ئه‌ڤرۆ، هه‌رهین محه‌مه‌د:
نوشداره‌كا ده‌روونی دیار كر كو 85% ئه‌و په‌یوه‌ندیێن كچ و كوڕ ب رێیا سوشیال میدیایێ دروست دكه‌ن د سه‌ركه‌فتی نینن و گۆت: جڤاكێ مه ژی وێ چه‌ندێ قه‌بوول ناكه‌ن كورێ وان یان كچا وان هه‌ڤژینیێ ل گه‌ل كه‌سه‌كی پێك بینت كو ب رێیا تورێن جڤاكی نیاسی بیت.
ئاواز حه‌جی جه‌عفه‌ر، نوشدارا ده‌روونی د دیداره‌كێ دا بو ئه‌ڤرۆ دیار كر كو ده‌مێ كوڕ یان كچ بریارێ دده‌ت كو په‌یوه‌ندیه‌كێ دروست بكه‌ت دڤێت بزانیت مه‌ره‌م چیه ژ وێ په‌یوه‌ندیێ و گۆت: (هه‌كه ئه‌ڤینداری و ده‌م بوراندن بیت یان ژی بو پێكئینان هه‌ڤژینیێ بیت ئه‌ڤه تشته‌كێ نه ره‌وایه، ژبه‌ركو دبیت ده‌رئه‌نجامێن خراب لدووڤ بهێن، بتایبه‌ت هه‌كه ته نیه‌تا هه‌ڤژینیێ نه‌بیت و تو بێ هزركرن و بێ نیه‌ت بكه‌ڤیه د ڤێ په‌یوه‌ندیێ دا و مه‌سه‌له ببیته پرۆسا هه‌ڤژینیێ و تو په‌شیمان ببی).
د. ئاوازێ زێده‌تر گۆت: (له‌ورا پێدڤیه كچ و كوڕ خوه ئاماده بكه‌ن و بزانن مه‌ره‌م چیه ژ وێ په‌یوه‌ندیا وان گرێدای و لدووڤ وێ نیه‌تێ سه‌ره‌ده‌ریێ بكه‌ن و نابیت بێژی نیه‌تا من هه‌ڤژینیه و ب ره‌نگه‌كێ دی سه‌ره‌ده‌ریێ بكه‌ی، ئانكو نیه‌تا مرۆڤی چیه دڤێت مرۆڤ ل دووڤ وێ نیه‌تێ بچیت).
د. ئاوازێ ئه‌و چه‌نده ژی گۆت: (هه‌ر كه‌سه‌كی پێدڤیێن خوه یێن تایبه‌ت هه‌نه و دڤێت وان پێدڤیا تێر بكه‌ت، به‌لێ دڤێت هشیار بوون هه‌بیت و نابیت ب رێێن خه‌له‌ت و بێی پێزانین وان حه‌زا تێر بكه‌ن).
نوشدارا ده‌روونی د به‌رده‌وامیا ئاخفتنێن خوه‌دا گۆت: (گه‌له‌ك كه‌س هه‌بووینه ب رێیا سوشیال میدیایێ په‌یوه‌ندیێن حه‌زژێكرنێ دروست كرینه و سه‌ركه‌فتن نه ئینایه و هنده‌كا ژی سه‌ركه‌فتن یا ئینای، به‌لێ ئه‌ڤه ب رێژه‌كا گه‌له‌ك كێمه، چونكی تورێن جڤاكی ژ بو په‌یوه‌ندیێن دلداری و هه‌ست و سوزا و هه‌ڤژینیێ نه د گونجاینه و 85% د سه‌ركه‌فتی نینن، چونكو حه‌تا نوكه جڤاكێ مه نه گه‌هشتیه هندێ كو دایك و باب رازی بن كورێ وان یان كچا وان ب رێیا سوشیال میدیایێ كه‌سه‌كی بنیاسیت و هه‌ڤژینیێ ل گه‌ل پێك بینیت).
د ئاخفتنا خوه یا دووماهیێ دا د. ئاوازێ گۆت: (ب دیتنا من هه‌كه كور و كچ ب رێیا سوشیال میدیایێ ئێكدو بنیاسن و نیازا وان هه‌ڤژینی بیت باشتره په‌یوه‌ندیا خوه درێژ نه‌كه‌ن و بێژنه مالێن خوه پرسیارا ئێكدو بكه‌ن و هه‌ڤژینیێ پێك بینن).
نيشاندان