ڤی وەلاتی ماوێ قەدەغەکرنا ترۆمبێلێن بانزینێ و دیزلی دیارکر
ئەڤرۆ نیۆز،زنار تۆڤی:
حوکمەتا سکۆتلەندا سۆزدا ل سالا 2032 دروستکرن و ئینانا ترۆمبێلێن گاز و بانزینێ قەدەغە بکەت و بتنێ دێ رێکێ ب ترۆمبێلێن کارەبایی دەت.
نیکۆلا ستورجن وەزیرێ پایەبلند یێ سکۆتلەندا، پلانەکا نوو ئاشکرا دکەت بۆ هاندانا ب کارئینانا ترۆمبێلێن کارەبایی و دانانا چەندین بنگەهێن شەحنکرنا ترۆمبێلێن کارەبایی ل رێیاندا،بۆ هندێ داکو ب دەربازبوونا دەمی ترۆمبێلێن کارەبایی جهێ ترۆمبێلێن کلاسیکی یێن پەترۆلێ بگرن.
ستورجن دبێژیت ئارمانجا مە ئەوە کو ل سالا 2032 دروستکرن و ئینانا ترۆمبێلێن گاز و بانزینێ قەدەغە بکەین ل دووڤ ڤێ پلانێ دێ سکۆتلەندا هەشت سالا پێش دەڤەرێن دیتر یێن بریتانیا کەڤیت، چونکی ئەوان ل سالا 2040 دیارکریە بۆ وادەیێ جێبەجێکرنا ڤێ بریارێ.
مەبەست ژ بریارا سکۆتلەندا،کێمکرنا پیسبوونا هەوایە کو بوویە گرفتەکا مەترسیدار ل جیهانێ.
رێكخراوا ساخلەمیا یا جیهانی ددەتە دیارکرن،کو ل سەرتاسەری جیهانێ سالانە 3 ملیۆن كەس ب پیسبوونا هەوای دمرن،كو دوکێلا ترۆمبێلان ئێکە ژ وان ئەگەرێن دیار.