلیپ كه‌م،هه‌روه‌سا من ل به‌ره هنده‌ك سترانێن خوه یێن ئه‌لبۆما 2008 ژى كلیپ بكه‌م،ئه‌و ژى دیاركر:ئه‌ز د وارێ سترانگۆتنێ دا یا سه‌ركه‌فتى ترم،چونكى هه‌ر ژ سالا 1981 من ده‌ست ب سترانگۆتنێ كریه و هه‌تاكو نوكه ژى یا به‌رده‌وامم ل سه‌ر ڤى كارى،هه‌روه‌سا پتریا ئاوازێن سترانێن خوه من ب خوه داناینه و ئه‌ز ئامیرێ گیتارێ ژى دژه‌نم،دیسا بۆ ماوێ 39 سالان ئه‌ز ل وه‌لاتێ ئه‌مریكا د ژیام،لێ ئه‌ڤه ماوێ 2 سال و سێ هه‌یڤانه ئه‌ز ب ئێكجارى ڤه‌گه‌ریایمه كوردستانێ و نوكه ل دهوكێ دژیم و ئێدى ئه‌ز دێ ژیانا خوه دناڤا وه‌لات و كه‌س و كارێن خوه دا بورینم و ناچمه ئه‌مریكا ڤه.
