مسلح یاسین

چاخێ بیست و ئێكێ ب چاخێ زانست و زانینێ یە، كێشەیەكا مەزن بەرۆكێ میدیایێ و رۆژنامەڤانیێ گرتیە، دێ چاوا شێین پەیوەندیەكا رۆهن و ب مفا د ناڤبەرا جیهانا زانستی و تەكنەلۆژیایێ و هزر و ئەندیشەیا گشتی یا خەلكێ دا دورست كەین؟.
د دەمەكی دا تەكنەلوژیا بلەز گەشێ دكەت و د پێشڤە چوونەكا بەردەوام دایە و ئەقلێ مرۆڤی AI د هەمی وارێن ژیانێ دا بەردەوام د وەرار و گەشەكرنێ دایە و نا راوەستیت، لەوما پێدڤیە میدیایەكا بەرپرس هەبیت هەتا بكاریت ل گەل ژیریا دەستكرد بەردەوامیێ بدەتە كاروانێ رۆژنامەڤانیا پێشكەفتی و گونجای.
سەرەرای ڤێ ئێكێ گەلەك جاران دێ بینی میدیا یا نوكە ب شێوەكێ گشتی و تۆڕێن جڤاكی ب تایبەتی پەیامەكا نەراست و پەیوەندیەكا ب ترس و بێ مفا دورست دكەت، هەڤدژە ل گەل پێلا پێشكەفتنا سەردەم.
كێشەیا سەرەكی بێ شیانیا راگەهاندنكارانە ل تێگەهشتن و پەسەندكرنا زمانێ سەردەمە ئەوێ دبێژنێ زمانێ وەرارا پێشكەفتنا ژیریا دەستكرد، گەلەك ژ راگەهاندنكاران كو كاری ل سەر وارێن زانستی دكەن، ئەو ب خۆ د وارێ تەكنیكێ دا دنەزانن ئەڤە وەك هەڤدژیەكی كاردكەت، چون زمانێ ژیریا دەستكرد زانستەكێ زێدە پێشكەفتی یە، زانا و بیرمەندا دارشتی یە و بەرهەڤكریە ژ ئەقلی مرۆڤی و میدیا یا ئاسای مەزنترە.
بۆ لێك گەهشتن و تێگەهشتنا پێزانینێن زانستیانە ب شێوەیەكێ رۆهن و تیگەهشتی راگەهاندنكار پێدڤیە بهێنە مەشقدان و پێگەهاندن و چەكداركرن. ب ڤی زانستێ سەردەم پێدڤیە پەیوەندیەكا گرنگ دناڤبەرا زانایێن هەڤچەرخ و میدیایێ دا هەبیت. ب دەستڤەئینانا سەرچاڤێن راستەخۆ ژ زانایان و دورستكرنا پەیوەدیێن خورت و ب هێز د ناڤبەرا توێژەر و راگەهاندنكاران دا هەبیت. هەر ئەڤە دێ شێت هەردو جیهانان، جیهانا توێژینا و جیهانا میدیایێ دا ب شیوەیەكێ گرنگ ل هەڤ دو نێزیك بكەت.
دیسا ب رێكا دورستكرنا توورەكا ب هێز و گونجای و خورت د ناڤبەرا راگەهاندنكاڕان و زانا و پسپۆر و مامۆستایێن زانكۆیان دا هەبیت. دا بكارن زانستێ AI د ناڤ دامودەزگەهان و ئۆڕگانێن میدیایێ دا بەلاڤ بكەن، وەك بەلاڤكرنا پەیامێن خۆ ب رێكا راپۆرتان ب دەقێنCHAT GPT و زێدەتر ئەم دكارین ڤێ پرسێ بكەین.
ئەرێ رۆلێ راگەهاندنكاریا مرۆڤی دڤێت نەمینیت یان ژی دڤێت جهەكێ نویی بدەینێ. راگەهاندنكاریا مرۆڤی نابیت بهێتە لادان، بەلكی دڤێت رۆلەكێ نویی و فێرخوازیێ و شارەزایێ و رۆناكبیریێ ببینت، ئەقلێ مرۆڤی دێ شێت هاریكار بیت و ڤێ ژی بزاڤەكا خورت ژێرا دڤێت، ب بەرهەڤكرن و خۆگونجاندن و چەكداركرنا میدیا كاران ب زانستێ نوو و سەردەم و هەردیسا ب چێكرنا ژۆر و دورستكرنا پەیوەندیێن ب هێز د ناڤبەرا زانا و پسپۆر و مامۆستایێن زانكۆیان ب ڤێ دێ كارین میدیایەكا گونجای پر چەك و بەرپرسیار بەرهەم ئینین و ل گەل وێ ژیریا دەستكرد دەینە رێ و دێ خۆ گونجینین.

