دهۆك، له‌زگین جۆقی:
رێڤه‌به‌رێ گه‌شت و گوزارێ ل ئیداره‌یا سه‌ربخوه یا زاخۆ دیار كر، ئه‌ڤ ساله ب گوژمێ 17 ملیار دیناران پرۆژه‌یێن گه‌شت و گوزارێ ل ئیدارا سه‌ربخوه یا زاخۆ دهێنه بجهئینان و ب ته‌مامبوونا وان ره‌وشا گه‌شت و گوزارێ ل ده‌ڤه‌رێ دێ گه‌له‌ك پێشڤه‌چیت.
چیا ئه‌مین، رێڤه‌به‌رێ گه‌شت و گوزاری ل ئیداره‌یا سه‌ربخوه یا زاخۆ بۆ رۆژناما ئه‌ڤرۆ گۆت: “حكومه‌تا هه‌رێما كوردستانێ ئه‌ڤ ساله گرنگیه‌كا مه‌زن دایه كه‌رتێ گه‌شت و گوزارێ، ل زاخۆ ب پشته‌ڤانیا حكومه‌تێ چه‌ندین پرۆژه‌یێن گه‌شتیاری دێ هێنه بجهئینان، وه‌كو پرۆژه‌یێ رۆهنكرنا پرا ده‌لال و چێكرنا پرۆژه‌كێ ستراتیژی یێ گه‌شتیاری د ناڤ زاخۆ دا ب درێژاهیا كیلۆمه‌تره‌كێ و د ناڤ پرۆژه‌ی دا پارك و جهێن بهێنڤه‌دانێ دێ هه‌بن، هه‌روه‌سا پێنج به‌نداڤێن گه‌شتیاری د ناڤ باژێرێ زاخۆ دا ل سه‌ر خابیری دێ هێنه دروستكرن، ئه‌ڤ پرۆژه بۆ به‌لێنده‌ران هاتیه ره‌وانه‌كرن، داكو ده‌ست ب پرۆژه‌ی بهێته كرن”.
رێڤه‌به‌رێ گه‌شت و گوزارێ ل زاخۆ گۆتژی: “بازارێ كه‌ڤن یێ زاخۆ دێ بیته بازاره‌كێ دیرۆكی یێ هه‌ڤچه‌رخ و نوكه كۆمپانی یێ ڤه‌دیتنان ل سه‌ر ئه‌نجام دده‌ن، ئه‌ڤه ژی دێ كه‌ڤیته د خزمه‌تا كه‌رتێ گه‌شت و گوزارێ دا ل زاخۆ، هه‌روه‌سا ئه‌ڤ ساله چه‌ند هاڤینگه‌هێن گه‌شت و گوزاری ژی دێ هێنه نووژه‌نكرن”.
نيشاندان