پشتی دادگەها فیدرال یا بلند ل رۆژا چارشەمبی رێكەفتی ٢٠٢٤/٢/٢١ لسەر مووچەیێ فەرمانبەرێن هەرێما كوردستانێ روینشتی و تێدا بریار هاتەدان ب ئیلزامكرنا هەردو حوكمەتان یا فیدرال و یا هەرێمێ تەوتینكرنا مووچەیێن فەرمانبەرێن هەرێما كوردستانێ ل بانكێن باوەرپێكری بكەن، ل دەف بەنكا ناڤەندیا ئیراقی و هەروەسا حوكمەتا فیدرال ملكەچی پێدانا مووچەیێ سەرجەم مووچەخۆرێن هەرێما كوردستانێ بكەن ل بەرامبەر حوكمەتا هەرێما كورستانێ سەرجەم داهاتێن نەفتی و نانەفتی رادەستی حوكمەتا فیدرال بكەت ل گۆڕەیی یاسا ئیدارا دارایی یا ژمارە ٦ سالا ٢٠١٩ و بودجا گشتی یا سالا ٢٠٢٣.
ل ڤێرە قۆناغەكا نوی یا دارایی د ناڤبەرا هەردو حوكمەتان دا دەست پێ كر، چونكی بڕیارێن دادگەها فیدرالا بلند پێگیرن؛ پێدڤیە بهێنە جێبەجێكرن، بەلێ ئەڤ بریارە ژی ب بۆرینا دەمی نەشیا كێشەیێن داڕایی د ناڤبەرا هەردو لایەنان دا چارەسەر بكەت، ئەوژی پشتی دوماهیهاتنا سالا داڕایی و نەدانا مووچەیێ مەها ١٢ یێ مووچەخۆرێن هەرێمێ كو وەزارەتا داڕایی یا هەرێمێ؛ حوكمەتا فیدرال ب جێبەجێنەكرنا بریاڕا دادگەها فیدرالی تۆمەتبار دكەت و ب نەدانا پشكا هەرێمێ ژ بودجەیا گشتی كو كێمتر ژ یا دەستنیشانكری هاتیە؛ فرێكریە ل بەرامبەر وەزارەتا دارایی یا فیدرال یا وەزارەتا داڕایی یا هەرێمێ ب رادەستنەكرنا داهاتێن نەفتی و نانەفتی یێن هەرێمێ تۆمەتبار دكەت، ل ڤێرە تۆمەتباركرنا هەڤدو ب جێبەجیێەكرنا ئەرك و پەرپرسیارەتیان چ ژ ژیواری ناهێتە گوهۆرین، بەلكو پێدڤیە حوكمەتا هەرێمێ ژبۆ چارەسەركرنا كێشەیا شایستەیێن داڕایی و مووچەیی ئەڤ سالە پەنایێ ببەنە بەر لایەنێ دەستووری ژبۆ دیاركرنا راستیێ و بدەستڤەئینا ماف و شایستەیێن خۆ، ئەوژی دەستوورێ ئیراقێ مادێ ١٠٥ ئاماژە ب دامەزراندنا دەستەیەكا گشتی دایە ب رێكا یاسایەكێ بۆ گەرەنتیكرنا ماف و شایستەیێن هەرێمێ و ئەندامێن ڤێ دەستەیێ پێكبێن ژ كەسێن شارەزا و نوونەرێن هەردو حوكمەتێن فیدرال و یا هەرێمێ، هەروەسا د مادەیێ ١٠٦ دا ب رۆنی ئاماژە پێدایە ب رێكا یاسایەكێ دەستەیەكا گشتی تایبەتمەند بهێتە دامەزراندن بۆ چاڤدێریكرنا داهاتێن فیدرال و ئەڤ دەستەیە ژ كۆمەكا شارەزایان ژ حوكمەتا فیدرال و هەرێمێ و پارێزگەهان پێك بهیت، ئەركێ وان:
ئێك: پشتراستبوون ژ دابەشكرنەكا دادپەروەرانە یا هەمی هاریكاری و قەرێن ناڤدەولەتی لدویڤ شایستەیێن هەرێمێ.
دو: پشتراستبوون ژ كارئینانەكا باش د سەرچاوەیێن داڕایی یێن فیدرال و دابەشكرنا وان دا.
سێ: گەرەنتیكرنا شەفافیەتێ و دادپەروەریێ ل دەمێ تەرخانكرنا شایستەیێن حوكمەتێن هەرێمان ل دویڤ رێژەیا دەست نیشانكری.
لەورا گرنگە دەسەلاتدارێن هەرێما كوردستانێ ب ئێك دەنگ كار لسەر دامەزراندنا ڤان دەستەیان بكەن ب رێكا پەرلەمانێ ئێراقێ تاكو بشێن د پاشەرۆژێ دا چارەسەریا كێشەیێن تەكنیكی ب رێكا ڤان دەستەیان بكەن، هەروەسا گەرەنتیا ماف و شایستەیێن هەرێما كوردستانێ ب تایبەتی بابەتێن دارایی و گریدایی مووچەیی بكەن.