دلدار محەمەد

هندەك بویەر ل باژێرێ مە پەیدا دبن د ئێكجارەكی نە و ئەو جارا بتنێ ڕامانا شانازیا وێ دهەلگریت، بەلێ هندەك روودان و هەلكەفت هەنە سالانە ژی ب رەنگ و رویێن جودا دهێنە مەیدانێ و دووبارەبوونا وان شانازیا وان ڕاماندارتر لێ دكەت.
دەمەكێ كورت مایە و ڤێستیڤالا دهۆكێ یا نیڤدەولەتی دێ شەمالكا ژیێ خۆ یا (12) هەلكەت، راستە بۆراندنا یازدە گەڕا ژ ژیێ فلمە ڤێستیڤالێ شانازی یە ئەگەر ل بیربیت كو ئەڤ پاپۆرە ل گەلەك ئەڤرازیا و ناڤ گەلەك پێلێن بەرۆڤاژی ئاراستەیێ چوونێ بۆری و هەربەردەوام بوو هەتا گەهشتیە ئەڤرۆ.
بەلێ پرسیارەك خۆ د سەپینیت ئەرێ هەر شانازیكرن بەسە ؟ بێگومان و دودلی بەردەوامبوونێ ب خۆ پەیام و نامەیێن مەزن هەنە، بەلێ ب هاتنا گەڕا (12) ژی هێشتا پتر مە خەون و ئارمانج هەنە پتر ئەڤ فێستیڤالە ببیتە خودیكا پەیام و ئۆمێدێن ڤی مللەتی، هیڤی ئەون پتر دەرگەهێن بیانیا بهێنە لێدان، باشتر دەرگەهـ بۆ وان بهێتە تاقكرن داكو ئەڤێ بویەرا گرنگ پتر رویێ نیڤدەولەتیبوونێ هەبیت، هەلبەت بۆ ڤێ ژی پالپشتیەكا پتر دهێتەخواستن.
خالا ژڤێ ژی گرنگتر پەیاما مە دێ بڤێ پێنگاڤێ پتر توخیبان بڕیت و باشتر مە ددەتە نیاسین، هەكە ئەم بزانێن بۆ نیاسینێ فلمەك و كورتە فلمەك دكەت رەنگە ب دەهان سالا بۆارەكێ دیتر نەكەت، ب چ رەنگان ناهێتە ماندەلكرن ئەوا دڤان (11) گەڕێن بۆری دا هاتیە هەبوونێ تشتەكێ بچووك نینە، لێ ئۆمێد پتر و پترن، بەلێ ئەڤە چیێ ژ شانازیا وێ كێم ناكەت، هەكە بزانین پرانیا گەڕان د زەمینەیێن نە بەرهەڤدا هاتینە هەبوونێ، ئەڤ بویەرە د ناڤ كۆمەكا هروبایان دا بۆریە و چرایێ وێ هەر مایە هەل.

دلـدار محەمەد

یا خۆیایە فلمە ڤیستەڤالا دهۆكێ بۆیەرەكا سالانەیە ل ڤی باژێری و د سەر هەمی رەوش و كاودانان دا بەردەوامیا خۆ كریە جهێ شانازی یێ، سالانە ژی ئەڤ بۆیەرا گرنگ مژارەكێ د ناڤ خۆدا هەلدگریت و پەیامێن وی بابەتی بلند دكەت د ناڤ پانێل و رۆژانێن خۆدا؛ خال ب خالێن وێ بۆیەر و مژارا جیهانی گۆتوبێژ دكەت و دئێخیتە بەر دویڤچوونێ‌ و گۆتوبێژێ وەكی هاتیە راگەهاندن ئەڤ سالە بۆ گەرا دوازدێ فلمە ڤیستەڤالێ ژینگەه وەكی مژارا گەڕا خۆ هەلبژارت، بۆچی هەلبژارتنا ڤێ مژارێ گرنگە؟ ئەرێ نامەیا ڤێ بۆیەرا هونەری یا گرنگ چیە؟
هەلبەت نامەیا سەرەكی ب دیتنا مە فلمە ڤیستەڤالا دهۆكێ دڤێت ببێژیتە جیهانێ ئەز د ناڤ باژێرەكی دا د ناڤبەرا دو چیایێن ئاسێ بلند دا هەست ب برینا تە دكەم ئەی جیهان، من ئاگەهـ ژ بهۆژینا ئالی و جەمسەرێن تە هەیە، هەرچەندە تۆ ئەڤە ژ هەی ل دۆر خۆ دزڤری و هێشتا چاڤێ تە ب من و برینێن من نەكەفتیە، هێشتا پەیاما من نەگەهشتی گوهێن تە یێن كەڕ!
ب هەلگرتنا ڤێ مژارێ ب دیتنا من فلمە ڤیستەڤالێ دڤێت ببێژیتە سیاسیان خۆ هشیاركەنح دڤێت دببێژیتە خێزانانان ژینگەهێ وەكی ئێكرێزیا خۆ بپارێزن ئەگەر نە دێ گەمیا مە هەمیان بەر ب نقۆمبوونێ ڤە چیت و ئەم هەمی دێ كەڤیت بەر خەندقینێ
ب ئازراندنا ڤان مژاران؛ فلمە ڤیستەڤالێ شیایە بگەهینیت كو ئەز بۆیەرەكا هونەری بتنێ نینم، بەلكو من هەڤبەندیێن مكوم ل گەل جیهانێ هەنە ب تایبەت د بابەتێن ئازری و قەیرانێن تەپكا عەردی و مرۆڤێن وێ سالانە ژێ دنالن.

