عه‌بدولعه‌زیز محسن بارزانى:
دیدار: ئه‌ڤرۆ
جهێ دلخۆشیێ یه ده‌مێ دیداره‌كێ ل گه‌ل نڤیسكار و هزرمه‌ند و خودان پێنڤیسه‌كێ ب وژدان دكه‌ین، ئه‌وژى پشتى به‌رهه‌مئینانا (40) په‌رتووكان (عه‌بدولعه‌زیز محسن بارزانى)، دێ په‌رتووكا خوه یا (41) وه‌كو پرۆژه‌كێ مه‌زنێ ره‌وشه‌نبیرى و نیشتیمانپه‌روه‌رى و نه‌ته‌وه‌یى ل گه‌ل جڤاكى ئاخڤیت.
بۆ پتر رۆنكرن ل سه‌ر په‌رتووكا (هزر و فه‌لسه‌فا رێبازا بارزانى نه‌مر د گۆتنێن بارزانیێ نه‌مر دا)، ڤێ دیدارا كلاسیكى بخوینن.
هزرا ڤێ په‌رتووكێ مه ڤیا بزانین كانێ ژكیڤه هات و ده‌سپێشخه‌رى چاوا بوو مه ژ به‌رهه‌ڤكارێ ڤێ په‌رتووكێ پسیار كر وى ژى د به‌رسڤێ دا گۆت: وه‌كو نڤیسكار و رۆژنامه‌ڤان و راهێنه‌ره‌كێ گه‌شه‌پێدانا مرۆڤى، پشتى چه‌ندین په‌رتووكێن منێن جودا جودا هاتینه چاپكرن و به‌لاڤكرن و من دڤیا كاره‌كێ مه‌زنێ مرۆڤایه‌تى و نیشتیمانپه‌روه‌رى و نه‌ته‌وه‌یى و كوردایه‌تیا راسته‌قینه بكه‌م. چه‌ند گۆتنێن بارزانى نه‌مر گه‌له‌ك كارتێكرن ل هزر و هه‌ست و ره‌فتارێن من دا هه‌یه. رۆژ ب رۆژێ ئه‌و هزر ل ده‌ڤ من په‌یدا بوو كو ل گۆتنێن جه‌نابێ بارزانى نه‌مر بگه‌ریێم. پشتى زێده‌تر ژ پێنچ سالان د رێیێن جودا دا من پرسیاركرن و ل گۆتن و ژێده‌رێن گۆتنان گه‌ریایم، سۆپاس بۆ خودێ كو شیام (250) گۆتنان په‌یدا بكه‌م، لێ گه‌له‌ك و گه‌له‌ك ب زه‌حمه‌ت هنده‌ك جاران بۆ گۆتنه‌كێ زێده‌تر ژ جاره‌كێ ل دهۆكێ ده‌ركه‌فتیمه. به‌لێ سه‌ر ئه‌نجام من گۆتن ب ده‌ستخوه‌ڤه‌ئینایه.
پاشى به‌رێ خوه دانا گه‌له‌ك په‌رتووكان و پرسیار و راوێژ ل گه‌ل خه‌لكێ شاره‌زا من بریاردا بكه‌مه په‌رتووكه‌كا جودا، ئه‌وژى لێك ڤاڤارتن و پۆلینكرنا وان بۆ سه‌ر (13) ده‌رگه‌هێن ژێكجودا (13) ده‌رگه‌ه ب حوكمێ هندێ كو بارزانى نه‌مر سالێ (12) هه‌یڤان بێ راوه‌ستیان خزمه‌تا مرۆڤایه‌تى و گه‌لێ كوردستانێ كریه. لێ ده‌رگه‌هێ (13) مه كره ده‌رگه‌هێ گشتى داكو ئه‌و گۆتنا ل هه‌ر (12) ده‌رگه‌هێن دى جهێ وان نه‌بیت د ده‌رگه‌هێ (13) دا جهێ وان بكه‌ین.
پاشى مه ده‌ست ب شرۆڤه‌كرنا وان كر بۆ هندێ ئه‌ڤ په‌رتووكه گه‌له‌كا جودا بیت و ل دووڤ دا مه كرنه پاوه‌رپوینت و چه‌ند سمینار ل سه‌ر گۆتن.
