عەبدولرحمان بامەرنی

مە بەحسێ‌ ژنا دویێ دكر و مە بەحسێ‌ فرەژنیێ ژی دكر، یا راست ئەم ژ پێنج كەسان زێدەتر بووین و ئەم ب بووینە دو پشك، ئەم هندەك ل گەل بیرۆكەیا فرەژنیێ بووین و هندەك دژی بیرۆكەیا فرەژنیێ بووین و تشتێ سەیر، مە هەردو ئالیان خوە ب چالاكڤانێن جڤاكێ سڤیل دزانی.
مە ئەڤێن باوەری ب فرەژنیێ هەی، بەهانا مە بۆ ڤێ چەندێ، ژمارەیا زۆرا قەیرە كچان و ئەرێ گونەها ڤان كچان چییە كەس دەرگەهێ مالا وان نەقوتیت و چەند ب ناڤ سالڤە بچن، چانسێ شویكرنا وان كێمتر لێبهێت و ئەگەر فرەژنی هەبیت، رەنگە گەلەك هەبن و ل بن هەر بەهانەیەكێ هەڤژینا دویێ ژی بینن و بڤی رەنگی دێ بالانسا كومەلگەهی ئالیسەنگ بیت. ئەم ئەڤێن دژی بیرۆكەیا فرەژنیێ، مە زێدەتر بەحسێ‌ مافێن ژنان دكر، دەما فرەژنی هەبیت دێ كێشە هەبن، ژنەك ل سەر حسابا ژنەكا دی دێ ژیانێ كەت و ئەم ب هیچ رەنگەكی دگەل ڤێ چەندێ نەبووین.
مە هندەكان ژی بەندك ل دووف هەردو جینان بەرددا و مە ل گەل هەردو ئالیان هندەك راستی ددیتن و هەڤالەكێ مە یێ ئاخفتنا وی دەرمان، چەند جاران بزاڤ دكرن ئەو ژی خوە بدەتە ل گەل ئالیەكی و راستی ژی بیت ئەم پێدڤی كەسەكی بووین، مە ل خالەكێ بگەهینتە ئێك، ل لێزڤرینێ من گۆتێ: كا راوەستن ب زووری هەڤالێ مە دڤێت ب ئاخڤیت، بهێلن بلا دیتنا وی ژی هەبیت خوە ئەگەر بەران ژی د مە وەربكەت، بوویە ئەڤە خۆش دەلیڤەیە ئەم هەناسەیەكێ بدەینە بیرۆكەیێن خوە یێن جودا و هەر ئالیەكی ژمە حەزدكر ئاخفتنا وی بۆ ئالیێ وی بیت و بەندك ب دووف ویڤە بچیت، لێ هەڤالێ مە گۆت: هوون هەردو ئالی یێ بەحسێ مافێن ژنان دكەن و هوون یێ بەحسێ‌ جڤاكێ سڤیل ژی دكەن، ئەرێ هوون دزانن پوختێ تێگەهێ جڤاكێ سڤیل، ب مەبەستا كاركرن بۆ ب دەستڤەئینانا بەرژەوەندی و بەهایێن تاكان و كومەلێ پێكڤە؟! هەڤالێ مە راستگۆت و هەردو بیرۆكەیێن مە، دێ بەرژەوەندیێن هندەك ئالیان تێكددەن و مە بابەت ب دووماهی ئینا.

عەبدولڕحمان بامەرنی

نڤیسەر و ڤەكۆلەرێ باژێرێ دھۆكێ «ئیسماعیل بادی»، گۆتارەكا جوان ل بن ناڤێ «ڤەھاندنا ھەلبەستێ ل دویڤ تیپێن ئەبجەدی» د رۆژناما ئەڤرۆ دا ژمارەیا (3851) ل 19 /10/2025 بلاڤكریە و تشتێ سەرنجا من راكێشایی، دەما بەحسا تیپێن ئەبجەدی كری، كو ب راستی ژمێژە بوو من دڤیا بابەتەكێ ل سەر ڤان جۆرە تیپان بنڤیسم، كو رەنگە گەلەك ژ نڤیسەران، قوتابی و مامۆستایان رێزبەندیا وێ نزانن، یان ئەگەر رێزبەندیێ دانن ژی، ژێدەرێ وێ نزانن و ل گەلەك جھان ژی تێكەلیەك دناڤبەرا تیپێن ئەبجەدی و تیپێن ھیجائی دا ھەنە و ژبەركو سەیدایێ بادی نموونەیا ھەلبەستێن خوە لدویڤ تیپێن (عەرەبی) ئینایە، دێ ھەولدەین لدویڤ زمانێ ڤان تیپان گۆتارا خوە بنڤیسین، كو شاعرێن مە یێن كەڤن ژی ئەڤ چەندە كرییە و ل دەستپێكێ فەرە بزانین، جوداھیا ھەردو رێزبەندیان (ئەبجەدی و ھیجائی) چاوانە؟ رێزبەندیا تیپێن ئەبجەدی بڤی رەنگییە: (أ. ب. ج. د. هـ. و. ز. ح. گ. ی. ك. ل. م. ن. ص. ع. ف. چ. ق. ر. س. ت. پ. خ. ژ. ڤ.غ. ش.)، و رێزبەندیا تیپێن ھیجائی یێن عەرەبی ژی بڤی رەنگییە، ئەو ژی (أ. ب. ت. پ. ج. ح. خ. د. ژ. ر. ز. س. ش. ص. چ. گ. ڤ. ع. غ. ف. ق. ك. ل. م. ن. هـ. و. ی.) و ئەڤ جوداھیا ھەنێ نە بتنێ بۆ چاوانیا رێزكرنا یان رێزبەندیا ئێك لدویڤ ئێكا تیپان دھێت، بەلكو تیپێن ئەبجەدی لدویف رێزبەندییا مێژوویێ ھاتینە دانان و وەك ژمارە دھێنە دانان، چاوان (1،2،3،3،5،6،7.. ھتد) دھێنە دانان و تیپێن (ھیجائی) ژی وەك وێنە دھێنە كێشان بۆ رێزبەندیا پەیڤان و ناڤان.
تشتێ سەرنجا من ژ (ئەبجەد)یێ راكێشایی، وەك من گۆتی ئەز بكەمە بابەتەكێ نڤیسینێ، ژبەركو ئەڤ پەیڤێن ھەنێ د فێركرنێن قورئانێدا، ل تەكیان، حوجرەیان، مامۆستایێن ئاینی دھاتنە خواندن بڤی رەنگییە (أبجد هوز حگی كلمن سعفص قرشت پخژ چڤغ)، و ئەز بخوە ژی ئێك ژوان كەسان بوویمە، ئەز دەرچوویێ ئێك ژڤان قوتابخانەیان بوویمە، ئەو ژی ژ سالا 1980 بۆ 1981ێ دزڤریت، ئەز ل قۆناغا خواندنا خوە یا سەرەتایی بووم، ل بامەرنێ ژنەك ھەبوو ب ناڤێ سەیدایا مریەم (جھێ وێ بەھەشت بیت)، زێدەتر ژ (100) زارۆكان مە قەستا خواندنا دەرسێن قورئانێ دكر لدەف و ل دەستپێكا مە یا خواندنا دەرسێن قورئانێ، دەفتەرا ئەلیف بێتكان ھەبوو، دگەل ئەبجەدیی و ھەوەزێ دھاتنە خواندن و لدویڤ وێ خواندنێ، ھندەكان جزیا عەمایێ ژی بڤێ رێكێ دخواندن و ھندەكان ب (حەجییێ) ناڤدكر و خواندنا وان ھۆسا بوو: ئەلیف سەر ئە، جزمە بێ، جیم سەر جە، جزمە دالێ ((ئەبجەد))، ھێ سەر ھە، واو سەر وە، جزمە زەینێ، ھەوەز و ھۆسا بۆ پەیڤێن دی ژی وەك (حوتی، كەلەمەن، سەعفەس…. ھتد) و لدویڤ رێزبەندیا تیپێن (ھیجائی)، ئەو ژی ب چەند رێكا دھاتنە خواندن و ئاماژە بوون ژبۆ وێنەی زێدەتر ژ ھژمارێ و نیشانێن سەر تیپێ، ئەگەر نموونەیەكێ – دویان بینم: (ئەلیف سەر ئە، جر ئی بەر ئوو یان ئەلیف دوو سەر ئەن دوو جر ئین دوو بەرئوون) و ھۆسا بۆ ھەمی پیتان دروست بوو). (بێ سەر بە جر بی بەر بوو یان بێ دوو سەر بەن دوو جر بین دوو بەر بوون).