دلدار محەمەد

هەر بڕیارەكا دەردكەڤیت، بێ گۆمان رەهەندێ وێ یێ دویر بۆ خزمەت و رێك و پێككرنا سیستەمی یە، بەلێ راستی هندەك بڕیار جهێ لسەر راوستیانێ یە و تۆ دشێیی بێژی جهێ مەندەهۆشیێ ژی نە.
ئێك رۆژكرنا بەهییان ل مزگەفت و هولێن تازیان ئێك ژ ڤان بڕیارانە،
هندەك جاران مرۆڤ ژ خۆ پرسیار دكەت، چاوا دبیت ئەڤ بڕیارە هاتبیتە دان و جڤاك ل بەرچاڤ نەهاتبیتە گرتن، یان ژی دابو نەریت و مرۆڤینی هاتبیتە ژبیركرن، ئەگەر ژی ب پشتگوهڤە هاتبیتە هاڤێتن، ئەڤ چامە هێشتا مەزنترە، ژبەركو چەقێ ڤێ بڕیارێ خەلكە و دابونەریتێن وی چاوا دبیت د دانا بڕیارێ دا ئەڤ هەردو ستوونە هاتبنە ژبیركرن، ژبەركو نوزا دهێتە زانین یان ژی نە، بۆ خودانێن بەهیێ ئەڤێ بڕیارێ هێشتا بارگرانتر لێ كریە، هێشتا جهـ تەنگتر و بەر و بیاڤ بێ سەروبەرتر، لایەنێ ئابووری ژی پەرێ هەر وەكی بەرێ یە، ژبەركو خەلكی هەمان گەرم و گوڕی و هەمان ڤیانا پشكداریا جاران بۆ بەهیان هەیە، ئەوا دمینیتە ل وێرێ بڕیارا ئێك رۆژی یێ یە، بەلێ بەرژەنگ و ڤەرێژا وێ بەرچاڤ نەهاتیە گرتن
راستە نیازا دانا ڤێ بڕیارێ ژ بنەكوك خۆ یا جوانە، بەلێ هەر بڕیارەكا هەبیت، هشیاركرنا جڤاكی دگەل دا نەبیت، ژ وێرێ نەهێتە دەستپێكرن دێ ڤەرێژ و كارڤەدان و زیان بەروڤاژی زڤڕن هەكە خەلك هاریكار نەبیت، راستە بڕیارەكا نوو دەم بۆ دڤێت هەتا جهێ خۆ دناڤ دابونەریتێن كەڤن دا بكەت، بەلێ ب ئەڤێ رێكێ كو بەهی ژ مزگەفتێ بۆ مال بهێنە ڤەگوهاستن، چ زەنگل د سەرێ مە دا لێنادەن كو ئەڤا ئەم دكەین یا شاشە و هوسا دێ دەرگەهێ هولێ هێتەگرتن بەلێ بەهی ب هەموو بارگرانیێن خۆ ڤە دێ مینیت لێ ب تەرز و رویەكێ دی، چونكی ژ دەستپێكێ مە خەلك و هشیاریا وی نەكرنە دەرازینك بۆ دانا ڤێ بڕیارێ .