پاشى د سه‌ره‌دانه‌كا مێژوویى دا ل رێكه‌فتى (23/2 /2020) دگه‌ل (38) په‌رتووكێن خوه یێن دى من ب ده‌ستێن خوه راده‌ستێ جه‌نابێ سه‌رۆك بارزانى كرن و من گۆتێ”ئه‌زبه‌نى دێ كه‌مه په‌رتووك”، ئه‌مركر گه‌له‌ك باشه.
پاشان كاودانه‌كێ ژ نشكه‌كێڤه گه‌له‌ك و گه‌له‌ك نه‌خوش بۆ من دروست بوو، ئه‌وژى كورێ من تووشى نه‌خۆشیه‌كا گران بوو. ئێدى ئه‌ز كه‌فتمه د كاودانه‌كێ ده‌روونى و گه‌له‌ك دژوار دا.
به‌لێ من هه‌ر ده‌ست ژ ڤێ په‌رتووكێ به‌رنه دا، چونكو ل ده‌ڤ من نه په‌رتووكه، به‌لكو پرۆژه‌یه‌كێ مرۆڤایه‌تى و نیشتیمانپه‌روه‌رى و نه‌ته‌وه‌یێ ئێكجار مه‌زنه.
دیسا ل دۆر چاوانیا برێڤه‌چوونا ڤى كارى و كانێ كێ پشته‌ڤانى لێ كر و ژ كه‌نگى هه‌تا كه‌نگى.. عه‌بدلعه‌زیز محسن گۆت كو پشتى بۆ ماوێ سێ هه‌یڤان ئه‌م ماینه ل وه‌لاتى توركیا باژێرێ ئه‌نقه‌ره، ژبه‌ر نه‌خۆشیا كوڕێ من، من په‌یوه‌ندى ب هزرمه‌ند و ره‌وشه‌نبیرێ كوردستانێ (د.فازل عومه‌رى) كر كو هه‌ڤكاریا من د ڤى پرۆژێ مه‌زن دا بكه‌ت. ب حوكمێ ئه‌زموونا وى ب سۆپاسى ڤه و بێ دودلى، گۆت سه‌رچاڤان.
من كره پرۆژه و خسته به‌ر ده‌ستێن جه‌نابێ وى پشتى خواندى مه پێگڤه گوهۆرینێن مه‌زن تێداكرن و دختورى ژبلى پێداچوونا زمانى گوهۆرینا د شرۆڤه‌یا گۆتنان دا ژى كر و ب راوێژ دگه‌ل جه‌نابێ وى نه‌خشه سازى و دییزاین ژى بۆ هاته دانان.
له‌ورا ژى هه‌ر ل ده‌ستپێكا په‌رتووكێ ده‌مێ په‌رێن وێ دهێنه‌ڤه‌دان سۆپاسنامه‌یه‌كا تایبه‌ت ل گه‌ل وێنێ وى هاتینه دانان. كو دوباره د ڤێ دیدارێ دا ژى من دڤێت گه‌له‌ك و گه‌له‌ك سۆپاسیا رێزدار د.فازل عومه‌ر بكه‌م. چونكو ئه‌گه‌ر ئه‌و نه‌بایه ئه‌ڤ په‌رتووكه ب ڤى ره‌نگى ژدایك نه‌دبوو.
دا هه‌ر هێته هه‌بوونێ به‌لێ نه ب ڤى ره‌نگى. ده‌لیڤه یه ژى ببێژم خوزى مه زانیبا ئه‌ڤ مرۆڤه چه‌ندێ مه‌زنه مه‌ره‌ما من فازل عومه‌ره.
ل دۆر جوداهیا ڤێ په‌رتووكێ ژیێن دیتر یێن ل سه‌ر بابێ رۆحى هاتینه به‌رهه‌ڤكرن چیه؟ مه ژێ پرسى و
به‌رسڤا ناڤبرى ئه‌ڤه‌بوو: من نه‌ڤێت هه‌لسه‌نگاندنێ بۆ په‌رتووكێن كه‌سى بكه‌م، من نه‌ڤێت هه‌ر په‌رتووكه‌كێ نمره‌یه‌كێ بۆ دانم، به‌لێ ب هیچ ره‌نگه‌كێ من په‌رتووكێن وه‌كو ڤێ په‌رتووكێ نه‌دیتینه. له‌ورا ل گۆر باوه‌ریا من ئه‌وێن به‌رى ڤێ په‌رتووكێ په‌رتووك ل سه‌ر بارزانى نه‌مر نڤیسین ڤێ په‌رتووكێ دبینن دێ زانن كانێ ئه‌ڤ په‌رتووكه چه‌ندا جودایه ژ هه‌مى په‌رتووكێن دى، به‌لكو نه بتنێ ل ناڤه‌رۆكێ ل دیزاین و به‌رگ و چاپكرنێ ژى جوداهیا خوه هه‌یه.
