پارتی داخوازەک ژ رێکخەرێ نوو یێ بزاڤا گۆران هەیە
ئەڤرۆ نیۆز،زنار تۆڤی:
هەر چەندە هەلبژارتنا رێکخەرێ نوو یێ بزاڤا گۆران دێ ل سلێمانیێ بیت،بەلێ ل هەولێرێ و سەرانسەری کوردستانێ ژی ب هووری چاڤدێریا ڤێ پرۆسێ پێنگاڤ ب پێنگاڤ دهێتەکرن.
هەتاکو نوکە کێشەیا بەردەم گۆرانێ ل سیاسەتا وێ حزبێ دا، مامەلەکرنە ل گەل پارتی دیمۆکراتی کوردستان،دیسا پارتی ژی بۆ دەستپێکرنا لاپەرەکێ نوو، داخوازیەک ژ رێکخەرێ نوو ێی گۆرانێ دکەت.
مەحموود محەمەد،پەیڤدارێ مەکتەبا سیاسی یا پارتی دیمۆکراتی کوردستان بۆ رووداو گۆتیە،ب دلنیایی ڤە هەلبژارتنا رێکخەرێ گشتی یێ بزاڤا گۆران د دەمەکێ هەستیاردایە و پشتی وەغەرکرنا نەوشێروانی دێ بەرپرسیارەتیەکا زۆر قورس کەڤیتە سەر ستۆیێ وی،ئەو بارودۆخێ ل ڤێ دەڤەرێ دا هەی کارەکێ گەلەک ب ساناهی نابیت،لەوما هیڤی دکەین هەر کەسەکێ ژ بزاڤا گۆران ببیتە رێکخەر،ئەولەویەتا وی ئەو بیت کو چاوا ڤێ پرۆسا سیاسی کارا بکەینەڤە،بۆ هندێ کو ئەو گرفتێن هەین بهێنە چارەسەرکرن.
هەروەسا پارتی دیمۆکراتی کوردستان رەنگە ژ هەموو لایەنێن دیتر زێدەتر یا ب لەز بیت،کو پرۆسا هەلبژارتنا رێکخەرێ نوو یێ بزاڤا گۆران ب دوماهی بهێت،چونکی ئێکسەر دێ دەست ب گەرەکا دانوستاندنان کەت، دانوستاندن ژی دێ ژ کاراکرنا پەرلەمانی دەستپێکەت.
ئەڤرۆ سێشەمبێ 25-7-2017، جڤاتا نیشتمانی یا بزاڤا گۆران ل باژێرێ سلێمانیێ دێ رێکخەرێ گشتی و پێنج ئەندامێن خانەیا راپەراندنێ هەلبژێریت.