دلدار محەمەد

جیهانا نڤیسینێ بۆ زارۆكان جیهانەكا گرنگ و پێدڤیە بۆ وەرارا زارۆكان بگرە گەلەك جاران بۆ ئاڤاكرنا هزری دشێت ببیتە شوینگرەك بۆ هوكارێن سازیێن فێركرنێ و پەروەردەكرنێ و جهێ وان ب رۆلێ ئاڤاكرنی و هشیاركرنێ و پێشڤەبرنێ رادبن، یانژی دبنە تەمامكەرێن پەیاما وان سازیان ئەڤە ژی گرنگیا هەبوونا گۆڤار و رۆژنامە و بەلاڤۆكێن گرێدایی زارۆكان د سەلمینیت، ژبەركو دەرگەهێن بەلاڤكرنێ رێیەكن بۆ بەرهەمێن دهێنە نڤیسین و ئەگەر ئەڤ چاپكریە نەبن دێ پرا دناڤبەرا نڤیسەری و خواندەڤانا هەرفیت و چ بەرهەم دەربازی دەف خواندەڤانان نابن، ئەوا جهێ دلخۆشیێ ژی دناڤ ڤان بەلاڤۆكێن بۆ زارۆكان دهێتە وەشاندن هەبوونا نڤێسەرێن زارۆك ب خوەیە كو هەیڤانە پاشبەندەك یان چەند بەرپەر بناڤێ بەرهەمێن زارۆكان بەلاڤ دبن، ب راستی ئەڤە چەند جهێ دلخۆشیێ بیت ، دەهـ جاران هند جهێ لسەر راوەستیانێ یە، ژبەركو هندەك ژڤان نڤێسینان ب ڕامان و جوانیێن خوە ڤە شوون تبلێن مەزنان لسەر ددیارن یان ژی بلا ببێژین جوان نڤێسینا وان جهێ گۆمانێ یە.
ئەڤە چەندە نە بتنێ د جیهانا بەلاڤۆكان دا یە ئەز باوەرم ڤیستەڤالێن گرێدای بەرهەمێ زارۆكان ژی ، كورێن هەلبەستخواندنێ ژی رەوش هەر ئەڤەیە، دبیت ژی مامۆستایەك داخوازێ ژ زارۆكان بكەت بەرهەمان بۆ قوتابخانێ بینن ، ئەڤجا وی دەمی خویشك و برا و سەمیان دەستێن خۆ هلدەن بلیمەتیا خوە ل بن ناڤێ زارۆكەكێ پاك دیاردكەن،
ئەڤێ چەندێ ژی چەندین زیان هەنە وەكی ئەگەر زارۆكی بەهرەیەكا ساڤا هەبیت ژی تۆ وێ بەهرەیێن وی د كوژی، تۆ زارۆكان د خاپینی و وی ژی ب نە ئێكسەر فێری خاپاندنێ دكەی و هانددەی پاشەرۆژێ ژی پشتبەستانا وی نە لسەر وی بیت بەلكو هەردەم دەرگەهێ خەلكێ دیتر ب قوتیت
راستە ئەڤ گاڤە یان ئەڤ دیاردە ئەركێ گۆڤار و بەلاڤۆك و لیژنەیێن هەلسەنگاندنا بەرهەمان ب زەحمەت و ئالۆز دكەن بەلێ ئەڤە هاندەرەكە كو پتر ب خەمخۆری و هشیاری لسەر وان بەرهەمان راوستن یێن كو ب ناڤێ زارۆكان دگەهنە وان، ئەوا راستی بیت هندی لسەر راوستان یا تۆند و هوور بیت، ئەم ناگەهینە راستیا بەهرەمەندیا زارۆكێ خوە ئەگەر سەمیان و كەسێن دەردورێن زارۆكی نەگەهنە وێ باوەریێ كو ئەڤ كریارا ئەو ب بهانەیا پشتەڤانیا زارۆكان دكەن پشتەڤانی نینە بەلكو وێرانكرن و دسەردا برن و خاپاندنا زارۆكی یە و ژپێش زاروكی ڤە نڤێسین رێ نیشاندان نینە بەلكو رێ لبەر بەرزەكرنە، كەنگی ئەم شیاین دڤی بیاڤی دا ببینە سەمیانێن هشیار ئەم دێ هنگی شیێن ب هشیاری بەهرەیا ساڤا یا زارۆكی ئاڤاكەین دەمێ ئەم هاندان و ئاڤاكرنێ و ێرانكرنێ گرنگیدانێ ژ هەڤ جودا دكەین ئەگەر نە چەند پەیڤێن جوان ل بن ناڤێ زارۆكەكی بەلاڤ بكەی چ رامانان نادەت و دەم دێ هەموو راستیان دا نیتە سەر بەركێ و ئەڤە ژی نە خزمەتا بەهرەمەندییا زارۆكی نە ژی خزمەتا خواندەڤای ناكەت، ب تنێ دەم كوشتنەكا بێ بەرهەمە و نە زێدەتر .

