رێڤه‌به‌رێ سایلۆیا زاخۆ:ئه‌ڤ ساله ئه‌م دێ 21 هزار ته‌نێن گه‌نمى وه‌رگرین
ئه‌ڤرۆ نیۆز،زنار تۆڤى:
رێڤه‌به‌رێ سایلۆیا زاخۆ ئه‌ندازیار سه‌ربه‌ست عه‌بدولستار موسا د دیداره‌كێ دا بۆ ئه‌ڤرۆ نیۆز دا دیاركرن:كو رێڤه‌به‌ریا چاندنێ ل زاخۆ ته‌خمین كریه كو ئه‌ڤ ساله دێ به‌رهه‌مێ هاتنا گه‌نمى ل زاخۆ 42 هزار ته‌ن بن،لێ حوكمه‌تا عێراقێ ئه‌ڤ ساله ره‌زامه‌ندى ل سه‌ر 21 هزار ته‌نێن گه‌نمى كریه و بتنێ ئه‌م دشێین ڤێ رێژا گه‌نمى ژ جۆتیارێن ڤێ ده‌ڤه‌رێ وه‌ربگرین،هه‌روه‌سا سایلۆیا زاخۆ دشێت 30 هزار ته‌نێن گه‌نمى وه‌ربگریت،دیسا ل سالا بورى ژى مه 33 هزار ته‌نێن گه‌نمى وه‌رگرتبوون،لێ ئه‌ڤ ساله حوكمه‌تا عێراقێ رێژه‌یا مه كێم كریه و ئه‌م نه‌شێن ژ وێ رێژا وان دیاركرى زێده‌تر وه‌ربگرین،لێ هه‌كه وان گوهۆرین تێدا كر ئه‌م دێ شێین هنگێ رێژه‌یه‌كا زێده‌تر ژ ئه‌ڤا هاتیه ده‌ست نیشانكرن وه‌رگرین،ناڤهاتى دیاركر ژى:جۆتیارێن زاخۆ گازندێ دكه‌ن و دبێژن ئه‌ڤ ساله گه‌نمێ مه دێ مینیته ل ئه‌ردى،چونكى ئه‌ڤ رێژا هاتیه دیاركرن گه‌له‌كا كێمه و گه‌نمێ مه گه‌له‌ك ژڤێ رێژێ پتره،لێ یا ل سه‌ر مه پێدڤى ئه‌وه كو ئه‌م 21 هزار ته‌نان ژ جۆتیاران بكرین و ئه‌و گه‌نمێ زێده دبیت ژى ئه‌م نه‌شێین چ چاره‌یان بۆ ب بینین،هه‌روه‌سا گۆت ژى:ئه‌ڤ ساله ئێك ته‌نا گه‌نمێ پله ئێك ب 560 هزار دیناران دهێته كرین و گه‌نمێ پله دو ب 480 هزار دیناران دهێته كرین و گه‌نمێ پله سێ ژى ب 420 هزار دیناران دهێته كرین و ئه‌م هه‌ر سێ جۆرێن گه‌نمى وه‌ردگرین،لێ ئه‌ڤ ساله به‌رهه‌مێ گه‌نمێ جۆتیاران ل ڤێ ده‌ڤه‌رێ پله ئێكه،هه‌ر چه‌نده سالا بورى بهایێ كرینا ئێك ته‌نا گه‌نمى پتر بوو،دیسا رێژا وه‌رگرتنا گه‌نمى ژى بۆ سایلۆیا زاخۆ یا زێده‌تر بوو،زێده‌تر گۆت:هێشتا چارێكه‌كا پارێ جۆتیاران یێ سالا 2014 یێ مایى و حوكمه‌تا عێراقێ بۆ وان نه مه‌زاختیه،هه‌روه‌سا بۆ سالا 2015 جۆتیاران نیڤه‌كا پارێ خوه یێ وه‌رگرتى و نیڤه‌ك ژى یێ مایى،دیسا بۆ سالا 2016 جۆتیاران 38% پارێ گه‌نمى وه‌رگرتیه و یێدى هه‌موو یێ مایى و حوكمه‌تا عێراقێ هه‌تاكو نوكه بۆ نه مه‌زاختیه.