خالەكا دی یا من دڤێت ل سەر ب راوەستم، ئەو ژی گرێدانا شاعران بڤێ رێزبەندیێ ڤە، ژبەركو پرانیا شاعرێن كلاسیك دەرچوویێن خواندنێن ئاینی بووینە، فەقیاتی خواندینە، لدەف مەلایان، دەرسێن قورئانێ خواندینە، بوویە ھەمیان ئەڤ قۆناغە دەربازكرینە، ھەمیا تیپێن ھیجائییا عەرەبی و دیسان تیپێن ئەبجەدی و ل بامەرنێ ھەوەكو من گۆتی ئەز ژی دەرچوویێ ئێك ژڤان خواندنگەھێن ئاینی بووم، چەندین كەسان د سەر دەمێن جودا دا ئەڤ شێوازێ خواندنێ بۆ زارۆكان دگۆتن و تا نوكە ژی ل ھندەك جھان ئەڤ شێوازێ خواندنێ یێ مای، لێ نە ب شێوازێ جاران كو تاكە رێك بوو زارۆك فێری خواندن و نڤیسینێ ببن.

بۆچی ئەڤ بابەتە یێ گرنگ بیت؟
بابەتێ رێزبەندیا تیپان مل ب ملێ ژمارێ، گەلەك كەس ب كار دئینن و ب مخابنیڤە نزانم بۆچی دەما دگەنە رێزكرنا ھژمارتنێ لدویڤ تیپێ ب (1، ب، ج، د، ھ، و) ڤێرا دچیت و ژبەركو ژی ئەم ھەمی پێدڤی ڤێ رێزبەندیێ نە و دا وەك ھژمار دروست بھێتە بكارئینان، فەرە قوتابیێن مە، مامۆستایێن مە، نڤیسەر ڤێ رێزبەندیا ھژمارێ دروست وەربگرن و دروست كار پێبكەن.

عەبدولرەحمان بامەرنی

بۆ ماوێ (2) رۆژان ل بامەرنێ، دیدارا بامەرنێ1 ب 43ێ ڤەكۆلینان هاتە سازكرن و وەك ئێك ژ رێكخەرێن ڤێ دیدارێ و تشتێ بالا من راكێشایی، ئەڤ دیدارە كارەكێ مەزن بوو ب شیانێن كێم، بۆچی من ئەڤە گۆت؟ ئەز د دەهان فێستیڤال و كونفرانساندا یێ بەشدار بوویم، ئەڤا ئەز دبێژم نە بتنێ ل دهۆكێ، بەلكو ل پارێزگەهێن دی و ب قەدەر ڤێ دیدارێ، من بەشداریا ڤەكۆلەران نەدیتییە، 47 ڤەكۆلەر بەشداریێ بكەن و بەرهەڤبوونا كارا یا بەشداربوویان د هۆلێ ڤە و كارلێكا مێهڤانێن دیدارێ دگەل ڤەكۆلەران، ئاماژە بوون كو بەلێ ڤەكۆلینێن دیدارێ جهێ سەرنج راكێشانێ بوون و تشتێ دی یێ من دڤێت ل سەر ب راوەستم، ئەو ژی ڤەكۆلین د چوارچووڤێ درویشمێ دیدارێ دا بوون (بەهدینان میراتەكێ كەلتووری یێ زەنگین و دوكیومێنتكرنەكا لاواز) و ئەڤە ژی ئەو راستییە یا ل دەڤەرا بەهدینان هەیی و دڤێت ب وێرەكی بێژین، دەما ئەم دبێژین ب وێرەكی، یان كو خوە نەدەینە پاش و بۆ كار بكەین، بەلێ مە میراتەكێ كەلتووری و مێژووی و شوینواری یێ مەزن یێ هەی و نەهاتیە نڤیسین و مە دڤێ دیدارێ دا ئەڤ پێنگاڤە هاڤێت و نە ب گۆتنا مە، بەلكو یا ڤەكۆلەرێن دیدارێ و بەشداربوویێن دیدارێ، ئەم د پێنگاڤا خوە دا د سەركەفتی بووین. دا دەستا ژ دیدارێ بەردەین و بزانین ئایا ئەم دشێین كارێن مەزن ب شیان و پشتەڤانیا كێم بكەین؟ پێ نەڤێت گۆتنا من یا گشتییە و دهەمی بۆارەكی دا ژی دروستە، چ یێن رەوشەنبیری بن هونەری بن یان كومەلایەتی بن و ئەگەر مە ئیرادا كاركرنێ هەبیت، ئەم دشێین وەلاتێ خوە ئاڤا بكەین، ژینگەها خوە پاقژ رابگرین، شوینەوارێن خوە ب پارێزین و جوانیا باژێرێ خوە تێك نەدەین و ئەڤە هەمی بۆ ئێك خال دزڤریت، دلساخی و رژدیا مە د سەرخستنا كارێن مە یێن رۆژانەدا و ئەم وەك پالە نەبین ل هیڤیا دەمژمێر چاری ئێڤاری و كەنگی دێ كرییا خوە یا رۆژانە وەربگرین و مللەتێن پێشكەفتی ژی ب هەمان لوق پێشكەفتینە و ئەم دشێین بۆ سالێن بهێت ژی، ڤێ دیدارێ بكەینە نموونەیەكا دی یا جوان بۆ بەهدینان هەمیێ و سەرخستنا ڤێ پێنگاڤێ ژی، ئێكەم تشت بۆ حەزا مە، بۆ حەزژێكرنا مە بۆ باژێرێ مە و بۆ دەڤەرا مە و بەلێ ئەم دشێین پێكڤە ڤێ بكەین، ئەگەر دەستێن مە دناڤ ئێكدا بن.