دلدار محەمەد

هێدی هێدی رۆژ دبۆرن؛ ئەم نێزیكی بیرهاتنا قۆناغا هەشتێ یا ئەنفالێ ـ ئەنفالێن بەهدینان ـ دبین، هندەك جاران هەكو مرۆڤ هزر ل رەشاتیا ئەنفالان دكەت، هەستێ مرۆڤی پڕی ئێش دبیت و درۆداتییا دوژمنان پتر ل بەرچاڤێن مرۆڤێ دبیتە كەڤالەكێ پر ئێش، ژبلی لایەنێ مرۆڤاتی و ئالێ هۆڤاتیا دوژمنی، پرسیارەك خۆ دهەلاڤێت، ئەرێ مەرەم چ بوویە؟ هەلبەت هەر مرۆڤەكێ ب لۆژیكی هزردكەت بۆ وی باش دیاردبیت ئارمانج ژێ كوشتنا روحا كوردایەتیێ، نەهێلانا هێمایێن مللەتینیێ، نەهێلانا هەستكرنا ب هەبوونێ وەك تاك و وەك مللەت، حەلیانا هەست و هزرا نەتەوەی یە. بەلكی گەلەك ئارمانج و چەق و تا هەبن بەلێ هەر خالەكا دیتر هەبیت خۆ د ڤان ئارمانجان دا دبینیت. مخابن ئەگەر بێژین مللەتێ مە قەرەبویێن خۆ وەرنەگرتینە و بكەر و هاریكاران ژی سزا وەرنەگرتینە ئەڤە خەمەكا مەزنە لێ خەما مەزنتر ئەگەر ژ هەشتێ و هەشتێ گاڤ ب گاڤ بهێینە دوهزار و بیست و پێنجێ، دێ هەست كەین كو هێشتا ئەنفالێ هەبوونا خۆ ب ریێن نوی و سەردەم هەیە، ما ئەڤا ل سەر تۆرێن جڤاكی ئەڤ گرۆپە و ئەوێ هەنێ ل بن ڤی ناڤی و ئەوێ هەنێ دكەن مانە هەر بۆ كێم كرنا ژێیاتیێ یە، مانە نەهێلانا هەستكرنا مللەتبوونێ یە، بێ بهاكرنا سیمۆبلێن نەتەوەیی و بهێزكرنا روحا دیڤە لانكیێ یە، بێگومان بەرسڤ دێ بەلێ بیت بتنێ رێك و شێواز د جودانە بەرێ زیلێن لەشكری بوون ڤی دەمی مایكێن تیڤیانە، بەرێ سۆتنا گوندا بوو ڤی دەمی برسیكرنا موچەخورانە، بەلێ ئارمانج هەر ئێكە لاوازكرنا تاكێ كورد حەلاندنا هەبوونا وی ل بەر دەنگێ دهۆلا مەركەزیەتێ!
خالەك بتنێ یا جودایە بەرێ زلهێزێن جیهانێ ل پشت دڕندەیا دوژمنێ مەبوون و د شیانێن مە دا نەبوو بەرهنگاری هێزا وان ببین، بەلێ نهۆ د شیان دا هەیە ئەو ئەنفالا پۆست و كۆمێنت دكەن، ئەوا دەستهەلاتدارێن ناڤەند دكەن ڤی دەمی ئەمێن جڤاك ئەمێن سازێن هشیاركرن و ئاڤاكرنا مرۆڤان ل بەروكا وان زەندوباسكان هەلدەین و بزاڤێ بكەین وێ نامێ ب رۆهنی بگەهینین، كو دوژمنێ مە ل هەمی دەم و سەردەمان ئارمانجا وی ئێكە، ئەوژی نەهێلانا مەیە بەلێ رێك و شێوازێن خۆ ل دویڤ دەمی دگوهۆریت، ڤێجا ئەڤ تەپە یا د گۆرەپانا سازیێن مە دا ئەو دێ چاوا شێن جادەیێ ژ ئەنفالێن سەردەمی هشیاربكەن ؟ بەرسڤدانا ڤێ پرسیارێ خەما وانە.

