كەمال زێوكی

د نۆكە دا، برایێن مە ل ڕۆژئاڤایێ كوردستانێ د قووناغەكا گەلەك هەستیار و بارودۆخەكێ نەجێگیر دا دەرباز دبن. ئەڤ ڕەوشە یا پڕی ئالۆزییە و پێدڤی ب هەلوەستەكێ نەتەوەیی یێ رژد هەیە، چونكی ڕۆژئاڤا نوكە ژ هەر دەمەكێ زێدەتر پێدڤی ب هەمی جۆرێن پشتەڤانیێ هەیە.
هاریكارییا مرۆڤی و ئەركێ سەربازی
بۆ ڕوی بەڕویبوونا ڤان بەرهەنگارییان، دڤێت كار ل سەر دو تەوەرێن سەرەكی بهێتەكرن:
1. پشتەڤانییا ماددی و مرۆڤی: گەهاندنا هاریكارییان بۆ ئەو كەسێن د ناڤا شەڕ و ئاوارەیێ دا دژین، ئەركەكێ ڕەوشتی و نەتەوەیی یە.
2. پێدڤییا سەربازی و پاراستنا ئاخێ: ل ڤێرە خالەكا گرنگ هەیە كو دڤێت ل سەر ڕاوەستین. د سالێن بووری دا، باشوورێ كوردستانێ باوەش بۆ ب هزاران خێزان و گەنجێن ڕۆژئاڤا ڤەكریە و هەتا نوكە ژی ئەڤ پێشوازییە یا بەردەوامە. وەك پێشنیارەكا نیشتمانی، من پێ باشە ئەڤ گەنجێن خۆدان هێز و خۆدان ناسنامەیا وەلاتێ سووری، بزڤڕنە سەر ئاخا خۆ و پشكداریێ د پاراستنا پیرۆزیێن وەلاتێ مە دا بكەن. چونكی خۆدانێ ڕاستەقینە یێ ئاخێ، باشترین كەسە بۆ پاراستنا وێ.
دۆستێن مە یێن ڕاست و دروست تەنێ چیایێن مەنە.
مێژوویا مە سەلماندییە كو «مە كوردان چ دۆست نینن ژبلی چیایان». ئەڤ ڕاستییە دڤێت ببیتە وانەیەك كو ئەم پشت ب هێزا خۆ ببەستین. مادەم ئەم ڤێ ڕاستیێ دزانین، ڕێكا تەنێ یا ل بەر سینگێ مە، ئەوە كو هەمی پێكڤە دەستێن خۆ بكەینە د دەستێن ئێكودو دا. د ڤێ قەیرانێ دا، دڤێت ب مرن و ژینێ پێكڤە بین، چونكی ئێكگرتن تەنێ كلیلا سەركەفتنێ یە.
لەورا ئەڤە بانگەوازەك بۆ هەمی كوردان كو ئەڤ پەیاما من نە تەنێ بۆ گەنجێن ڕۆژئاڤایە، بەلكو بانگەوازەكە بۆ هەمی كوردان ل هەر چار پارچێن كوردستانێ. ئەز یێ پشتڕاستم ئەگەر دەرفەت و ڕێكا گونجای بهێتە دان، دێ ب هزاران و ملیۆنان گەنجێن مە ژ هەمی پارچان بەرەف ڕۆژئاڤا چن دا كو مل ب ملێ برایێن خۆ بجەنگن.
هەروەسا دەربارەی كەزییا بڕی و هەستا نەتەوەیی؛ دیمەنێ بڕینا كەزییا كچەكا كورد، نەتنێ بڕینا پرچێ بوو، بەلكو برینداركرنا كەرامەت و هەستا نەتەوەیی یێ هەر كوردەكێ بوو. ئەڤ كارە بوو ئەگەرێ هندێ كو هەمی تەخ و چینێن جڤاكێ مە تووڕە و دلتەنگ ببن. ئەڤ تووڕەییە نیشانا وێ چەندێ یە كو برینا ڕۆژئاڤا برینا هەمی كوردانە و ئێدی دەم هاتییە ئەڤ تووڕەییە ببیتە هێزەكا ئێكگرتی بۆ پاراستنا پیرۆزییێن مە.
ب كورت و كرمانجی، مان و نەمانا مە د ئێكگرتنا مە دایە. بلا قەیرانا ڕۆژئاڤا ببیتە دەسپێكەك بۆ ئێكدو گرتنەكا بهێزتر كو چ دوژمن و نەیار نەشێن دەستێن خۆ یێن پیس و چەپەل بكەنە د ناڤبەرا مەدا.