ئیسماعیل عـەلـی
بێگومان ئەڤ ناڤونیشانە بەرسڤەكا جەنابێ سەرۆك وەزیرێ هەرێما كوردستانێ؛ مەسرور بارزانی یە بۆ پێشكێشكارێ بەرنامەیێ سكای نیۆز- عەرەبی ڤان رۆژان. جارەكا دی بۆ مە خۆیا دبیت كە میدیا عەرەبی هەردەم نە شەفافیەت د هزر و بۆچوون و تێروانینێن وان دا دیار دبیت، پرسیارێن دوبارەیێن نە لۆژیكی دادننە سەر مێزا سەركردە و رەوشەنبیرێن كورد ژ بۆ پێكۆلینكرن هندەك نیازێن خۆ یێن نەحەزی بكاربینن نەك بۆ چارەسەركرنێن سیاسی و ئەڤە خۆیا دكەت كو میدیا وان نەك میدیایەك بێلایەنە.
ل ڤێرە، جەنابێ سەرۆكی ب وێرەكانە بەرسڤەكا ڕاست بۆ پێناسینا كوردەكی و د پەرژەوەندیا گەلێ كورد دا و ل پێش هەر تاكەكەسەكێ كورد پێشكێشی میدیاكارێ سكای كر.
بێگومان، ئەڤ ڕەنگە پرسیارە نەیێن ئێكێ بن و چ پێنەڤێت، یێن دوماهیێ ژی نابن هندی مافێ چارەنڤیسێ گەلێ كورد ژلایێ دوژمناڤە بێتە رسواكرن.
ئەڤ پرسیارێن نەلۆژیكی دهێنە دوبارەكرن، ژلایێ رۆژنامەڤانێن تورك و عەرەب و فارسان ڤەنە، و نە چ مللەتێن دی. ئەڤە ژی خۆیا دبیت؛ نیازێن پێشێلكرنا ناسنامەیا گەلێ كوردە و هەتا بگەهیتە وی ئاستی ئەو حەز بكەن كورد ئینكارا كوردینیا خۆ بكەن ئەوا خۆدێ ب رزقی كری. ل جهێ وێ، كورد بێژن ئەم موسلمانین، هەروەسا ئیراقینە یان توركین یانژی فارسین، پشتا گوهێن خۆ بهاڤێژن كە خۆدێ كورد یێ دای و هێشتا نە چ ئایین و نەژی هێشتا بەحسا چ دەولەت و سنووران ل جیهانێ نەبووین.
من ڤیا بیرا خواندەڤانان بینم، ژ وان پرسیارێن دی هاتینەكرن، ژ پەرلەمانتارەكا تورك، كوردستان ل كیڤەیە؟ بەرێز پەرلەمانتارێ كورد بایدەمیری بەرسڤەك مرۆڤی دای بەری نەتەوەیی، دەستێ خوە دانای سەر گرنگترین پارچەیا لەشێ خۆ، ل سەر دلێ خۆ؛ ئەها ئەڤە كوردستانە. مەزنترین خەنجەر ل دلێ ناحەز و شۆفینیان دا. دەمێ بەری چەند سالەكا رۆژنامەڤانەكێ تورك پرسیارەكا ب ڤی رەنگی ژ خۆدێ لێخۆشبووی، مام جەلالی، كری و جەنابێ وی بەرسڤدای و گۆتیێ خۆدێ مللەتێ كورد یێ دای و هەرە دیرۆكێ بخوینە هەر ئوسمانیێن وە و ئەتاتوركێ وە نەشیاینە ئینكارێ ژ هەبوونا كوردستانێ بكەن.