دلدار محەمەد

ئەڤ جیهانا بلەز، ئەڤ تەكنولۆجیایا ل بەردەست رێك كورتكرن و كاروبار ب ساناهیتر لێكرن، مرۆڤ ژ چاڤەرێییا درێژ و رێكێن ئالۆز قورتالكرن، كلیكەك دشێت، هزار ژێدەران پەیدابكەت كو بەری نوكە بەردەستكرنا ئێك ژ وان خەونەكا مەحال بوو، بەلێ مە چ جاران پرسیار ژ خوە كریە بەری ڤی دەمی ژیان چاوابوو؟ مرۆڤان چ رامان هەبوو؟
كا بینە هزرا خوە بەری تۆرێن جڤاكی مانە سەرەدانێن مە سەرەدان بوون و سەرێ كەسێ د چ مۆبایلان ڕا نەبوو، مانە بەرنامەیێن تیڤیان هەموو د ئارمانجدار و پەروەردەیی بوون ؟ بەری ئەم ببینە كولە و قوربانیێن لایك ڤیویان دلۆفانیا مە دلۆڤانی بوو گرنگیدانا ب هەژاران رامانا بەرژەوەندێ نە ددا،
راستە ژیان یا ب زەحمەت بوو تشت یێ كێم بوو و پەیداكرنا وی ژی گەلەك رەنج و خوهـ دڤیان، راستە ژیان ئاسان بوو، بەلێ شادی نەما، راستە رێك كورت بوون، بەلێ ڤیان و پەیوەندی نەمان.
سەردەم چەند بهێتە گۆهاڕتن پێدڤی یە ئارمانج هەر مرۆڤاتی و شادیا ژیانێ بیت و مرۆڤان سەنگ و بها هەبن، بەلێ دەمێ جڤاك ب گشتی دبیتە ئامراز بۆ سەرنجراكێشانێ هندی مرۆڤ دبیتە ئالاڤەكێ بێ بها و ژیانێ ژی سەنگ و تاما جاران نەما.
ئەگەر هزرەك ل ڤی بابەتی نەهێتەكرن و مرۆڤ نەهێنە هشیاركرن، دێ دودلی و بێزاری هەر زێدەبن، ئەڤە ژی گەفە بۆ مرۆڤی وەك تاك، پاشی ژی بۆ بنواشەیێ جڤاكی چونكی دەما مرۆڤ بۆ لایك ڤیۆیان ژییا و دەمی نە مرۆڤان نە ژی خێزانێ نە ژی جڤاكی چ پیرۆزی نامینن، بتنێ بلا لایك زێدە هەر ئەوە ئەو ئارمانجا ئەم بۆ دژین و ژبلی ئارمانجا مە چ تشت نە دگرنگن نە ژی د پیرۆزن، ئەڤە ژی زەنگلا مەترسیێ یە بۆ پەیدابوون و زێدەبوونا تاكەك و كومەكا نڤستی و نە هشیار ، لەوما ئەگەر مە هەستێ بەرپرسیاریێ هەبیت ئەم دێ ل هشیاریا تاك و جڤاكێن خۆ زڤرین یان ژی دێ بێگومان چاڤەرێیی چامێن مەزن كەین د ئاستێ ئاڤابوونا جڤاكی دا، پاشی هینگێ هندی تەپا ب رانێن خوە دا دەین چ مفا نابیت.

