بەفرین وەعدوللا مراد

وەكو خۆیا كو ل ڤێ دوماهیێ، تەكنۆلۆژیایێ لڤینەكا ب لەز بخۆڤە گرتیە و كاودانەكێ بنەڕەتی د هەمی وارێن ژیانێ دا دروستكرییە، ب تایبەت د كەرتێ پەروەردەیێ دا. بەلاڤبوونا ئامیرەیێن زیرەك، ئینتەرنێت و پلاتفۆرمێن ئۆنلاین، شێوازێ فێربوونێ ژ بنەجهیێ گوهۆڕییە. قوتابی ئێدی بتنێ پشت ب پەرتووكێن قوتابخانێ و شێوازێ كەڤنارێ وانەگۆتنا مامۆستایی نابەستن؛ بەلكو ب ئاسانی دگەهنە ملیۆنان ژێدەرێن زانستی و ب خۆ ڤەكۆلین و دویڤچوونان ل سەر بابەتان دكەن.
ل گەل ڤێ پێشكەفتنێ، سروشتێ پرۆسەیا پەروەردەیێ ژ ژبەركرنا پەرتووكێ ڕزگاربوو و بەر ب فێربوونا ئاڤاكەر و پشكداریێ چوو. بكارئینانا ڤیدیۆ و وێنەیان، دەرفەتا فێربوونا ژ دوور دابینكرییە و نەرماتی دایە ژینگەها خواندنێ. ئەڤ چەندە بوویە ئەگەر كو پرۆسەیا پەروەردەیێ د بارودۆخێن نەچاڤەڕێكری و نەخۆشییان دا، یان د دەمێ قەیران و كارەساتان دا پەك نەكەڤیت و بەردەوام بیت. دەستكەفتێن تەكنولۆژیایێ ئەڤڕۆ بووینە ئەگەرەكێ سەرەكی بۆ ئاڤاكرنا شیانێن قوتابیان بەر ب داخوازیێن سەردەمێ نوو. سەركەفتنا ئەكادیمی بتنێ ب ئاخفتن و زانیاریێن ڕوق ب دەست ناهێت، بەلكو پێدڤی ب شارەزایێن دیجیتالی، فێربوونا پرۆگرامان، شلۆڤەكرنا زانیارییان و كاركرنا ب كۆم هەیە. ژ لایەكێ دی ڤە، ئامرازێن ئەلكترۆنی هاریكارن د پێشئێخستنا هزركرنا ڕەخنەگرانە و چارەسەركرنا ئاریشەیان دا، كو هەلسەنگاندنێن بنەڕەتینە د بازاڕێ كاری دا.
د هەمان دەم دا، بكارئینانا نەڕێكخستی یا شاشەیان ئاریشە ژێ دروست دبن؛ وەكی ئالۆدەبوون ب ئامیرێن زیرەك، پرتوبەلاڤبوونا سەرنجێ، لاوازبوونا پەیوەندیێن جڤاكی، و پشت بەستن ب زانیاریێن بەرهەڤكری بێ هزركرن و شلۆڤەكرن. لەورا پێدڤییە هشیاری دناڤ ناڤەندێن پەروەردەیی دا بهێتە بەلاڤكرن، دا كو قوتابی ب شێوەیەكێ هەڤسەنگ و بەرپرسیارانە تەكنۆلۆژیایێ بكاربینن؛ ب ڕەنگەكێ كو ئامانجێن فێربوونێ بجهـ بینیت و ساخلەمیا وان یا دەروونی و جەستەیی بپارێزیت.