هەر چاوا ئەڤرۆ بەریز مەسرور بارزانی هەمان بەرسڤ بۆ وان دوبارە كری، كو خۆدێ ئەو یێ دای كورد، و شانازیێ ب وێ ناسنامەیا مەزن دبەت ل هەر جهەكێ لێ بیت. ئانكو جەنابێ وی هەروەكو بەرسڤ ل سەر زمانحالێ هەر كوردەكی دای، چ ل هەر بەشەكێ كوردستانێ ب بریارێن نە مرۆڤی پارچەبووی، ل باشور، باكور، رۆژاڤا، رۆژهەلات، ل هەر پارچەكا رۆسیا، ل هەر وەلاتەكێ ئەورۆپا، ئەمریكا و هەمی جیهانێ. زێدەباری، ل هندەك بەرسڤێن دی دا سەرۆك وەزیرێ هەرێمێ دیاركر كو دڤێت رێ ل تاكێ كورد نەهێتەگرتن، داخوازا مافێن خۆ د ژیانێ دا بكەت ب وەكهەڤی هەروەكو تورك و عەرەب و فارسان. دڤێت ڕێ ل هەر كوردەكی نەهێتەگرتن دەربڕینا خەونێن خۆ بكەت د ئازادی و مافێن چارەنڤیسا گەلێ خۆ دا. جەنابێ وی دیاركر كو ڤان وەلاتان رێز ل وەلاتیێن كورد نەگرتیە ژبەر نەرێزگرتن ل پێكڤەژیان و ناسنامە و پێكهاتەیێن جودا. ژ وان بەرسڤێن جەنابێ وی نەسەرەدەریا دورست یا زنجیرەیەكا كابینە و دەسهەلاتێن ئیراقێ ل گەل خەلكێ مە ل هەرێما كوردستانێ، یا خەلكێ وێ ب خۆ ئاڤاكری و پێشئێخستی، ژ وان پێگیرینەكرن ب دەستوورێ ئیراقێ و بێرێزی و نەئینسافكرن و كارئینانا بەرەیی یێ ل گەل وەلاتیێن كورد.
ئەرێ كەنگی دەم دێ هێت، ئەڤ مللەتێن هەنە رێزێ ل ئیرادە و بەرخۆدان و دیرۆكا مللەتەكێ مینا كورد بگرن؟. ئەگەر نەبێژین دەسهەلاتێن وان، هەر چ نەبیت میدیایەكا بێلایەن هەبیت.
ئەرێ پرسیارەك؛ عەرەب، بۆ نموونە، دێ رازی بن رۆژنامەڤانەكێ كورد پرسیارێ ژ حاكمەكێ عەرەب بكەت و بێژیت: بۆچی فلەستینی رازی نابن بێژینێ ئیسراییلی نە، نە عەرەبن، ما دەم ئیسراییل دانپێداپێكریە ل نەتەوێن ئێكگرتی و هێشتا فلستین نە؟! بێگومان، دێ عەرد و عەسمانا لێكدەن و كوردان ب مەزنترین شۆفینی و بێ دین و خایین ل پێنڤیسێ خۆ دەن.
یانژی دێ بەهانەیا وان ئەو بیت كو فلستینی موسلمان و مەزلۆمن، هەر چەندە كو كورد ژی موسلمانن و چ مللەت مینا وان بندەستی و زۆرداری لێنەهاتینەكرن. ئەگەر بێژن ژی، زولما سیاسی ل وان هاتیەكرن و كیانێ زیۆنیزمێ و دەولەتا ئیسراییلی ل سەر وان هاتنە چەسپاندن، لێ چ مللەت ب قەوارەیێ كوردستانێ ب ئاخ و گەلێ خۆ مەزنتر مە نەدیتینە بێ دەولەت و سۆڤێرنیتی ژ ئەنجامێ نە وەكهەڤیا مێژوویا سیاسی ژلایێ رێكەفتنامەیێن خیانی دنێڤبەرا وەلاتێن زلهێز و ئەو وەلاتێن موسلمان یێن خۆ ب خۆدێ دنیاسن، مینا عەرەب و تورك و فارسان.
دێ هەر مینیت كورد ب شانازیا كوردینیا خۆ و ئێكگرتنا وان وەكو مە د خۆنیشادانا ل سەرتاسەرێ جیهانێ بۆ پشتەڤانیا رۆژاڤا دیتین مەزنترین چالێنج ل دژی هەر كارتەكا سیاسی ب مە كوردان بێتەكرن.