دلدار محەمەد

نە كێمترە دەهەیەكی سالانە كوردێن باشورێ كوردستانێ ب دروستی ژی مووچەخۆر و فەرمانبەران كێشەیا مووچە گیرۆبوونێ و كێمكرن و لێ برینێ هەیە، ئەڤە ژی ب دروستی گۆتنا (د ناڤبەرا ناڵ و بزماران دا) یان (ئەز چیا و تۆ چیا…) دئینتە سەر هزرا مرۆڤی ژبەركو مە بڤێت و نەڤێت مووچەخۆر بوویە قوربانی هەڤڕكی یانژی رێككنەكەفتنێن دو حوكمەتێن ناكۆك یان ژی حوكمەتەكا ناڤەندی یا خۆ و لۆژێكێ خۆ یێ هێزێ سەپین
ئەڤە ل لایەكێ كەڤالی ب رۆنی دیارە، بەلێ د بەرامبەر دا ژ سێزدەی خزیرانێ و هێرڤە ئۆمێدەكا دیتر پشتی ناكۆكی و هێرشێن ئیسرائیل و ئیرانێ شوین دبیت، ئەو ژی خەونا رزگاربوونا پارچەكا وەلاتێ مە یێ كو دوژمنان پارچەكری و ب سەدان سالان پارچەكری مایی نێزێكی راستیێ دبیت. پرسیارەك ل ڤێرێ دهێتە پێش، ئەرێ ڤیانا ئاخێ و پەریشانیا منێ بێ مووچە كیژ دێ ل سەر كێژكێ زال بیت؟
مخابن ئەوا ل جادەیێ دهێتە دیتن بێ خەمكرن و بێ ئاگەهكرن و ئاراستەكرنا جادەیێ یە بەر ب گرنگینەدانا ب خەم و هیڤیێن مە ل سەر ڤێ ئاخێ هەین، پشتگوهـ ئێخستنا وێ زنجیرەیا دیرۆكێ یا پڕی قوربانیی یە، راستە بەریك و تژیكرنا وێ رێكا ئێكێ یا برێڤەبرنا ژیانێ یە، بەلێ یا رەوا نینە نەبوون ناسنامەیا مە و شانازیێن هەبوونا مە هندا بكەت
ئەگەر شێل و بێلەكا كارگێری هەبیت هەڤركیەكا سیاسی هەبیت و من پەریشان بكەت، ما یا رەوایە ئەز مایكا كەنالێ خۆ بكەمە د خزمەتا هاندانا جادەیێ دا بەرەڤ كالبوون و خاڤكرنا هەست و هزرا كوردایەتیێ؟
باشە رۆژهەلات و ئۆمێدا رزگاركرنێ چ نە، ئەم دێ وێ دیتنێ ب رەوا دانین ئەوا دبێژیت ئەڤە كارێ بسپۆر و تایبەتمەندایە و ئەم هەژارین!
پا ئەو چاڤێ سپێدێ حەتا ئێڤاری رۆندكا بۆ دۆراندنێن هەلبژارتیێ ئیراقێ درێژیت، چونكی ل ڤاڤارتنا دەربازنابیت، ما ئەڤە ژی نە ژ حەزا بلند یا كولەبوون و خۆ كێم دیتنێ یە؟
یا ژ من ڤە ئەگەر مە دڤێت ببینە خودانێن گەلەكێ هشیار پێدڤی یە ئاڤریەكێ ل ئەڤرازیێن وێ دیرۆكێ بدەین ئەوا بەرهەمێ وێ ئەم گەهاندینە ئەڤرۆ داكو باشتر و چێتر خۆ بنیاسین ئەڤەژی ب چ رەنگان رامانا پاشڤەزڤرینێ نادەت، خالا دووێ یاكو گرنگ ئەگەر ئەڤ تەنگاڤیا شەرێ ئەقلیمی ڤەكێشا و نێزیك بوو گرنگە سازیێن مە یێن كولتووری و رەوشەنبیری و راگەهاندن شەڤ رۆژان بكەنە ئێك بۆ پتر هشیاركرنا مرۆڤان، ژبەركو هەر وەلاتەك هینگی د هەڕفیت دەمێ مرۆڤێن وی د هەڕفتی بن یا زانایە ژی دوژمن هەمی دەما بەری چەكی تابۆرێ پێنجێ دئێخیتە د خزمەتێ دا، لەوما داكو پاراستی و ئاڤا بمینین گرنگە هەركەس ل بازنەیا خۆ ڤی هەستێ بەرپرسیاریێ د خۆ دا پەیدا بكەت و ل دەردۆران بەلاڤ بكەت داكو خەونا هەڕفاندنێ یا دوژمنان هەردەم بۆ هەر و هەر ژ راستیبوونێ دوور ببیت.