مسلح یاسین

د رۆناهییا مێژوویێ دا راگەهاندن ئێك ژ ستوونێن سەرەكی یە ژبۆ پێگەهاندنا گەلێ كوردستانێ، ب تایبەت د وارێ هشیاری و شەفافیەتێ‌ دا و دیموكراسی و پشتەڤانیكرن ل ماڤێ مرۆڤ، رۆژا رۆژنامەگەریا كوردی هەر سال ل 22 نیسانێ ب رەخنە و پێزانین ڤە دهێتە ساخكرن، ئەڤە ژی نیشانا وێ رۆژێیە كو رۆژنامەیا كوردستان ل سەر دەستێ مقداد مەدحەد بەدرخان ل باژیرێ مسرێ ب شێوازەكی فەرمی دەرچووی.
د دلێ جوگرافیەكا‌ ماندی دا، ل دەڤەرەكا‌ مێژووی لسەر پێگەهەكێ هەستا نەتەوەی هاتیە ئاڤاكرن، دەنگە
ژ دایكبوویە كو چ جاران بێ دەنگ نابیت، دەنگەكە یێ بێ چەكە، بەلكو هەلگرێ پەیاما راستی و راستگۆیێ یە ئەو دەنگێ رۆژنامەڤانێن كوردن، ئەو دەنگێ تەڤایا مللەتەكێ یە، بریار یا دایی‌ ئێدی بێ دەنگ نەبیت، هەر ئەو دەنگ بوو بوویە دەنگێ شۆرەش و سەرهەلدانان بۆ گەلەكێ زولم لێ كری.
رۆژنامەگەریا كوردی تنێ پیشە نینە، بەلكو خەباتەكە بەردەوامە و دەلیڤەكە‌ زێرینە و پەیام و بەرخودانە و رەنگ ڤەدانا ئێش و ئازارێن ب كۆمە‌، كو روژنامەڤانێن كورد رۆلەكی كاریگەر ببینن ژبۆ گەهاندنا دەنگێ مللەتێ خۆ ژبۆ جڤاكا نێڤ دەولەتی و ب بیتە دەنگێ ئازادی دەنگێ خوش بەختی،دەنگێ پێشە رۆژا مللەتێ كوردستانێ یە.
سەرەرایی وان گڤاشتێن لسەر حكومەتا هەرێما كوردستانێ هەین، ژ لایێ سیاسی و ئابۆری ڤە، راگەهاندنا كوردی همبەر ڤێ یەكی بێ دەنگ نەبویە، و هەر دەم بزاڤكرینە ب بیتە دەنگێ راستەقینەیێ مللەتێ كوردستانێ.
راگەهاندنا كوردی نە ب تنێ ژ بۆبەلاڤكرنا دەنگوباسایە، بەلكو هونەرێ خەباتەكێ یە، جهێ خۆ د مێژوویا گەلەكێ خۆراگر دا گرتیە، مینا وان پێشمەرگێن ب درێژاهیا مێژووێ ب چەك و خوینا خۆ همبەری دوژمن راوەستیایێن و بەرەڤانی ژ ڤێ ئاخا بیرۆز كرین، ل سەر ڤی بنەمایی، دڤێت هەر تاكەكی گەلێ كوردستانێ، ببیتە پشتەڤانەكی راستەقینە ژ بۆ رۆژنامەڤانێن كورد، دەنگێ مللەتێ كورد نابیت بێدەنگ ببیت، دڤێت بەردەوام بیت لسەر خەباتا خۆیا رۆژنامەڤانی و ببیتە دەنگێ راستەقینەیێ گەلێ خۆ.

