هـۆشـەنگ تـاجـر
شەڕێ د ناڤبەرا ئیرانێ ل گەل ئەمریكا و ئسرائیلێ دا ب توندی بەردەوام دكەت و دەمەكە توركیا و پاكستان دەست ب بزاڤەكا مەزن بۆ راگرتنا شەڕی كرینە، رەنگە گەلەك كەس وەسا هزر بكەن كو توركیا و پاكستان ڤێ ئێكێ ژ بۆ ئارامیا دەڤەرێ دكەن، لێ روویێ راست یێ بابەتی تشتەك جودایە، بەری هەر تشتەكێ توركیا و پاكستان باش دزانن هەكە دەستهەلاتا نها یا ئیرانێ نەمینیت؛ وی دەمی دێ دو هەرێمێن كوردی و بەلۆچی ل ئیرانێ دروست بن، ئەو ئێك دێ كاریگەریا خوە ل سەر توركیا و پاكستانێ كەت؛ چونكی ب سالانە بەلۆچی ل هەر دو وەلاتێن ئیران و پاكستانێ داخوازا مافێن خوە دكەن كو تنێ ل پاكستانێ پتر ژ ١٥ ملیۆن بەلۆچ؛ دژین و ب سالانە ژی ل ئیرانێ هێزێن بەلۆچی ل دژی دەستهەلاتا ئیرانێ شەڕی دكەن.
ل گۆر زانیاریان د پەیوەندیێن تەلەفوونی یێن بەری چەند رۆژان د ناڤبەرا وەزیرێن دەرڤە یێن توركیا و پاكستانێ ل گەل ئیرانێ دا بەرپرسێن ئیرانێ ب رەنگەكێ ئاشكرا دیاركرینە كو دڤێت توركیا و پاكستان خوە ئێكلا بكەن یا ل گەل ئیرانێ نە یان ژی ل دژی ئیرانێ نە، ئانكو ب كورتی دیار دبیت ئیران رۆلێ ناڤبژیڤان ژ هەر دو وەلاتان قەبوول ناكەت ب تایبەتی ژی ل توركیا، دڤێت ژبیر نەكەین كو بەری نها ژی ئەمریكا دخواست هەڤدیتنێن وان ل گەل ئیرانێ ل توركیا بهێنە ئەنجامدان لێ ئیرانێ رەت كر و دووماهیێ ژی هەڤدیتن ل وەلاتێ عومان هاتنەكرن.
توركیا باش دزانیت هەر گوهۆڕینەك ل ئیرانێ رووبدەت دێ كاریگەریا خوە یا خراب بۆ توركیا هەبیت، بەری چەند رۆژان دەولەت باخچەلی سەرۆكێ پارتا بزاڤا نەتەوەپەرست ب رەنگەكێ ئاشكرا د كۆمبوونا پارتا خوە دا ل پەرلەمانێ توركیا دیاركر، نابیت توركیا رێ بدەت كو ئیران بهێتە پارچەكرن ئەو ئێك دێ بیتە مەترسیەكا گەلەك مەزن بۆ توركیا، هەر ژ نها ڤە توركیا گەفان ل پارتێن كوردی ژی دكەت كو نابیت ل ئیرانێ چو لڤینان بكەن، لێ رۆژهەلات كوردستانێ نە وەكو رۆژئاڤایە و جوگرافیا خوە یا بەرفرەه هەیە و ئەو ئێك ژی بوویە ئەگەر بەرپرسێن توركیا گەلەك تەنگاڤ بن.
د دەمێ ئالۆزیێن ل سووریێ دا توركیا هەردەم داخواز ژ بەشاری دكر كو دەستهەلاتێ رادەست بكەت، لێ نها ل ئیرانێ بەروڤاژی سیاسەتا سووریێ كاردكەت و نەڤێت رژێما مەلایێن ئیرانێ ژناڤ بچیت، رەنگە ب گوهۆڕینا دەستهەلاتا ئیرانێ ئێدی پێلا گوهۆڕینان بگەهیتە بەر دەرگەهێن توركیا، هەر چەندە توركیا ل ژێر ناڤێ قووناغا ئاشتیێ بزاڤا بێدەنگكرنا كوردان دكەت، لێ هەر گوهۆڕینا نوو ب تایبەتی ژی د دەمەكێ دا كو ئسرائیل بەحسێ گوهۆڕێنا نەخشێ نوو یێ دەڤەرێ دكەت، دێ بیتە ئەگەرێ گوهۆڕینێن گەلەك مەزن و دێ گەلەك تشت ژ دەستێ توركیا دەركەڤن، ژ بەر ڤێ یەكێ ژی توركیا د راستی دا ل ژێر ناڤێ رۆلێ ناڤبژیڤانیێ بزاڤا گەرەنتیكرنا پێگەهێ خوە دكەت.
ل ئالیێ دی ئسرائیل ب چو رەنگەكێ نەڤێت توركیا ل ئیرانێ دا خوەدان رۆل و پێگەه بیت و هەكە گوهۆڕین ل ئیرانێ روی بدەن ژی؛ بێگومان دێ رێ ل توركیا هێتە گرتن، توركیا گەلەك بزاڤ كرن كو ب رێیا ئازەریان پێگەهێ خوە ل ئیرانێ بهێز بكەت، لێ ئازەری خوە وەكو تورك نابینن، ئازەری خوە ب خوەدانێ ئیرانێ دزانن و ناخوازن بكەڤنە ژێر كاریگەریا توركیا و ئەو ئێك ژی بوویە ئەگەر توركیا گەلەك تەنگاڤ بیت، یا راست نها توركیا چو كاریگەری ل سەر ئۆپۆزسیۆنا ئیرانێ نینە و ئەو ئێك ژی نیشاددەت یا توركیا ل سووریێ كری نەشێت ل ئیرانێ بكەت.