ئه‌ڤرۆ، نه‌وزاد هلۆری:
دهێته چاڤه‌ڕێ كرن قاره‌مانێ له‌شجوانیێ ل كێشوه‌رێ ئاسیا و ستێرا پارێزگه‌ها دهۆكێ حجی رێكانی پشكداری دو قاره‌مانیێن نێڤده‌وله‌تی یێن ڤه‌كری بیت ئه‌وا دێ ل هه‌ردو وه‌لاتێن ئه‌مریكا و ئسپانیا هێته ئه‌نجامدان.
د داخویانیه‌كێدا كاپتن و یاریزانێ ناڤهاتی بۆ رۆژناما ئه‌ڤرۆ گۆت: بڕیاره ل هه‌یڤا تیرمه‌ه و ته‌باخا بهێت پشكداری دو قاره‌مانیێن گرنگ یێن جیهانی ل هه‌ردو وه‌لاتێن ئه‌مریكا و ئسپانیا بكه‌م ئه‌وا بناڤێ قاره‌مانیا ئارمۆ كلاسیك یا نێڤده‌وله‌تی وه‌كو یاریزانێ یاریا له‌شجوانیێ دێ پشكداربین و ب ئومێدین بشێن سه‌ركه‌فتنێ ده‌ستخوڤه بینم، هه‌روه‌سا لایه‌نێن په‌یوه‌ندیدار به‌رهه‌ڤیا خوه دیاركریه و بزاڤا كه‌ن بۆ گه‌ره‌نتیا پشته‌ڤانیێ پێخه‌مه‌ت ڤێ قاره‌مانیێ.
حجی رێكانی ئه‌وچه‌نده ژی دیاركر دێ بزاڤا كه‌ت سێ تیما بۆ یاریا له‌شجوانیێ ل پارێزگه‌ها دهۆكێ دروست كه‌ت و گۆت: مه تیمه‌كا ئافره‌تان ژی بۆ یاریا له‌شجوانیێ دروستكریه و پێشتر ژی پشكداری قاره‌مانیێن كوردستان و ئیراقێ بووینه و ده‌ستكه‌فت ژی ده‌ستخوڤه ئینایه و ل به‌ره ئه‌وێ تیمێ پشكداری قاره‌مانیه‌كا جیهانی بكه‌ین بۆ هه‌یڤا ئادارا بهێت، ئومێده‌وارین كو ده‌مێن داهاتی بشێن كارێن باشتر بۆ وه‌رزشا كوردستانێ بكه‌ین.
ل دوور هاریكاریێن وی بۆ یانا شێلادزێ یا وه‌رزشی ژی گۆت: هه‌ر ژ ده‌ستپێكا دامه‌زراندنا یانا شێلادزێ مه به‌رهه‌ڤیا خوه بۆ هه‌موو هاریكاریه‌كێ دیاركریه، د نوكه دا بزاڤێ دكه‌ین كو ب رێیا خشته‌كێ گونجایی كار ل سه‌ر شیانێن یارێزانێن یانا شێلادزێ بكه‌ین ب تایبه‌تی ژ روویێ نوژداریا وه‌رزشی و خوارن و ڤه‌خوارن و پێگه‌هاندنا وان ژ روویێ له‌شی ڤه.
نيشاندان