جوانى مه‌رجه‌كه بۆ سه‌ركه‌فتنا كچا سترانبێژ
ئه‌ڤرۆ نیۆز،زنار تۆڤى:
خانما سترانبێژ رۆژبین كزل كو هه‌تاكو نوكه سێ كلیپ چێكرینه و هه‌روه‌سا حه‌ز دكه‌ت سه‌ره‌دانا هه‌ر چار پارچێن كوردستانێ بكه‌ت و ئاهه‌نگێن سه‌ركه‌فتنێ لێ بگێریت،د هه‌ڤپه‌یڤینه‌كێ دا بۆ ئه‌ڤرۆ نیۆز دیاركر:هه‌تاكو نوكه من هزر د چێكرنا سترانا دوێت دا نه‌كریه و د نوكه‌دا من ل به‌ر نینه چ سترانێن ب ڤى ره‌نگى بێژم،له‌ورا بتنێ نوكه هزرا من هه‌موو ل سه‌ر خواندنا من و هونه‌رێ منه و هه‌روه‌سا ئه‌ز 17 سالیمه و وانه‌یێن هونه‌رى و مۆزیكێ دخوینم،له‌وما من هزر نه‌كریه نوكه شوو بكه‌م،دیسا ئه‌ز دخوازم خواندنا خوه ل زانكۆیێ د وارێ مۆزیكێ دا ب دوماهى بینم،ژ پێخه‌مه‌ت ب شێم كارێن باشتر دڤى وارى دا پێشكێشى گه‌لێ خوه بكه‌م.
رۆژبینێ دیاركر ژى:ئه‌ز گه‌له‌ك حه‌ز دكه‌م ئه‌لبۆمه‌كێ چێكه‌م و من به‌رهه‌ڤى ژى كرینه،كو ئه‌ز ئه‌لبۆمه‌كا”9-10″ تراكى چێكه‌م،لێ هه‌كه سپۆنسه‌ر هه‌بیت،دێ ئه‌ڤ ساله ئه‌لبۆما خوه یا نه‌خرى چێكه‌م،هه‌ر چه‌نده بۆ چێكرنا ئه‌لبۆمان گه‌له‌ك مه‌زاختن دڤێت و نوكه من ئه‌و شیان ل به‌ر ده‌ست نینن،ئه‌و ژى گۆت:ئه‌ز حه‌ز دكه‌م ب ستایلێن جۆدا دناڤا كلیپێ دا ده‌ربكه‌ڤم،لێ پێدڤیه كلیپ ژى گرێدایى په‌یڤێن هه‌لبه‌ستێ بیت،هه‌روه‌سا نوكه رێیه‌كا درێژ ل به‌ر سنگێ من هه‌یه و من هیڤى هه‌یه كو ئه‌ز ب گه‌همه ئاسته‌كێ باش دناڤ هونه‌ر و سترانا كوردى دا.
هه‌روه‌سا حه‌زا من ئه‌وه كو ئه‌ز هونه‌رێ كوردى بۆ جیهانێ ژى ب ده‌مه نیاسین،هێشتا دبێژیت:جوانى ژى مه‌رجه‌كه بۆ كچا سترانبێژ،ژ پێخه‌مه‌ت كچ ب شێت باشتر هونه‌رێ خوه ب گه‌هینیته خه‌لكێ،ئه‌ڤ چه‌نده ده‌لیڤه‌كا زێده‌تر دده‌ته سترانبێژا كچ بۆ سه‌ركه‌فتنا هونه‌رێ وێ،هه‌روه‌سا ئه‌و حه‌ز ژ ده‌نگێ هونه‌رمه‌ندێن كورد ئارام تیگرانى و گۆلستان په‌روه‌رێ دكه‌ت و دخوازیت سه‌ره‌دانا هه‌رێا كوردستانێ ژى بكه‌ت،دیسا رۆژبین گه‌له‌ك حه‌ز ژ سترانێن گه‌له‌رى ژى دكه‌ت،لێ وێ دڤێت سترانا هه‌ڤچه‌رخ بێژیت،چونكى ب بۆچوونا وێ ستران و مۆزیكا نوو دێ هونه‌رێ كوردى پێش ئێخیت.
رۆژبین كزل خه‌لكا باژێرێ نسێبینه ل باكۆرێ كوردستانێ و نوكه ل گه‌ل خێزانا خوه ل وه‌لاتێ ئه‌لمانیا دژیت.