دلدار محەمەد

هەردەم د رەوشێن تەنگاڤی و شەڕان دا تابورێ پێنجێ(ئەو دەنگێ بەرزە) بزاڤێ دكەت دل نە ئارامییێ و دەنگ و باسێن بێزاركەر پەیدابكەت و بەلاڤ بكەت، بەلێ دڤی كڤانی دا یا دل ئێش ئەوە كو راگەهاندن ب چەقێن خوە یێن جودا ڤە چ ب زانا بوون یان ژی بێ مەرەم بڤی رۆلی رادبیت.
ل بیرا منە، د رەوشا تەنگاڤا هاتنا تیرورستێن داعشێ ژی دا خەلكی ئەڤەكر هێشتا چ چێ نەبوویی قەیرانا خوارنێ ل ماركتێتان دروستكر، دڤێ خزیرانێ ژی دا شەڕەكێ گەرم هەر چ نەبیت ب راگەهاندنێ یان ب مۆشەكێن دوورهاڤێژ یێن دهێتەكرن ل دەڤەرێ، ئێ مامۆ ب خۆدێ هێشتا چ چێ نەبوویە تۆ لایڤێن نەمانا ئەرزاقی دكەیە بابەت، یان یێ هەبوونا وی ژی هەر ترسەكا پاشەرۆژێ پەیدادكەت.
راستە ئەركێ راگەهاندنێ بەلاڤكرنا رەوشا هەیی یە، بەلێ دەمێ مە خەلك ب گرنگ زانی، نابیت وی نە ئارام ژی بكەین ئەگەر دێ ئەنجام بیتە وێرانبوون یا ژی ژ مە رەڤین، بەلكی هەر سازیەكێ رێنمایی هەبن بەلێ ئەوا پێدڤی لسەر راوستاندنێ دێ مەیدانا سۆشیال میدیایێ بیت، داكو هەر كەس ل مالا خوە نەبیتە پەیڤدارەكێ پەیڤ ئەرزان و نە ئارامیییێ ددل و دەروونان دا بەلاڤ بكەت هەتا ئەڤ رەوشە ژی دەرباز دبیت و ئەم هەست دكەین كو مە خزمەت بۆ بینەری و گوهداری و خواندەڤای كر، چونكی بەرۆڤاژیا ڤێ ئەم دێ وێرانكرنێ كەین، ئەڤە ژی بتنێ هەلگرا رامانەكێ یە ئەو ژی هێشتا مە یێن كارمەندێن راگەهاندنێ و مە یێن ل تۆرێن جڤاكی هێشتا ئەركێ خوە نەزانی یە بەلكو ئەم ب تەمامی یێ بەرۆڤاژی ئەركێ خۆ كاردكەین، ئەڤە ژی ئەو چاما مەزنە ئەوا دەرگەهی بۆ گەلەك وێرانیان ل ناڤ جڤاكی دهێلیتە تاق.

دلدار محەمەد

ل ڤان سالێن دوماهیێ یان ب دروستی پشتی سالا 2014 یو هێرڤە، جیهانێ گەلەك روودانێن شەڕی و حەتا هەڕفینا رژێمان ژی ب خۆ ڤەدیت، ژبلی شەڕێ ل دژی تیرۆرستێن داعشێ روودانێن خزیرانا ئەڤ سالە یێن شەڕێ ئیسرائیل و ئیرانێ ئەگەر نەبێژین گەرمترین و مەزنترین روودانن ئەم دشێن ببێژین نێزیكترینن بۆ خەلكێ مە، ئەڤجا چ ژ نێزیكییا سنۆران بیت چ ژی كارتێكرنا ئێكسەرا بازاران و ئابورێ و پاریێ ژیانا خەلكی بیت
تە بڤێت و نەڤێت چاڤێن تە ب شاشەیان ڤە د نویساندی و گوهێن تە بۆ دەنگ و باسێن نوی و گەرم د ڤەچنینە، ئەڤە رەنگە ژ نەچاریێ بیت، رەنگە ژی ژ وی كاروانێ درێژێ تەنگاڤی و زولم لێكرنێ پەیدا ببیت ئەوێ دیرۆكێ كریە بەهرا گەلێ مە، پرسیار ل ڤێرێ ئەڤەیە ما ئەمێن گوهدار و بینەر هزر ل وی زارۆكی ل وی سنێلەیێ خێزانا خۆ ناكەین ئەوێ ئەم ب شەپرزەیا خۆ تژی دلێ وان دودلی و ترس دكەین ؟!
ئەرێ ئەم هزر ل دەمێ زارۆكێ خۆ ناكەین ئەوێ مە دەمێ وی ژی بۆ خۆ هێلای و ڤیان و حەزێن وی ژی گۆڕی شەڕی و رەوشا وی یا ئالۆزكرین.
تەنگاڤی یە ئەڤە راستە، رەوش یا شەپرزە و هەستیارە رەنگە ئەو ژی راست بیت، بەلێ بۆ گوهداریا دەنگ و باسان بلا دەمەك هەبیت، چونكی ب ڤێ كریارا ئەم و دایك و باب و یێ دی و یێ دی د خێزانێن خۆ دا دكەین چ ب زانین یان ژی ب نەزانین؛ ئەم خێزانێن خۆ دكەینە قوربانیێن رەوشا شەڕی ب وی كەش و هەوایێ ئەم د ناڤ دل و دەروونێن ئەندامێن وێ دا دئافرینین.
ئەم هەمی دەمێن دیرۆكا خۆ بۆ شەڕی و رەوشا وی قوربانی بووینە، چونكی دەمێ دوژمنی ئەم قڕدكرین جوداهی د ناڤبەرا تەمەنان دا نەدكر، ل هەر ژیەكێ هەبیت كەسێن سڤیل گۆری درنداتیا خۆ دكرن، بەلێ بۆ ڤی دەمی و روودانێن دەرڤەی سنووری كو ئەم بتنێ چاڤدێریێ دكەین پێدڤی ناكەت ل هەر جڤاتەكێ ل هەر دەمەكی ل دەڤ هەركەسەكی ئەم قاچقێ شەڕی هەر بجوین و ڤەچوین، چونكی ب ڤێ كریارێ قوربانییێ ئێكێ و دوماهیێ ئەندامێن خێزانا مەنە و تێكچوونا دەروونێ وانە ب تایبەتی ئەگەر هێشتا ژیێ وان نەیێ هندێ بیت كو ببیتە قوربانی بۆ ڤێ هەمی شێل و بێلێ.

