ئەلمانیا رێکێ نادەت ئەردۆغان کۆمبوونێن جەماوەری ساز بکەت
ئەڤرۆ نیۆز،زنار تۆڤی:
ئەلمانیا ئەردۆغانی ئاگەهدار دکەت کو ل دەمێ مانا وی ل ئەلمانیا هیچ چالاکییەکێ ئەنجامنەدەت، وەزیرێ دەرڤە یێ وی وەلاتی ژی دبێژیت هەر دەرکەفتنەکا ئەردۆغانی ل دەرڤەی لوتکەیا G20رێک پێناهێتەدان.
سیگمار گابریێل، وەزیرێ دەرڤە یێ ئەلمانیا ئەڤرۆ (پێنجشەمبی 29-6-2017) بۆ رۆژنامەڤانان گوتیە، ئەنقەرە ب فەرمی داخوازکریە،کو رەجەب تەییب ئەردۆغان سەرۆک کۆماری تورکیا ل پەراوێزا لوتکەیا G20 ل گەل رەڤەندا تورکی ل ئەلمانیا کۆم ببیت و گوتارەکێ پێشکەش بکەت.
سیگمار گابریێلی هەروەها ئاشکراکریە،بەلێ بەرلین داخوازا ئەنقەرە پەسەند نەکریە،لەورا هەر دەرکەفتنەکا ئەردۆغانی ل دەرڤەی لوتکەیا G20 تشتەکێ نەشیا و رێگەپێنەداییە.
بڕیارە رەجەب تەییب ئەردۆغان سەرۆک کۆماری تورکیا ب مەبەستا پشکداریکرنێ ل کۆمبوونا سەرکردێن وەڵاتێن G20 بچیتە ئەلمانیا،کو بریارە ل رۆژانێن حەفت و هەشت یێن هەیڤا بهێت ل باژێرێ هامبۆرگ ل ئەلمانیا برێڤە بچیت.
هەروەسا پێشتر وه‌زاره‌تا نافخوە یا ئه‌لمانیا هۆشداری دایە زێرەڤانێن تایبەت یێن ئه‌ردۆغانی،ژ روو ب رووبوونا راسته‌وخۆ و هێرشكرنا سه‌ر خۆپێشانده‌ران،هەروسا گۆتیە،هەکە وان ئەڤ کارەکر د جهدا دێ هێنە ده‌ستگیر‌كرن،ل دووڤ یاسایێن ئه‌لمانیا دێ هێنە دادگەهکرن.
هەروەسا رۆژا ئێکشەمبیا بوری ئەلمانیا داخواز ژ ئەردۆغانی کریە،کو وان زێرەڤانان ل گەل خوە نەبەتە ئەلمانیا،یێن کو بەری چەند هەیڤان پشکداربووین د ئێشاندنا خۆپیشاندەران دا ل بەردەم باڵیۆزخانەیا تورکیا ل واشنتون.
