جێریە غازی
هەر وەك ئەم دزانینن كو ئەرك و ڕۆلێ مامۆستایی د قوتابخانێ دا یێ زۆرە، لێ هندەك مامۆستا هەنە گەلەك ژ ئەڤان ئەركان جێبەجێ ناكەن و پشتگوه دهاڤێژن و ب گرنگ دانانن، ب ئەگەرێ هندێ كو ئەركەكێ گران ل سەر ملێن وییە. ئەم دكارن هندەك خالان بدەینە دیاركرن، كو ببنە ئەگەر مامۆستا د ناڤ قوتابخانێ دا خۆ ژ كارێ خۆ دلگران نەكەت و ببیتە مامۆستایەكێ نموونە و چاڵاك، ئەوژی ب هندێ كو ژبلی كارێ ئەوی ئەوێ د پۆلێ دا ئەنجامددەت، دكارت بێ گلە و گازندە و دلمان هندەك كار و ڕەفتاران ئەنجامبدەت كو هەر فەرە ل سەر ئەوی ب ئەنجامدانا ئەڤان كاڕان ڕابیت، لێ ئەو خۆ سست دكەت و ب ئەڤێ چەندێ ل چاڤ مامۆستایێن دیتر دا ب مامۆستایەك بێ خەم دهێتە پێش چاڤ. داكو مامۆستا ژ ئەڤێ چەندێ بهێتە دووركرن، فەرە ب ئەنجامدانا ئەڤان كار و ڕەفتاران ڕابیت داكو ببیتە مامۆستایەكێ خۆشتڤی ل نك هەموو مامۆستایان:
1. سلاڤكرن ل ڕێڤەبەری و مامۆستایان ل دەمێ هاتنا قوتابخانێ و خاترخواستن ل دەمێ چوونا ژدەرڤەی قوتابخانێ.
2. بەری ڕێڤەبەر داخوازا پلانێن ڕۆژانە و سالانە بكەت، ئامادە بكە و ڕادەست بكە.
3. هەر دەمێ دەرفەت هەبت، دگەل پشكداربوویان پشكداربە د پاقژكرنا قوتابخانێ دا.
4. پرسیار ژ مامۆستا و ڕێڤەبەری بكە كا پێدڤی ب هاریكاریێ نینن، دكاری ب تشتەكێ كێم ژی هاریكاریێ بكەی.
5.فەرە بەری ڕێڤەبەر داخوازێ ژتە بكەت ب كارێ چاڤدێریا قوتابخانێ ڕابی، چاڤدێریێ بكە، چونكی ئەركێ تەیە.
6. پشكداربە د هەلكەفت و بیرەوەری و سەیرانان دا.
7. ڕووگەش و ڕوو ب كەن بە، جڵوبەرگێن ب ڕێك و پێك لبەركە و هەردەم یێ بێهێن خۆشبە.
8. پێگیربە د دەمێ هاتن و چوونا قوتابخانێ دا.
9.ل دەمێ تۆماركرنا نمرەیان نێزیك بیت، نمرەیێن خۆ ئاراستەبكە بێی كو داخواز ژ تە بهێتەكرن.
10. ئەو لیژنێن تو تێدا پشكدار ل قوتابخانێ، كار بۆ بكە و نەهێلە ئەو كارێ ب تە هاتییە سپاردن بهێتە پشتگوهـ هاڤێتن، بەلكو ب پاكی و ڕێك و پێكێ كار تێدا بكە.
11. ل دەمێ كۆمڤەكرنا قوتابییان ل گۆرەپانێ ، لنك پۆلا خۆ ڕاوەستە و كنترۆلێ لسەر قوتابییان بكە كو چ دەنگەدەنگ دروست نەبیت.
12. پشكداربە د كۆمبوونێن قوتابخانێ دا، وەكی كۆمبوونێن گرێدایی ب كارگیریێڤە و كۆمبوونێن سەمیانێن قوتابییان.
13. بیروبۆچوونێن خۆ دەرببڕە ل دەمێ ئامادەبی ل كۆمبوونان یان د دانووستانا بابەتەكیدا.
14. ئاخڤتن خۆشبە و نەبە ئەگەرێ پەیداكرنا نەخۆشییان و دووبەرەكییێ، بەلكو ببە ئاڵاڤەك ژبۆ چارەسەركرنا نەخۆشی و ڕوویدانان.
15. نهێنیێن قوتابخانێ بپارێزە و نەهێلە ئاخڤتن ژ لایێ تەڤە بچیتە ژ دەرڤەی قوتابخانێ.