عەبدولرەحمان بامەرنی

من بەحسا كامیرێن كۆداك كر، ژبەركو من هەڤالەك یێ هەی خوە گەلەك ب كامیرەیان خوە یا كۆداك مەزن دكر. ئەڤا ئەز بەحس دكەم سالێن نۆتان بوو، مرۆڤەكێ وان كامیرەكا كۆداك یا فۆتوگرافی ژ دەرڤەی وەلاتی بۆ فرێركربوو و هندی ناڤێ كامیرێ ل سەر ئەزمانێ وی بوو و هندی چاڤێ خوە د دایێ و د گەل خوە دگێراند، هەڤالەكێ مە یێ دی بۆ ترانە گۆتێ خۆزی مرۆڤ كامیرا تەبا. ئەڤ هەڤالێ ئەز ژێ بەحس دكەم، هەمی سالۆخەتێن جوانێن هەڤالینیێ د گەل دا بوون و دەما ئەز بەحسا وی و كامیرا وی دكەم، بتنێ مەبەستا من بەهایێ وان كامیران بوو ل وی سەردەمی و هەر چەندە نوكە هەڤالێ مە نە بەحسێ كامیرا خوە دكەت و نە ل هەلكەفتان ژی كامیرا خوە دگەل خوە دگێرینیت، لێ ئەز باوەردكەم وی ئەو كامیرە ل جهەكی یا پاراستی، كو هەر نوی بمینیت، خوە ئەگەر ئێدی وێنان پێنەگریت ژی، لێ بەهایێ وێ لدەف وی ناهێتە خارێ.
بۆچی من بەحسا كامیرێن كۆداك كر و د دەمەكیا ئەز دشیام گەلەك تشتێن دی ب كەمە نموونە؟ مەبەستا من گوهۆرین و خوە گونجاندنە، لێ بنێرە دەما كامیرێن كۆداك هەین، كو ناڤێ كۆمپانیێ (ئیستمان كۆداك) بوو و ئەو كۆمپانیەكا ئەمریكی یا گشتی بوو و ب وێنەكێشانێ یا ب ناڤودەنگ بوو، لێ نوكە كەس پەنایێ نابەتە بەر كامیرێن ژ وی رەنگی و كەسەك نینە ئەگەر مۆبایلەكا زیرەك د دەستی دا نەبیت و دشێت جوانترین وێنە و باشترین كوالێتی بۆ خوە بكێشیت و نە بتنێ ئەو، دشێت ب كامیرا خوە ب هزاران وێنەیان عەمبار بكەت و هەر چەندە مۆدێلا وێنەیێ كاغەزێ ژی نەمایە، بچی ئەلبۆمەكێ بكری و وێنێن خوە تێدا ب رازینی و هەر گاڤا تە ڤیا بچی ئەلبۆما خوە دەربینی و وێنان نیشا هەڤالێن خوە، ناسیارێن خوە بدەی، ژ خوە یا دلئێش ژی ژ وێنەیێن كاغەزی، دەما بەرێخوەددەیێ وێنەیەكێ تە د ناڤدا نە و یێ هاتیە بێی تە یێ هاتە برن. نوكە ئەو هەمی نەما، ب كلیكەكێ دشێی ل وێنێن خوە ڤەگەری، ئەڤە ژبلی وێنەیێ كاغەزێ جوان نەهات، بەرێخوەدانا تەیا دروست نەبوو، كەنی ل سەر لێڤێن تەنەبوو و پرچا تەیا شەكری نەبوو و ئەرێ بتنێ وەك پرسیار كو مە گەلەك ل سەر ڤی بابەتی درێژكر، لێ من مەبەست ب ڤێ درێژكرنێ هەبوو، چەند تشت مە هەبوون و د گەل دەمی نەمان؟ دبیت گەلەك، لێ بنێرە، هەر ل سالێن نوتان و ل دووماهیێن سالێن نۆتان بوو، ژنوی جیهازێن تلستارێ پەیدا ببوون و هینگێ دگۆتنێ ئەنەلۆك و ل دهۆكێ هەمیان نەبوو، هەمیا كرینا وان پێچێنەدبوو و هندەكان ژی شەرم دكر ل مالێن خوە دانن، ژبەركو هەر تشت بێ سانسۆر نیشا ددا. بیرا من دهێت یاریەكا جاما جیهانی یا تەپا پێی بوو، چایخانەك ل رێزا پانۆراما ئازادی یا نوكە بوو، كو وی دەمی گەراجێ رێما لێ بوو و هەر چەندە بەرێخوەدانا یاریێن تەپا پێی بۆ من دگرنگ نینن، لێ ئەڤە سوحبەتا گەنجەكییە، گۆت یاری نێزیكی دەمژمێر چاری سپێدێ بوو و هەر ژ سەعەت هەشتی شەڤێ ئەز چووم ل سەر كورسیەكێ من جهێ خوە كر و تا بوویە دەمێ یاریێ ئەز ژ جهێ خوە نە رابووم، ژ ترسا ئێك بهێتە جهێ من و میزلدانكا من تژی بوو و هەر ئەز نە رابووم! ئەرێ پرسیار، نوكە ب چەند رێكان ئەم دشێین ل ڤان جۆرە یاریا بنێرین و بێ خوە ماندی بكەین؟
ژڤان نمووننێن من ئیناین، چ تشتەك وەك خوە نامینیت و ل ڤێ پێشكەفتنا جیهان گەهشتیێ و ڤان گوهۆرینێن بلەز یێن ب سەرمەدا دهێن، چ ل سەر مە پێدڤییە، ئایا ئەم وەك هەڤالێ من یێ خودانێ كامیرا كۆداك د گەل كامیرێن خوە بژین و ئەم خوە ژ رابردوویێ خوە بەرنەدەین یان خوە دگەل هەر پێشهاتەكێ بگونجینین؟ ئەز باوەردكەم دڤێت ب هەر چ رێكا هەبیت، پیەكێ مە د گەل ڤان پێشكەفتنان بیت و ئەگەر سەدا سەد ئەم تشتەكی ژێ نەزانین ژی، ئەم خوە دگەل بكارئینانێن وێ ب گونجینین. ئەگەر مە شیانێن داهێنانێ نەبن، مە شیان نەبن ئەم نوواتیان بكەین ژی، هەر چنە بیت، ئەم وەك كەسێن نەزان نەبین و ئەڤ نویاتیێن هەنێ بكەڤنە د خزمەتا مە دا و بزانین بكاربینین و ئەڤا ئەز دبێژم نە بابەتەكە ب هەلبژارتنا مەڤە گرێدایە كا ئەم بكەین یان نەكەین، ئەگەر ئەم نەكەین، ئەم دێ د رێ دا مینین.