دلدار محەمەد

ئەگەر نەگەلەك ژمێژە ژی بیت، ب دەهان سالانە خەلكێ گوندێن دەڤەرێ سالانە سەیرانەكێ بۆ گوندیێن خوە یان ل گوندی یانژی ل جهەكێ دی دناڤ سرۆشتێ كوردستانێ رێكدێخن، ئەڤ خرڤە بوونە پەیوەندیان خۆرت دكەت، كەسێن دوور ب ئێك شاد دكەت هەلبەت ئەڤ هەموو رستە و پەیڤە راستیەكێ د خوە دا هەلدگرن رەنگە ژی هەر ئەڤە بیت ئەگەرەكێ بەردەوام بوونێ، بەلێ ب ئاگەها مەبیت یان ژی نە نامەیەكا ڤەشارتی یا هەی د ڤان سەیران و خرڤەبوونان دا، ناڤەرۆكا وێ ژێبوون و ژێیاتیا مە هێشتا بۆ گرۆپ و بازنەیێن بچووكە، پتر ژ یا وەلات و مللەتی بوونێ، هێشتا وەلات و ئاخ و ئالا نەبوونە ئەو سیبەرا تاكێ مە ل بن خرڤە دبیت.
دەمێن خۆش و خورتبوونا پەیوەندیێن جڤاكی ئەڤە دبێگومانن، بەلێ یاكو گۆمان دكەڤیتێ هشیارییا تادانە ژ پرتپرتكرنا جڤاكی بۆ پرتێن بچووك و بچووكتر، هەلبەتە ژی شانازی ب ناسنامە و ژێبونێن بچووك، شانازییا ب ناسنامەیا مەزن دێ مە هەموویان كەتە پرتێن بچووك و هەتا ل رۆژەكا نە دوور هەست ب بهوژینا هەبوونا خوە دكەین ئەو هەبوونا ژ دیرۆكێ هەتا نهۆ مە بەرەڤ وێ ڤە غاردایی ئەڤرۆ ژی شانازییا گرۆپ و گوند و تاخ و كەسان ترسا ب شافتن و بهوژینێ لسەر مە پەیدا دكەت، بەری ببێژین مخابن و سەرهەژاندنەكا ب خەم و بێ بەرهەم بەهرا مە بیت، هەموو سازیێن جڤاكێ بەرەڤ مەدەنیبوونێ دبەن، هەموو لایەنێن هشیارییا نەتەوەیی ئێخستیە بەروكا خوە د داخوزكرینە لسەر ڤێ پرسێ بزڤن و تاك و كومێن بچووك هشیاربكەن داكو هەر چو نەبیت سوبەهیا مە بۆ بابەتێ ژێبوونێ ژ ئەڤرۆ وێرانتر نەبیت .