ئه‌ڤرۆ، شاكر ئه‌تروشی:

ب چاڤدێریا به‌رێز(گۆهدارشێخۆ) سه‌رپه‌رشتێ‌ ئیداره‌یا سه‌ربه‌خۆیا زاخۆ، ل به‌ره‌ ئه‌ڤرۆ ل ده‌مژمێر چاری ئێڤاری، درێ‌ و رسمه‌كێ‌ ژ هه‌ژی دا په‌رده‌ ل سه‌ر په‌یكه‌رێ‌ عۆدا هونه‌رمه‌ندێ‌ ناڤدار ماموستا (سه‌باح زاخۆیی) بهێته‌ راكرن، كو ل پاركه‌كا نێزیك پرا ده‌لال هاتیه‌ دانان، ئه‌ڤ پرۆژه‌ یێ‌ سه‌ندیكا هونه‌رمه‌ندێن كوردستانێ‌/نڤیسینگه‌ها زاخۆیه‌، ئیداره‌یا سه‌ربه‌خۆیا زاخۆ سپۆنسه‌ریا پرۆژه‌ی كریه‌ و هونه‌رمه‌ندێ‌ په‌یكه‌رساز دلێر كامیران ب كارێ‌ چێكرنا په‌یكه‌ری رابوویه‌، و بزاڤ یێ‌ دهێنه‌ كرن كو ل ده‌مێ‌ بهێت ئه‌و پارك ژی ب ناڤێ‌ وی هونه‌رمه‌ندی بهێته‌ ناڤكرن.

هونه‌رمه‌ند دلێر كامیران، كو نوكه‌ به‌رپرسێ‌ سه‌ندیكا هونه‌رمه‌ندێن كوردستانێ‌/نڤیسینگه‌ها زاخۆیه‌، هه‌روه‌سا وی ئه‌ڤ په‌یكه‌ره‌ چێكریه‌، د دیداره‌كێ‌ دا بۆ رۆژناما ئه‌ڤرۆ دیاركر كو ئه‌و عۆد ماموستا سه‌باح زاخۆیی ب خوه‌ بۆ وی ئیانبوو و په‌یكه‌ر ل به‌ر وێ‌ چێكریه‌، بلنداهیا په‌یكه‌ری سێ‌ مه‌تر و بیست سه‌نتیمه‌ترن، هه‌روه‌سا پانیا وی ژی مه‌تره‌ك و حه‌فتێ‌ و پێنج سه‌نتیمه‌ترن، په‌یكه‌ر ب ئاسنی هاتیه‌ چێكرن، و ئه‌ز وه‌ك كه‌س هه‌روه‌سا وه‌ك سه‌ندیكا ژی خوه‌ شانازیێ‌ ب خوه‌ دبه‌ین كو ئه‌م شیابین خزمه‌ته‌كا بچووك ژی بۆ ڤی هونه‌رمه‌ندێ‌ مه‌زن مه‌ كربیت، چنكو ئه‌م هه‌موو دزانین ماموستا سه‌باح زاخۆیی هونه‌رمه‌نده‌كێ‌ مه‌زنه‌ ل سه‌ر ئاستێ‌ هه‌موو كوردستانێ‌ و پتری پێنجی سالانه‌ بێ‌ ڤه‌قه‌تیان یێ‌ خزمه‌تا ستران و مۆزیكا كوردی دكه‌ت، له‌ورا ئه‌م هه‌موو قه‌ردارێن وێ‌ خزمه‌تێ‌ ینه‌ و هه‌ر تشته‌كێ‌ بۆ بهێته‌ كرن هه‌ر یێ‌ كێمه‌ و ناهێته‌ به‌رامبه‌ر وێ‌ خزمه‌تێ‌ ئه‌وا وی بۆ هونه‌رێ‌ كوردی پێشكێشكری.

ئه‌ڤرۆ، هه‌رهین محه‌مه‌د:

شێوه‌كارا گه‌نج (لانا عه‌بدولره‌حمان) د د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆدیاركر كو نوكه‌ ئه‌و مژوولی ڤه‌كرنا پێشانگه‌هه‌كا شێوه‌كاریه‌ كو دبیته‌ پێشانگه‌ها وێ‌ یا سیێ‌ یا تایبه‌ت و سیه كه‌ڤال دی هێنه‌ نیشادان و هه‌ركه‌ڤاله‌كی ده‌ربڕینا خوه‌ یا تایبه‌ت یا هه‌ و هه‌ر كه‌ڤاله‌ك ژی ل سه‌ر شێوازه‌كێ‌ هونه‌ری هاتیه‌ چێكرن و ژڤانه‌ ل حه‌فتیا بهێت پێشانگه‌ها خوه‌ ڤه‌كه‌ت.