عبدالرحمن بامەرنی

بەری یازدە سالان بوو، دەما تیرۆرستێن داعشێ ب سەر شنگالێ دا گرتی و ئەو كارەسات پەیدا كری یا دروست بووی. لێ ھەردەم پرسیارەكا ھەی، ئەرێ بۆچی شنگال و بۆچی داعش؟ رەنگە ھەر ئێكی بەرسڤێن خوە ھەبن، لێ ئەڤا ئەز دنڤیسم رەنگە دی ڤەكێ دییێ راستیان بیت، خوە ئەگەر شرۆڤەكرن ژی بیت، لێ راستییەكە و دڤێت مە ڤەكولینێن جودا ل بەر دەست ھەبن. هەتا رێكخراوەكا وەكی داعش پەیدا ببیت، دڤێت چەند فاكتەرەك ھەبن و ژوان ژی (زەمینەسازی و عەقلێ مودەبەر و ھۆڤاتی) و دگەل سەرھلدانا داعشێ ئەڤ ھەر سێكە ھەبوون.
ئێك: پشتی شەرێ ئازادیا ئیراقێ، رێرەوێ حوكمداریێ ھاتە گوھۆرین. ژبەر رێژەیا زۆرا عەرەبێن شیعە، حوكمەت و جھێ بریارێ كەفتە دەستێ وان، دەڤەرێن سننەنشین ھاتنە پەراوێزخستن و كارێن تیرۆرێ، پەقاندن، رەڤاندن و خزمەتگوزاری بەراورد ل گەل دەڤەرێن شیعەنشین نە دھاتنە بەراوردكرن و ئەڤە ژی بوو ئەگەر كو زەمینە بۆ سەرھلدانا رێكخراوەكا وەكی داعشێ یا ل كار بیت.
دوو: پشتی شەرێ ئازادیا ئیراقێ، ب بریارەكا سیاسی یا وی سەردەمی، ھەر كەسێ دەست ل گەل بەعسیان ھەی و تایبەتی ژی ئەفسەرێن پلە بلند، ھەمی ژ كارێن وان ھاتنە دوورخستن و (فەسل)كرن. نە بتنێ ئەڤە، نەھێلان د ھیچ ئەركەكێ سیاسی دا پشكدار ببن و تا نوكە ژی ئەڤ بریارە یا ل كارە و د دەمەكیدا، پرانیا ڤان ئەفسەران ل دەڤەرێن سننەنشین بوون و ئەوا حوكمەتا ئیراقێ برێڤەدبر و خودان بریار بوون و دەما ھاتینە پەراوێزخستن، ئەڤە بوونە ئەقلێ مودەبەرێ داعش.
سێ: دەما داعش پەیدا بووی و باژێرێ مووسل ژ سەربازێن ئیراقێ ھاتیە پاقژكرن و خەلكی ب دەستقوتان پێشوازی لێكری و دا ئەڤ پێشوازیا ھەنێ یا بەردەوام بیت، ئەقلێ مودەبەر كو ئەفسەرێن پلە بلندێن سەردەمێ رژێما سەدامی بوون، گرنگی ب دوو خالان دا، ئێك، دێ چاوان ئەڤ خەلكێ ھەنێ باوەریێ پێ ئینیت و بۆ ڤێ ژی باشترین رێك ئایین بوو و ئایین كرنە بنەما. خالا دوویێ و دا دەنگێ نە رازیبوونێ دروست نەبیت و چ ب حەزا وان بیت یان بێی حەزا وان، ھۆڤاتی ھاتە بكارئینان و د گرتنەبەرا ڤێ ھۆڤاتیێ دا، سۆتنا ب ساخی، سەربرین، جەلدەدان، ھەر چ جۆرێ ئەشكەنجەدانێ ھەبیت و خەلك ژێ بترسیت ئەو ب كارئینان و دگەل ڤێ ژی، مفا ژی ھەر تشتەكی ھاتە وەرگرتن كو بەھانەیەكێ بۆ وێ رەفتارێ دروست بكەت و ژێدەرێ وێ بكەتە ئایین. ل ڤێرە پرسیار ئەڤەیە، پەیدا بوونا داعشێ چ گرێدان ب شنگالێ و ئێزدیان ڤە ھەبیت؟
سەركردەیێن داعشێ و بۆ سەرخستنا بەرنامەیێ خوە، دڤیابا ئەندامێن خوە پاداشت كربانە و دێ چ پاداشتی پێشكێشی وان كەت، پێنەڤێت دەما ئایین كرینە بنەمایێ دەستھەلاتا خوە، ئێكەم تشت دڤێت بەھەشت و دۆزەخ پاداشت و سزا بن و ئەڤە كر. ژلایەكێ دی ڤە، بیر ل وێ چەندێ ھاتەكرنێ، ئەڤ پاداشتێ ھەنێ زوی بھێتە دان و ئێزدی وەك ئایین باشترین ھەلبژاردە بوو ل دەڤەرێ و ئەڤە كرن، دەستدرێژی و سەبیكرن و تالانكرن و تالان برن.
ل ڤێرە پرسیارا ھەرە ئالۆزا د ڤێ بگرەوبكێشێ دا ئەڤەیە، ئەڤ خەلكێ بەرەڤ شنگالێ و ئێزدیان ڤە ھاتین ئەو كی بوون، ئایا تا وی راددەی باوەری ب ھزرا داعش ھەبوو، تا وێ كارەساتێ ئەنجامبدەن و دەستدرێژی و سەبیكرن و كۆشتنا ب كۆم بكەن؟ د دەمەكی دا ھاتوچوو و تێكەلیا ئێزدیێن شنگالێ زێدەتر دگەل پارێزگەھا مووسلێ ھەبوو ژ دھۆكێ، ژبەر نێزیكیا رێكێ و شنگال ب خوە قەزایەكە سەر ب كارگێریا مووسلێ ڤە و ژلایەك دیڤە، گەلەك ژ عەرەبێن گوندێن جیرانێن ئێزدییان ئەڤ دەستدرێژییە كرن، جیرانەتیا گوندی، دوستینیا پێكڤە ژیانێ و ئەڤێن ھەنێ ھەمی ھاتنە ژبیركرن و ھەمیان تالان پێخوشتر بوو ژ وێ دۆستینی و پێكڤە ژیانێ و پرسیارا دڤێت ئەم بەر سینگا وێ بگرین، ئەو چ خالا لاوازە، داعشان شیایین ڤێ خەلكێ ھەنێ بۆ خوە راكێش بكەن و باوەریێ پێ بینن، كو ل دھۆكێ ژی رەنگە ھندەكا پروپاكندە بۆ دكرن و ئەرێ دا كو تشتەكێ ھۆسا و ل بن ناڤەكێ دی دوبارە نەبیتەڤە، ئەم چ بكەین و ئەم د دویر بین ژ ھەڤكێشەیێن خەلكەكێ دی، كو نە مە تێ و نە مە ژێ؟ ئەز باوەرم دڤێت ئەم ڤەكۆلینێن بەردەوام ل سەر ھەمی ھویركاریان بكەین و ژ چ خالەكێ دەرباز نەبین چ مەزن بیت یان بچویك.