مه ل سه‌ر چاوانیا ره‌نگڤه‌دانێن په‌رتووكێ مژار بۆ ڤه‌كر و ئه‌رێ دێ چاوا هێته به‌لاڤكرن، نڤیسه‌رى گۆت: چونكو په‌رتووك یا جودایه، من دڤێت جوداهى ژى بهێته به‌لاڤكرن و شێوازێ رێوره سمێن ئیمزاكرنا وێ یا جودا بیت.
نها ئه‌م هزر د وى شێوازى دا دكه‌ین كانێ دێ چاوا ل وان سازیان هێته ئیمزاكرن ئه‌وێن جه‌نابێ بارزانى نه‌مر ب سالان خه‌بات و تێكۆشین بۆ كرى بۆ نموونه سازیه‌كا مینا په‌رله‌مانێ كوردستانێ.
تشته‌كێ گرنگ ده‌ربابه‌رى ئه‌وى شاندێ ژ رۆسیا هاتین مه ژى كاك عه‌بدولعه‌زیزى پرسى كو ل گه‌ل وان كاركرین كانێ كینه و چاوا بوو؟ به‌رسڤا وى ژى ئه‌ڤه بوو: ئه‌ڤ په‌رتووكه هاتیه وه‌رگێران ب سه‌ر چه‌ند زمانان و زاراڤان ئێك ژ وان رۆسى یه، رۆسیا وێ د رێكا (كۆمه‌لا دۆستینا كوردى ـ رۆسى) هاتیه وه‌رگێران بۆ سه‌ر زمانێ رۆسى.
ئه‌ڤێ كۆمه‌لێ سه‌ره‌دانا كوردستانێ كر و رێوره سمه‌كێ گه‌له‌ك ژ هه‌ژى رێخستن، ئه‌وژى ل رێكه‌فتى (3/6/2021) ب هه‌ماهه‌نگى دگه‌ل مه‌دا. سه‌ره‌دانا مه‌زارێن نه‌مران ل بارزان كرن و پشتى پێشوازیێ و دانانا تاجه گولینه‌كێ ل سه‌ر مه‌زارێن نه‌مران (مه‌مۆ مه‌مۆیى) سه‌رۆكێ كۆمه‌لێ په‌یڤه‌ك پێشكه‌شكر، پاشى داخواز ژ رێزدار (خه‌لات بارزانى) نوونه‌رێ سه‌رۆك بارزانى كر، كو خه‌لاتێ كۆمه‌لێ پێشكه‌شێ من وه‌كو به‌رهه‌ڤكارێ په‌رتووكێ و (دێرین مراد) وه‌كو وه‌رگێرێ په‌رتووكێ بكه‌ت. ب سۆپاسى ڤه مه دو خه‌لات وه‌رگرتن.
• ته‌پا جیهانێ كو كوردستان د نیڤا وێ دا بوو و ناڤێ من ل سه‌ر بوو.
• سۆپاسناما كۆمه‌لێ كو ل وه‌زاره‌تا دادا رۆسى هاتیه هه‌ژماركرن و ناڤێ من ل سه‌ر بوو.
ناڤه‌روكا وێ به‌حسێ په‌رتووكێ دكه‌ت.
پاشى من په‌یڤه‌ك پێشكه‌شكر و من ژى به‌حسێ په‌رتووكێ و بنه‌مایێن رێبازا بارزانى كر.
ل دووڤ دا من په‌رتووك ئیمزاكر و ب سه‌ر به‌رهه‌ڤبوویان دا به‌لاڤكر و پاشى لۆگۆیێ بارزانى نه‌مر من پێشكه‌شى شاندێ ناڤهاتى كر و بۆ جارا ئێكێ یه چالاكیه‌كا ب ڤى ره‌نگى ل سه‌ر مه‌زارێن نه‌مران ل بارزان دهێته‌كرن، ئه‌وژى ژبه‌ر گرنگیا ڤێ په‌رتووكێ یه.
مه ژێ خواست كو ب گشتى ل سه‌ر مژارا ڤێ په‌رتووكێ باخڤیت، عه‌بدولعه‌زیز محسن د به‌رسڤ دا گۆت: ناڤێ په‌رتووكێ ((هزر و فه‌لسه‌فا رێبازا بارزانى د گۆتنێن بارزانى نه‌مر دا)) ئه‌ڤ په‌رتووكه ل ڤان ده‌رگه‌هان پێك دهێت:
• كوردستان و ئاخ.