لانایێ‌ زێده‌تر گۆت: دڤێ‌ پێشانگه‌ها خوه‌ دا پتر ره‌نگێن زه‌یتی ب كار ئیناینه‌ و هنده‌ك كه‌ڤال ژی من ب شێوه‌كێ‌ جودا چێكرینه‌ وه‌كو زڤراتیه‌ك تێدایه‌ ئه‌و ژی ب شێوه‌كێ‌ هونه‌ری و زه‌یتی كو جودابیت ژ كارێن دی، و ڤه‌كرنا پێشانگه‌هێن شێوه‌كاری سالانه‌ گه‌له‌ك یا ب زه‌حمه‌ته‌  و دڤێت شێوه‌كار گه‌له‌ك خوه‌ ئاماده‌كه‌ت هه‌تا كو ب شێت پێشانگه‌هه‌كێ‌ ڤه‌كه‌ت، چونكو ڤه‌كرنا پێشنگه‌هه‌كێ‌ ده‌ربڕینێ‌ ژ مرۆڤی دكه‌ت و سلوك و كاریگه‌ریا مرۆڤی دكه‌ت و ده‌مێ‌ مرۆڤ به‌رده‌وام پێشنگه‌هان ڤه‌كه‌ت دڤێت مرۆڤ دواری هونه‌ری دا بیت نه‌ كو بتنێ‌ وێنه‌ كاربكه‌ی ، ئانكو ب شێوه‌كێ‌ هونه‌ری كاربكه‌ی هه‌تا كو مرۆڤ بشێت پێشانگه‌هه‌كا تایبه‌ت ڤه‌كه‌ت و دپێشانگه‌هێن خوه‌ دا من دڤێت ل سه‌ر هه‌موو شێوازێن هونه‌ری كاربكه‌م و كه‌ڤالان دروستكه‌م دا بۆ خه‌لكی دیاركه‌م دشێم ل سه‌ر هه‌موو شێوازان كاربكه‌م و ل پاشه‌رۆژێ‌ دێ‌ من شێوازێ‌ خوه‌ یێ‌ تایبه‌ت دێ‌ هه‌بیت.

ئه‌ڤرۆ، ره‌مه‌زان زه‌كه‌ریا:

هونه‌رمه‌ندێ شێوه‌كارحه‌مه‌ هاشم، د ددیداره‌كێ دا بۆ ئه‌ڤرۆ گۆت: ل وه‌لاتێ پۆله‌ندا گه‌له‌ریا مالا كۆلتۆریا كرۆسنۆBwaKrosnoSztukiب هه‌ڤكاریا دامه‌زراندیا كۆلتۆریا والیزكاfundacjanarzeczkultury WALIZKA كو دامه‌زراندییه‌كه‌ كار دكه‌ت ل ناڤ ده‌ڤه‌رێن كو كۆلتۆرێ ب زه‌حمه‌ت بهێته‌ پشت گوهـ هاڤێتن هه‌روه‌سا هاریكاریا پێرفۆرمێری پۆله‌ندی ب ناڤ بانگ یوانا سارنێچكا سه‌رۆكێ دامه‌زراندیێ شانۆڤانێ كورد نیهاج جامی پێشانگه‌هه‌كا تایبه‌ت بۆمن هاته‌ ڤه‌كرن ل ولاتێ پۆله‌ندا.

گۆتژی: پێشانگه‌هـ ب درێژاهیا هه‌یڤا ئادارێ دێ یا به‌رده‌وم بیت و نێزیكی 15 كه‌ڤالێن مه‌زن هاتینه‌ نیشاندان و ب قه‌بارێن گشتی و 170 و70 ژی هاتینه‌ نیشادان ،كو ئه‌و كه‌ڤال ل ماتریال و ته‌كنیك و ره‌نگێ كاركرنێ دا جودایه‌ و زۆر دهێته‌ دیتن و دگه‌ل كاركرنا به‌رێ یا من كار پێ دكر، چونكی دڤێ پێشانگه‌هێ دا  د چارچوڤێ چالاكییێن مرۆڤی یێن مه‌زندا كو نێزیكی ساله‌كێ یه‌ به‌رهه‌ڤی بۆ دهێنه‌كرن هه‌ڤپشكه‌ دگه‌ل چالاكیا كۆلتۆریا دامه‌زراندیا والێزكا.

ل دووماهیێ‌ گۆت : مه‌به‌ستا سه‌ره‌كیا پێشانگه‌هێ و چالاكیێ بۆ كۆلتۆرێ وان ده‌ڤه‌رایه‌ كو شه‌ر لێ نێزیكن هه‌لبژارتنا ناڤێ پێشانگه‌هێ وێرانكاریێن جه‌نگێ بوو، هه‌روه‌سا كرۆسنۆ كو هه‌ڤسنوره‌ دگه‌ل وه‌لاتی ئۆكۆاینا پشكه‌كا دی ژی ده‌ربڕینێن هونه‌ری بوون، د ده‌ربڕینێ دا به‌رفره‌هیه‌كا باش هه‌یه‌ هه‌رچه‌نده‌ راسته‌وخۆ سروشتی نینه‌ له‌وما كارێ من ئه‌بستراكت ئێكسپرێشینیزم هزر كارا كرینه‌، د ته‌كنیكا ئه‌بستراكتێكی ده‌ربڕینێ دا دهێته‌ دیتن د هنده‌ك تاما هونه‌رێ سریالیزمی نه‌هاتیه‌ دووركرن و ل كارێن هونه‌ری ئه‌ڤه‌ ژی دزڤریته‌ بۆ شیانێن كاركرنا هونه‌ری.