عەبدولرەحمان بامەرنی

من هەڤالەكێ خوە ل ناڤ بەهیەكێ دیت و هەڤالێ من یێ قوتابخانێ و سەربازیێ بوو و هند تشت دناڤبەرا مەدا هەبوون، تێرا وێ چەندێ دكر ئەم هندەكێ خوە ژ بەهیێ و بەهیچنان ڤەدزین و بەحسا ژیانێ بكەین.
مە سەرێن خوە گەهاندنە ئێك و مە هندەكێ بەحسا بیرهاتنێن خوەكر، هەڤالان، كی مایە و كێ وەغەركریە، مە بەحسا ژیانا ئێكدو كر، تۆ چ دكەی، ژیانا تە چاوان دەرباز دبیت و زارۆك و خێزان؟! لێ ژبەركو ئەم دناڤ بەهیێ داینە، سحبەتا مرنێ سەر ژ گەلەك سوحبەتێن دی ستاند، ئایا مە چ ژ ژیانێ وەرگرتیە و ژیانێ چ دایە مە و مرن یانكۆ چ؟ ئەڤا راستی بیت، هەڤالێ من ترسەك ژ تشتەكی ددلیدا بوو و دڤیا دەربكەت، لێ من ئەو دەرفەت بۆ نە رۆخساند، ژبەركو ئەز نەشێم بۆ وی چ بكەم!
نڤیسەرێ رۆسێ تولستۆی گۆتنەكا جوان یا هەی و دبێژیت: دگەل نۆكەیا خوە بژی) و من ژی گۆتە هەڤالێ خوە، ئەگەر تە شییا دگەل نۆكەیا خوە بژی، تە چ كێشە نابن، ئەگەر تۆ ب خوە چارەسەریێ بۆ پەیدا نەكەی؟ گۆت چاوا؟ من گۆتێ ئەز دێ هندەك پرسیاران ژتە كەم و هەر گاڤا تە شییا بەرسڤا وان ب گۆتنا تولستۆی ڤە گرێدەی و دوهی و سوبەهی ژبیربكەی، دێ شێی ل سەر ئاستەنگێن خوە راوەستی، گۆت، گوهێ من یێ ل تە؟ من گۆتێ: خوشترین چركەیا ژیانا تە؟ من تێئینادەر وی دڤێت بەرسڤەكا درێژ بدەتە من، لێ هەر زوی بیرا وی ل ڤی نڤیسەرێ رۆسی هات و گوت: نۆكە، من گوتێ: گرنگترین كارێ تە؟ گۆت نوكە و یا سیێ من گوتێ: گرنگترین كەس كییە؟ گۆت تۆ. پشتی بێدەنگیەكێ و تێهزرینێ گۆت: من گەلەك حەز ژ ڤێ هەڤكێشەیێ كر، من گۆتێ بەلێ و (نوكە) ئەو كلیلەیە یا دشێت هەر تشتێ بۆری ژبیرا مە ببەت و سوبەهی بۆ سوبەهی بهێلیت و كورتیا وی، ژیانا تە ئەوە یا تۆ تێدا دژی و هەكو دبێژن و هەووووو.