مسلح یاسین

هەیڤا ئادارێ‌ بتنێ‌ رۆپەلەك د سالانامەیا دەمی دا، بەلكو وەرزەكە كو تێدا جانێ‌ نەتەوا كورد گەشێ‌ دكەت و خۆ نوو دكەتە ڤە. هەیڤەكا یا تژی یە ژ خۆشی و نەخۆشیان و گرنژین و سەركەفتن و شكەستنان.
هەیڤا خۆڤەژاندنێ‌ یە، كو رۆمەت و كەرامەت ل سەر كۆپێن بلند یێن چیایان دنڤیسیت و رۆژ ژی ب تیژكا زێرینا خۆ، پەیڤا ئازادیێ‌ ل سەر پێشەنگ و شۆرەشگێران دنڤێسیت.
د هەیڤا ئادارێ‌ دا، ئەڤ خەونە زێدەباری دێ‌ ئەردێ‌ ل ژێر پێن زۆردار و ستەمكاران كەتە بۆركانێ‌ ئاگری و پێشمەرگە و شۆرەشگێر سەرهلدانا دورست دكەن.
هەر وەكی چاوا كاوەیێ‌ ئاسنگەر دژی ستەمێ‌ سەرهلدا و ئاگرێ‌ رزگاریبوونێ‌ بەرپاكر، هەتا ئەڤرۆ ژی بەردەوامە و رێیا رۆناهیێ‌ بۆ ئازادیخوازان ڤەكر. د هەیڤا ئادارێ‌ دا نەڤرۆز د ئەسمانێ‌ نشتیمانی دا دفڕیت و رادگەهینیت كو كورد دێ‌ ڤەژین و ساخ بنە ڤە، دۆل و نهال و گر و دەشت و بانی و سەرێ‌ چیایا دێ‌ بنە جهێ‌ شاهیانا و خۆشیا و تلویلیان، بەلێ‌ هەیڤا ئادارێ‌ بتنێ‌ هەیڤا شادی و تلویلیا نینە، بەلكو هەیڤا رۆندك باراندن و كارەساتانە ژی، تێدا حەلەبجەیا ل ژێر كادی و دویكێلا هەورێن ژەهراویدا خەندقاند. دیسا ئەو هەیڤە كو كورد رابوونەڤە و دەنگێ‌ خۆ ژ دەڤێ‌ زولم و ستەمێ‌ دەرئێخست.
ئادارا سالا 1991 دیدەڤانێ‌ ب هێزێ‌ ئیرادەیا سەركەفتنێ‌ بوو. د دەمەكی دا گەلێ‌ كوردستانێ‌ درووشمێن بمریت ستەم و زۆرداریێ‌ بسەركەڤیت، دادپەروەرییێ‌ دگۆتن و دگۆتنەڤە. گەلێ‌ كوردستانێ‌ راگەهاندن كو ئەم دزانین ئازادیێ‌ باجا خۆ یا هەی و وێ‌ رۆمەتێ‌ دەنگەك هەیە، كو هیچ هێزەك نەشێت وی دەنگی بێدەنگ بكەت، ئێش و ژان راستیەكا مللەتێ‌ كوردستانێ‌ یە، كو نەخۆشی و ئیرادێ‌ دورست دكەت، بەرامبەر بایێ‌ ب هێز شكاندن تێدا نینە. ئەو هەیڤا كو كورد دبێژیتە هەمی دونیایێ‌ رەنگە ئەم شەهید و قوربانیێ‌ پێشكێش بكەین و ئەم ژی بریندار ببین، بەلێ‌ ناكەڤین و ناشكێن، ژبیرا مە ناچیت و ژ دیتنا خەون و هیڤیان راناوەستین. هەروەكو چاوا بهار زێدەباری سەختی و دژواریا زڤستانێ‌ ڤەدگەریتە ڤە، كوردستان ژی رۆژەك ژ رۆژان ب ئازادیێ‌ و سەربەرزیێ‌ دێ‌ ڤەگەریتە ڤە.
هەیڤا ئادارێ‌ ب هەیڤا كوردان دهێتە نیاسین ب خۆشی و نەخۆشیێن خۆڤە و نەخۆشیێن وێ‌ ئێش و ئازارێن د ڤێ‌ هەیڤێ‌ دا دزۆرن، ئەم گەلەك یێن ئێشاندین و ئازار داین لێ‌ ئەو ئێك ژی یا دیار و ئاشكرایە، كو ئازار و قوربانیدانێ‌ وانەیەكا ب هێز دایە مە، كو وان ئازاران مفای ژێ‌ ببینن و ئیرادەیا گەلێ‌ مە بهێزتر لێ‌ بهێت و خۆراگربین و ئاڤاهیەكێ‌ موكم و پڕ ئاشتی و ئازادی بۆ بەرەبان دروست و ئاڤا بكەین.