ئه‌ڤرۆ، هه‌رهین محه‌مه‌د:

ئۆسمان سندی، سترانبێژێ‌ كوچكودیوانان، د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ گۆت: سترانا فۆلكلۆری ل كوچكو دیوانان دهێته‌ گۆتن و پێ‌ ب ره‌وش دكه‌ڤیت، ب تایبه‌تی هنده‌ك كه‌سێن دانعه‌مر تێدابن، یان هنده‌ك گه‌نج تێدا بن شه‌یدایێن سترانێ‌ بن و دزانن ستران چاوا دهێته‌ گۆتنێ‌ ل وی ده‌می هه‌ست ب خۆشیێ‌ دكه‌م و دشێم ل گه‌ل هه‌موو سترانبێژان سترانان بێژم و ل گه‌ل گه‌له‌ك سترانبێژان ژی من گۆتیه‌ و من سترانبێژه‌كێ‌ تایبه‌ت ژی هه‌یه‌ سترانان ل گه‌ل دبێژم و نه‌شێم په‌سنا خوه‌ بكه‌م كا من چه‌ند شیان هه‌نه‌، چونكو هێزو شیان ب ده‌ستێ‌ خودێ‌ نه‌ و هه‌تا چار پێنچ ده‌مژمێران بێ‌ راوستیان دشێم سترانان بێژم

سندی گۆت: هه‌تا راده‌كی گوهدارێ‌ سترانا فۆلكلۆری یێ‌ مای، به‌لێ‌ نه‌وه‌كو به‌ری نوكه‌ و دڤی ده‌می دا خه‌لكێ‌ مه‌ حه‌ز ژ وان كلیپان دكه‌ت یا كچه‌ك ل گه‌ل بیت و مخابنیی ڤه‌ هه‌تا نوكه‌ ژی هنده‌ك نزانن ستران چاوا دهێته‌ گۆتن و دبینم نه‌ مه‌رجه‌ كچ دكلیپێ‌ دا بیت و به‌ژنا وێ‌ ستران بهێته‌ گۆتن و سترانبێژێ‌ ب دروستی دڤێت یێ‌ بهێن فره‌ه بیت، چونكو سترانبێژ وه‌كو گولێ‌ یه‌ و بهێن ژێ‌ دهێت.

ئه‌ڤرۆ، ره‌مه‌زان:

سترانبێژ كارمه‌ند ره‌واندزی، د دیداره‌كێ دا بۆ به‌په‌رێ‌ هونه‌ری یێ‌ رۆژناما ئه‌ڤرۆ گۆت: ل گه‌ل هاتنا كۆرۆنایێ‌ ده‌مێ مایمه‌ ل مال من گه‌له‌ك كار كرن ل سه‌ر ده‌نگێ خوه‌ باشترین ده‌لیڤه‌ بوو من مفا ژێ دیتی و ناڤ و ده‌نگی دناڤ وارێ هونه‌ری دا پتر ڤه‌دگه‌رێت بۆ شانسی ئه‌گه‌ر مرۆڤ چه‌ند كارێن باش بكه‌ت و كارێن جوان بكه‌ت ئه‌گه‌ر شانس نه‌بن به‌رهه‌م ناچنه‌ ناڤ خه‌لكی.

كارمه‌ندی گۆت: به‌رهه‌مێ گۆزه‌ر كو من كلیپ كربوو ژ كومه‌كا سترانێن فۆلكۆری پێكهاتبوو، ئێك ژ سترانا ب زمانی توركمانی بوو، ژبه‌ركو ل كوردستانێ فره‌ نه‌ته‌وه‌یی هه‌یه‌، له‌ورا گرنگه‌ هونه‌رمه‌ند ژبلی زمانێ دایكێ‌ ب هنده‌ك زمانێن دی ژی سترانان بێژن ژبه‌ركو كوردستان ب ولاتی پێكڤه‌ ژیانا ئاینی هاتیه‌ نیاسین، و كاره‌كێ گه‌له‌ك باش و پێدڤیه‌ سترانبێژ و هونه‌رمه‌ند گرنگیێ بده‌نه‌ به‌رهه‌مێن فۆلكۆری  كو ب شێوازه‌كێ سه‌رده‌میانه‌ بێژن به‌لێ نابیت سترانا فۆلكۆری ژچارچوڤێ ره‌سه‌ن ده‌ركه‌ڤیت.