عەبدولرەحمان بامەرنی

ل پارێزگەها دهۆكێ چەندین دەڤەرێن گەشت و گوزاری لێ هەنە و گەشتیار ژ دەرڤەی پارێزگەهێ، ژ مووسل و ناڤەراست و هەتا باشوورێ ئیراقێ ژی سەرەدانێ بۆ دكەن، لێ ئەڤ دەڤەرێن هەنێ نە كەفتینە د خزمەت دا. ئەگەر ب رەنگەكێ دی بێژم، ئایا ب رێكا گەشت و گوزاری، ئەم شیاینە داهاتەكی بۆ پارێزگەهێ بەردەست بكەین؟ بەری بەرسڤا ڤێ پرسێ بدەم، بابەتێ گەشتیاران ب ڤی رەنگی د ناڤ خەلكیدا یێ بەربلاڤە، دبێژن: (گەشتیارێ عەرەب دهێت، لێ پارەی نامەزێخیت و تا چا و قازانێن خوە یێن ئیپراخان ژی ل گەل خوە دئینن). د بەرامبەردا ل بازاری ئەگەر لێگەرەكێ د ناڤ دكانداران دا بكەی، دێ بێژن: (ئەگەر ژ ڤان گەشتیاران نەبیت، ئەم كرێیێن دكانێن خوە دەرنائینین). ئەڤ هەردوو تەخێن هەنێ راست دبێژن، ژبەركو هەر گەشتیارێ ژ مالا خوە دەركەڤیت و سەرەدانا دەڤەرێن گەشتیاری بكەت، ئەوی پێشوەخت بەریكێن خوە یێن تژی پارە كرین و رەنگە د وەرزێ هاڤینێ دا بتنێ دوسێ جارەكان خێزانا خوە بینتە گەشتەكێ. لێ پێشوەخت ئەو دێ حسابا خوە كەت، كو دێ لڤێ گەشتا ئێك رۆژی یان چەند رۆژێ كۆژمەكێ پارەی مەزێخیت و بۆ ڤێ چەندێ ژی ئەو دێ برەكێ پارەی ل گەل خوە هەلگریت و هێتە گەشتێ و تا ڤێرە زۆر یا ئاساییە، لێ یا نە ئاسایی، دەما ئەو گەشتیارێ هەنێ بۆ چەند رۆژان ل پارێزگەهێ دمینیت و ل شوینا پێنج سەد هزار دیناران بتنێ سەد هزار دیناران بمەزێخیت، یانكو مە عەقلیەتا گەشتیاری نینە یان مە هندەك كێماسیێن دی یێن هەین و دڤێت ئەم چارە بكەین.
دەما ئەز بەحسا عەقلیەتا گەشتیاری دكەم، ئەز بەحسا چەند خالان دكەم، ئێكەم ئەو گەشتیارێ بهێت، دڤێت هەست ب ئارامیێ بكەت و چ جوداكاریێ نەبینیت، ڤێجا ئەو جوداكاریا هەنێ د مامەلەكرنێ دا بیت، د كرین و فرۆشتنێ دا بیت، ژبەركو ئەو یێ هاتی مێشكێ خوە ئارام بكەت و وی نەڤێت كەسەك وی ئیستیغلال بكەت تشتان گرانتر بفرۆشیتێ، وی نەڤێت هەست بكەت كو ژ نەتەوەیەكێ دییە یان ئاینەكێ دییە و خالا دوویێ، ئەو یێ هاتی بۆ چەند رۆژان بمینیت و وی خزمەتەكا جوان دڤێت، ژبەركو پارە یێ د بەریكێ دا و دێ وی پارەی مەزێخیت، ئەڤ خزمەتا ئەز ژێ دبێژم ل خوارنگەهێ یە، ل هۆتێلێ یە، ل دكانێ یە، ل مامەلەكرنێ یە، ل پێشوازیێ و ل پیاسێ یە د ناڤ جاددەیان دا و خالا سیێ كو رەنگە ئەم ب گرنگی وەرنەگرین، ل سۆشیال میدیایێ چەند گرتەڤیدیۆ كەفتنە بەرچاڤێن من و كۆمێنتێن نەشرین، بۆ نموونە گەنجەكی یان كەسەكی رەفتارەكا خەلەت یا كری، نابیت تو ڤێ بۆ هەمی گەشتیاران گشتگیر بكەی و ئەڤە دێ پێناسەكا خەلەت دەتە باژێری هەمیێ.
ئەو پێشنیارێن ئەز دئێخمە بەرچاڤ، مەبەست ژێ ئەم چاوان بشێین مفای ژڤی گەشتیاری وەربگرین و ئەم چاوان وە لێبكەین بمینتە ل هیڤیێ جارەكا دی قەستا باژێرێ مە بكەت و دەهان كەسێن دی ژی دگەل خوە بینیت، بارا مەزنا ڤێ چەندێ ژی دكەڤیتە سەر ملێن رێڤەبەریا گەشت و گوزارێ، دڤێت رێ ل هەر جۆرە (ئیستیغلال)كرنەكێ بهێتەگرتنێ و دەڤەرێن گەشتیاری بهێنە جوداكرن ژ دەڤەرێن دی، ئەڤ خەلكێ دڤێت ل ڤان دەڤەران بژیت، نابیت كەسەك بیت خودان عەقلەكێ بەرتەنگ و خالەكا دی و تایبەت ل ناڤ باژێری، بازار یێ ڤەكری بیت و تایبەت خوارنگەهـ و ئەگەر هزرەك بهێتەكرنێ بۆ رۆژێن تایبەت، هەكە نموونەكێ بێژم، ل سیلاڤێ ل رۆژێن ئەینی هەر جار چالاكیەكا مللی بهێتەكرنێ و مەزاختیێ وێ چالاكیێ ل سەر دكاندارێن سیلاڤێ بیت و بارگرانی بۆ چ دكانداران نابیت و مفایێ وێ دێ بۆ هەمیان پێكڤە بیت، خوە دكانا پشكدار چەند ژ جهێ چالاكیێ یێ دویر ژی بیت، ژبەركو رێژەیا گەشتیاران دێ دو قات و سێ قات زێدەتر لێهێت.

عەبدولرەحمان بامەرنی

دهۆك ب ناڤان دهێتە ناسكرنێ، بۆ نموونە ئەگەر تە بڤێت شۆفێرێ تەكسیێ تە بگەهینتە جهەكێ دەستنیشانكری، دڤێت ناڤێ تاخی و كولانەكێ بێژیێ و پرانیا جاران، ئەو كولان ب ناڤێ كەسان هاتینە ناڤكرن و رەنگە ئەڤە ئێك ژ تایبەتمەندیێن دهۆكیان بیت.
هەر ل سەر ڤی قاونی، هەتا نۆكە ژی ناڤێ سینەما نەورۆز دهێتە گوتنێ و بۆ من ب خوە، ئەز گەلەك جهان ب ناڤان دزانم، لێ ئەز نزانم بۆچی ئەو جهە ب وی ناڤی دهێنە ناسكرنێ؟ سینەما نەورۆز ژی ئێك ژ جهێن هەرە بەرنیاسێن بازارێ دهۆكێ یە و یێ ل سەر دەمێ سینەمێ ژیا بیت یان نە، لێ دزانیت جاددا سینەما نەورۆز دكەڤیتە كیرێ و سەرەرای ئەڤە چەندین سالە ئەو سینەمە بوویە خرابە و نەهاتیە نوژەنكرن، لێ نوكە (شەفەر و حەفارە) كەفتینە قەرقوودێ وێ و سەروسیما بۆ نەهێلاینە، ئایا دێ سینەمەیەك ل جهێ وێ هێتە ڤەكرنێ یان نە؟ دبیت ئەرێ و دبیت نەخێر، لێ خەلك دێ وێ جاددەیێ هەر بڤی ناسكەن و بۆ ئەڤێن چانس نەبووین بچنە وێ سینەمێ، ل سالێن هەشتیان گەرمە گەرما فلمان بوو و تایبەت ئەگەر فلمەكێ (بروسلی یان جاكیشانی یان ئەمیتابی) بایە، گەنج دچوونە سەرملێن ئێك تا دشیان پلێتەكا چوونا ژوور ژ پەنجەرەیێ بكڕن هندی دبوو قەرەبالغ و تشتێ ژ سینەمێ بۆ من مایی وەك بیرهاتن، ئەز ل ناڤنجیا مەمێ ئالان بووم و سەیدایێ (حەجی خالد) ماموستایێ مەبوو و د پولێڤە پرسیارەك ژمن كر و من نەزانی، گۆت تو بۆ سینەمێ یێ زیرەكی؟! بۆ چەندین سالان سەیدایێ حەجی خالد ما دسەرێ مندا و وی چاوان زانی ئەز چوو بوومە سینەمێ و ئەرێ پا وی ل سینەمێ چ دكر؟!! هەتا سالێن پشتی دو هزارێ، من جارەكێ سەدایێ خوە دیت و من گۆتێ، ئەرێ سەیدا تە چاوا زانی ئەز ل سینەمێ بووم؟ كرە كەنی و گۆت: رێڤەبەرێ سینەمێ هەڤالێ من بوو و لبەر پەنجەرا ژۆرا وی، چاڤێ من ب تەكەفت).
چیرۆكا من و سەیدایێ حەجی خالد ب سەرێ خوە، لێ هیڤیدارم ل جهێ وێ سینەمەیەكا دی و ب شێوەیەكێ پێشكەفتی بهێتە ئاڤاكرنێ.

