ریال مه‌درید دێ پلانەکا بارسەلۆنا تێكده‌ت
ئەڤرۆ نیۆز،زنار تۆڤی:
یانا ریال مه‌درید ده‌رگه‌هێ دانوستاندنێ له گه‌ل پاولۆ دیبالا یێ ئه‌رجه‌نتینیی و یانه‌یا یوڤێنتوس ڤەکریە و دڤێت ببەتە ناڤ رێزێن خوه،د دەمەکێ دا بارسەلۆنا ژی ل گه‌ل وی یاریزانی د دانۆستاندنێ دایە.
رۆژناما مۆندۆ دیپۆرتیڤۆ یا ئیسپانی،كو نێزیکی بارسەلۆنایە،دوپات دکەت کو سه‌رۆكێ یانا ریال مه‌درید فلۆرێنتینۆ پێرێزی ئاماده‌یا خوە نیشاندایە کو گۆژمێ 80 ملیۆن یۆرۆیا ل گەل یاریزان كۆڤاسیچ بدەتە یوڤێنتوس به‌رامبه‌ر هاتنا دیبالای بۆ مه‌دریدێ.
هەروەسا گۆتیە،یوڤێنتوسا قارەمانا ئیتالیا،ئارمانجا وێ ئەوە کو زۆرترین مفایێ دارایی ژ دیبالای بكەت،لەورا ب كێمتر ژ 120 ملیۆن یۆرۆیا ده‌ستبه‌ردار نابیت.
سه‌باره‌ت یاریزان كۆڤاسیچی،کو ژیێ وی 23 سالە و نوکە بوهایێ وی د بازارێن ڤەگۆهاستنێ دا 25 ملیۆن یۆرۆ نە،یانا یوڤێنتوس ژی دو ده‌سته‌واره پێشكێشی ریال مه‌درید كرینە بۆ ب ده‌ستڤەئینانا وی یاریزانی،ئێک ب رێیا ڤەگۆهاستنا ئاسایی و ئه‌وا دی ژی ب شێوێ خواستنێ ب مه‌رجەكێ كو پشتی هنگێ،ب هەمیشەیی ڤەگۆهێزیت.
نوکە گفتوگۆیێن ریال مه‌درید و یوڤی د به‌رده‌وامن،ب تایبه‌تی ریال مه‌درید د‌زانیت گفتوگۆ ناڤبەرا بارسەلۆنا و دیبالای دا هه‌نه و وێ رۆژنامێ گۆتیە،ریال مه‌درید دڤێت كارێ بارسا تێكبدەت.
كۆڤاسیچ ل هاڤینا 2015 ژ ئینته‌رمیلانێ چوویە ریال مه‌درید و گرێبه‌ستا خوە ل گه‌ل یانا ریال هەتاکو 2021 واژوو كریه.
د به‌رامبه‌ردا دیبالا یێ 23 سالی دو وه‌رزه ل گه‌ل یوڤی یاریێ دکەت و پێشتر ل پالیرمۆ بوو،ل نیسانا بوری گرێبه‌ستا خوە ل گەل یانا خوە هەتا‌كو 2022 نووکریە.