• ئیراده و خوراگرى و باوه‌رى.
• شه‌رو به‌ره‌ڤانیكرن.
• ئازادى و رزگارى.
• دادپه‌روه‌رى.
• ئاشتى.
• ئارمانج و رێك.
• هێڤى و ئومێد.
9. ئێكگرتن و ژێكڤه بوون.
10. مرۆڤ دۆستى.
11. به‌رژه‌وه‌ندیا ملله‌تى.
12. مافێن مه.
13. گشتى.
ئه‌ڤ په‌رتووكه ژ (313) لاپه‌رێن نیڤ ئه‌ى فۆر پێك هاتیه.
ل په‌رتووكخانا به‌درخانیان ژمارا سپاردنێ بۆ هاتیه وه‌رگرتن و ب تیراژا (1000) دانان ل وه‌لاتێ ئیرانێ ب باشترین و فۆل كوالیتى هاتیه چاپكرن.
بۆ كۆمكرنا هه‌ر (250) گۆتنان مفا ژ (10) جۆرێن ژێده‌ران هاتیه وه‌رگرتن.
ئه‌وژى ئه‌ڤ په‌رتووكه دێ بیته (10) زمان و زاراڤ كارێ وێ به‌ر ب دووماهیێ یه. لێ بتنێ دێ مه پێدڤى ب سپونسه‌ره‌كێ هه‌بیتن ئه‌وژى دێ هنده‌ك مه‌رج بۆ هه‌بن.زمان و زاراڤ ژى ئه‌ڤه‌نه:
1. بادینى.
2. سورانى.
3. لاتینى.
4. عه‌ره‌بى.
5. توركى.
6. فارسى.
7. ئینگیلیزى.
• فه‌ره‌نسى.
• ئه‌لمانى.
11. رووسى.
دێ هه‌ر ئێك ژڤانه ب (1000) دانان هێنه چاپكرن
ئانكو دێ بنه (10,000) ده‌ه هزار په‌رتووك (500) ژوان دێ بنه پاكێجه‌ك پلان ئه‌وه ل هه‌ر پێنج پارێزگه‌هێن كوردستانێ مینا:
(كه‌ركووك، هه‌له‌پچه، سلێمانى، هه‌ولێر، دهۆك) ل جهێن فه‌رمى بهێته دانان.
(500) دانێن دى ل هه‌ر زمان و زاراڤه‌كێ بۆ وى وه‌لاتى بهێنه هنارتن.
ل دووماهیێ ژى كاك عه‌بدولعه‌زیز گۆت: پشتى من ب به‌رفره‌هى به‌رسڤا پرسیارێن هه‌وه داین، من دڤێت ژبیر نه‌كه‌م كو دیزاینا ناڤه‌رۆك و به‌رگى هه‌مى ژلایێ (ناسر مینبه‌رى) ڤه هاتینه دیزاینكرن و جاره‌كا دى ژى من دڤێت سوپاسیا هزرمه‌ندێ مه‌زن (د.فازل عومه‌ر) بكه‌م بۆ هه‌ڤكاریا وى دگه‌ل من دا من دڤێت ببێژم ده‌مێ من داخواز لێ كرى گۆتى سه‌رچاڤان من ل (1991) وه‌ره ل به‌ربوو خزمه‌ته‌كێ بۆ بارزانى نه‌مر بكه‌م، چونكو ئه‌ز گه‌له‌ك باش دزانم كانێ ئه‌ڤ زاته چه‌ندێ مه‌زنه و چ ماف ل سه‌ر مه هه‌یه بۆ من ژى به‌رى ڤێ په‌رتووكێ من (40) په‌رتووكێن دى هه‌نه، لێ بۆ من ئه‌ڤه ل هه‌ر (40) دى مه‌زنتر و باشتر و ب بهاتره، چونكو ل ده‌ڤ من نه په‌رتووكه به‌لكو پرۆژه‌یه‌كێ گه‌له‌ك مه‌زنه.
سوپاسیا شێرزادێ برا و رۆژناما ئه‌ڤرۆ دكه‌م و ئه‌و رۆژ هاتنه بیرا من ده‌مێ ئه‌ز په‌یامنێرێ ڤێ رۆژنامێ.