عەبدولرەحمان بامەرنی

د نوكە دا ب دەهان و سەدان دەرچۆیێن پەیمانگەه و زانكۆیان دهێنە دیتنێ، هەمی ژی ل هیڤیا وێ چەندێ نە بهێنە دامەزراندن و هەر چ جۆرەكێ دامەزراندنێ بیت، رەنگە دێ دەستلێكاربن. ئەڤە ژی مافەكێ رەوایێ هەر كەسەكییە بەرهەمێ رەنجا خوە ببینیت. لێ ئەرێ هەر دەرچۆیەك دڤێت بهێتە دامەزراندن؟ پرسیار ژ ملیاردێرێ ئەمریكی (ئیلۆن ماسك)كرن، ئەرێ تو دەرچۆیێ زانكۆیا هارفۆردی؟ كو ئێك ژ زانكۆیێن هەرە ب ناڤودەنگە ل ئەمریكا، ئیلۆنی گۆتێ نەخێر، لێ دەرچۆیێن ڤێ زانكۆیێ یێن هەین دگەل من كاردكەن. مەبەست ژێ ئەوە، ئەگەر هەر كەسەك ژ مە شیانێن خوە یێن هزری و یێن جەستەیی و ئەوا وی ژ ئەنجامێ خواندنا خوە بدەستڤەئینایی بێخیتە دخزمەتا پێشكەفتنا خوەدا، دێ كارێن باش كەت و ئەز دێ نموونەكێ چمە د ناڤ بابەتێ خوەدا، كو پارچە ڤیدیویەك بوو و چەندین جاران من بەرێخوە دایێ، گەنجەكی عەرەبانكەیەكا خوە ل سەر خشاندنێ د دەستاندا بوو و پیەكێ خوە ددانا سەر و پیێ دی دئێخستە سەر ئەردی و قووناغەكێ دچوو. ئەگەر ئەوا من دوێ پارچە ڤیدیۆیێ دا دیتی بكەمە بابەتەكێ خواندنێ، هەر كەسێ ل ڤی بەشی بنێریت دێ ڤان هزران كەت، ئەڤ گەنجە ب رێكا ڤێ عەرەبانكا بچویك، كو چێكرنا وێ گەلەك یا ب ساناهییە، دشێت قووناغەكا رێكێ یا درێژ د دەمەكێ كورت دا ببریت! ئەڤ هزكرنە ژی ب مەبەستا، ئەگەر ئەڤ گەنجە شیانێن خوە یێن جەستەیی و یێن هزری پێكڤە بدەتە كاری، دێ شێت ئەركەكێ مەزن ب شیانێن كێم ئەنجامدەت و د هەمان دەمدا، ئەڤ شیاندانا هەنێ بەشەكێ وەرزشێ و خۆشییێ ژی د گەلدایە. بەشێ دووێ ژ ڤێ پارچە ڤیدیۆیێ، كەسەك چاڤدێریا ڤی گەنجی دكەت و دهێت دبێژیتێ، ئەگەر ئەز تە بكار بێخم، تو چ دبێژی؟ ئەو گەنج دبێژیتێ چ كار؟ زەلام ب تەباشیرێ چارگۆشەكا فرەهیا وێ دو مەتر ل رەخێن وی دكێشیت و دبێژیتێ، هەتا نیڤ دەمژمێرا دی د ناڤ ڤێ چارگۆشەیێ دا بمینە، دێ 20 دولاران دەمەتە. گەنج ژی ل دەرفەتەكا وەسان دگەریا و گوتێ بلا. گەنج د ناڤ چارگۆشەیێ دا ما و پشتی نیڤ دەمژمێرێ 20 دۆلارێن خوە وەرگرتن و زەلامی گۆتێ سوبەهی ژی ئەز یێ ل هیڤیا تە، رۆژا پاشتر بۆ كرە دەمژمێرەك ب 60 دۆلاران و ل دووماهیێ وی زەلامی گۆتێ ئەگەر تو ب هەیڤانە كار بكەی، هەر رۆژێ بۆ ماوەیێ هەشت دەمژمێران د ناڤ ڤێ چارگۆشێ دا بمینی و پارەكێ باش دایێ. سەرووبەرێ ڤیدیویێ هوسا بەردەوام بوو، هەڤالێن گەنجی دهاتن و د گوتێ ئەز یێ ب شولم و تا گەنجی خاستی بهێتە خانەنشینكرن، ئەڤە ژی دەمێ سەرێ وی سپی بووی و تاقەت نەمایی. زەلامی گوتێ بلا و عەرەبانكا وی كرە د دەستاندا ڤە، لێ دەما عەرەبانكا خوە دانایە عەردی و پیەكێ خوە دانایە سەر و دا پیێ دی ل سەر عەردی ب شدینیت، عەرەبان ژبن پیان چوو و كەفتە سەر عەردی.
هەمان پارچە ڤیدیۆیێ ئەگەر بەرۆڤاژی كەینە سەر دامەزراندنێ، كو گەلەك ژمە حەزدكەن بهێینە دامەزراندن، یان گەلەك گەنج دخوینن دا بهێنە دامەزراندن یان گەلەك گەنجان شیانێن هزركرنێ و یێن جەستەیی یێن باش هەنە، لێ خەونا وان بتنێ دامەزراندنە، ئەرێ لڤێرە، ئارمانجا گەنجی ب دامەزراندنێ چ تشتە، بتنێ بدەستڤەئینانا داهاتەكییە و هەرهۆ؟! سەرەرایی ئەڤ گۆتارا من گەلەك دیتنێن جودا د هەلگریت، لێ كورتیا مەبەستا من ب نڤیسینێ، ئەم شیانێن خوە بدەینە كاری، ئەو خواندن و بسپۆریا د چار سالێن زانكۆیێ دا بێخینە دخزمەتا خوەدا بۆ ڤەدیتنا كارەكێ گونجای دگەل شیانێن مە، هینگێ نە بتنێ دێ بینە خودان داهات و دێ ژین، لێ دگەل وی داهاتی دێ خۆشیێ ژی ب ژیانا خوە بەین، دێ مفایەكی ژی گەهینینە وەلاتێ خوە و خەلكێ خوە و ئەم نابینە بارگرانی و وەك تێبینی ژی، ئەڤ بابەتێ من زێدەتر بابەتەكێ خوە پێگەهاندنێ یە و نموونا من ئینای، نموونەكە ژ بۆ خوە ئاڤاكرنێ و هەمی بابەت ژی رێژەیینە.

عەبدولرەحمان بامەرنی

من وێ رۆژێ گوهێ خوە ددا سمینارەكا (فرناندۆ سافاتیر)، بەحسا رەوشەنبیریێ دكر و مەزاختنا پارەیی. یێ ڤی كەسی ناس نەكەت ژی، ئەو فەیلەسۆف و نڤیسەرەكێ ئیسپانییە و ئەڤا من ژ ئاخفتنا وی وەرگرتی، دبێژیت: «رەوشەنبیریا مرۆڤی چەند یا كێم بیت، ئەو ل بێهنڤەدانان و دەركەفتنان زێدەتر مەزاختنێ دكەت». هەر چەندە مەبەستا وی زێدەتر ئەوبوو، دەما رەوشەنبیریا مرۆڤی یا كێم بیت، مژویلاهیێن مرۆڤی ژی دێ تشتێن زێدە و بێ رامان بن، ئەڤە ژی وەك هەستكرن ب كێماسیەكێ یە، لێ د ناڤ گۆتنێن خوەدا، ڤی نڤیسەری گەلەك تشتێن دی بەحسكرن، كو ب راستی ژی ل سەر مە دگونجن و ئەز هندەكان ناسدكەم، نابێژم نە رەوشەنبیرن، لێ دا بابەت ژ چوارچوڤێ مەزاختنا زێدە دەرنەكەڤیت، دێ بەحسا حالەتەكێ ئێكی ژوانان كەم. ژبەركو دو ناسیارێن وی مەزرەعەیێن خوە هەنە و ل رۆژێن ئەینی یان بێهنڤەدانان، قەستا جهێ خوە دكەن و ئەوی چ جهێن تایبەت نینن، كو ئەز هەست دكەم ئەڤ چەندە ڤالاتییەكێ ل دەف وی دروست دكەت، هەمی ئەینییان خێزانا خوە ل ترومبێلێ سیار دكەت و دەردكەڤیت. دبیت تا ڤێرە تشتەكێ ئاسایی بیت، لێ ل هاتنەڤەیێ یا كرییە نەریتەك، دڤێت شیڤێ ل خورانگەهەكێ بدەتە خێزانێ و ژنوی قەستا مالێ بكەت؟ دەما مە پرسیار ژێ كری، بۆچی ئەو ڤێ چەندێ دكەت؟ راستە تە ترۆمبێلا هەی و زور تشتەكێ ئاساییە تو خۆشییێ بۆ خوە و خێزانا خوە دروست بكەی و پێكڤە دەركەڤن، لێ شوینا هوین خوارنێ ل خورانگەهەكێ بخوون، رەنگە ئەگەر ل مالێ هوین دروست بكەن، دێ مەزاختییێ وە یێ دەركەفتنێ گەلەك كێمتر بیت؟ بۆچی من ئەڤە كرە نموونە، ژبەركو گەلەك جاران ل روونشتنان ئەم بابەتان ڤەدكەین و پرانیا جاران ئەو ناگەهینتە سەرێ هەیڤێ، ئەگەر پارێن دكانێ ل سەر نەبن! مەبەستا من بڤێ نڤیسینێ ژی هەر ئەڤەیە. ئەرێ ئەم دشێین خۆشییێ ژ هەر تشتی وەربگرین و مەزاختنەكا كێمتر بكەین؟ باوەردكەم هین هەمی دێ دگەل من هەڤرا بن و ئەگەر بتنێ ئەم بەرێخوە بدەینە هەلكەفتێن خوە و بكەینە نموونە و ئەز ژخوە دەستپێبكەم و مە هەمییان ئەڤ جورێ كێماسییێ یێ هەی یان ئەم دكەڤینە بن كاریگەریا وێ. دا دویر نەچین، جەژنا قوربانی نەیا دویرە، من بەرێخوەددا ئێك ژ كەنالان و پرسیار ژ ژنەكێ كرن، گوت من 10 كیلویێن چەرەزا بۆ مێهڤانان یێن كرین و ئەگەر (فستەف و گەزوو)یا ژێ بدەینە ئالیەكی، كو د سەر شازدە هزار دیناران دانە و دێ بێژین تێكەلۆك یێن كرین و دێ دوازدە هزار دیناران بتنێ بۆ دانین، ئەڤە بوونە 120 هزار دینار دڤێ قەیرانێ دا، ئەرێ بۆچی؟! ڤێجا ژبلی چكلێتا و هێڤە و وێڤە ب سەرێ خوە! رەنگە ئێك ڤێ نڤیسینێ بخوینیت و بێژیت، ئەو سەربلندییە بۆ وی؟! راستە سەر بلندییە و ئها مەبەستا من ژی بڤێ نڤیسینێ ئەڤەیە، ل هەلكەفتان، نەورۆزان، دەركەفتنان ئەم مەزاختنەكا زێدە دكەین و بەریكێن خوە ل بەر پارەی دهێلینە ڤەكری و ئەز ناڤێ وی نابێژم، لێ هەڤالەكێ من خودێ ل بەر دەستێ وی زێدەتر لێبكەت، دەستێ وی دگەل هندەكان یێ ڤەكرییە و ئەڤ تشتێن بهایی دكەن، بێی بازار پارە یێ هژمارتییە ناڤ دەستێ وی و من یا دیتی بازارێ ربعێ ژی یێ كری و نە جارەكێ بەلكو گەلەك جاران و ئەگەر بەرسڤا ناڤونیشانێ گۆتارا خوە ژی بدەم، ئەڤا من كرییە پرسیار، ئەز نابێژم هەستكرن ب كێماسیێ لێ ب پشت راستی ڤە ئەم دكەڤینە بن كارگەریا كەسێن دی و هەر گاڤا مە شییا ئەم ژبەر یێن دی چ تشتان نەكەین و وێ بكەین یا مە باوەری پێهەی، باوەردكەم دێ ژیانا مە گەلەك رێكوپێكتر بیت.