ئه‌ڤرۆ:
وه‌زاره‌تا ده‌رڤه یا ئه‌مریكا راگه‌هاند كو سیاسه‌تا وان ل سووریێ نه‌هاتیه گوهۆرین و ئه‌و ب چو ره‌نگه‌كێ ل گه‌ل رژێما به‌شاری دانوستاندنان ناكه‌ن و شه‌رێ ل دژی تیرۆرێ ل سووریێ دێ به‌رده‌وام بیت و هاریكاریێن وان بۆ هێزێن سووریا دیموكرات دێ به‌رده‌وام بن.
وه‌زاره‌تا ده‌رڤه یا ئه‌مریكا راگه‌هاند كو ره‌وشا سووریێ گه‌له‌ك ئالۆزه و گه‌له‌ك ئاسته‌نگی ژی ل هه‌مبه‌ر چاره‌سه‌ریا سیاسی ل وی وه‌لاتی هه‌نه، ئه‌مریكا بۆ ئارامیێ ل سووریێ یه و هه‌روه‌سا هه‌تا نها مه‌ترسیا داعشێ هه‌یه و شه‌رێ ل دژی داعشێ دێ ل سووریێ به‌رده‌وام بیت، ئه‌مریكا د چارچۆڤێ شه‌رێ ل دژی تیرۆرێ دا هاریكاریا هه‌ڤپه‌یمانێن خوه دكه‌ت و ل سووریێ ژی دێ هاریكاریا ئه‌مریكا بۆ هێزێن سووریا دیموكرات به‌رده‌وام بیت و د به‌رنامێ ئه‌مریكا دا نینه كو ل گه‌ل رژێما به‌شاری دانوستاندنان بكه‌ت.
د به‌رده‌وامیا داخۆیانیێ دا ئه‌و یه‌ك ژی هاتیه دیار كرن كو دڤێت هه‌موو وه‌لاتێن جیهانێ بزانن كا رژێما به‌شاری چ تاوانێن مه‌زن ئه‌نجام داینه، ب هزاران وه‌لاتیێن سڤیل ل سووریێ ژ ئالیێ رژێما به‌شاری ڤه هاتینه كوشتن و ب هزاران وه‌لاتی ژی هه‌تا نها د زیندان دانه و رژێما سووریێ چو ره‌واتیا خوه نینه و ژ به‌ر هندێ ژی ئه‌مریكا نه نها و نه ژی د پاشه‌رۆژێ دا ب چو ره‌نگه‌كێ ل گه‌ل رژێما به‌شاری ده‌ست ب دانوستاندنان ناكه‌ت و ئه‌مریكا رێزێ ل بریارا گه‌لێ سووریێ دگریت.
وه‌زاره‌تا ده‌رڤه یا ئه‌مریكا ئه‌و یه‌ك ژی دیار كریه كو مانا هێزێن وان ل سووریێ د چارچۆڤێ شه‌رێ ل دژی داعشێ دایه، روودانێن ڤێ دووماهیێن یێن ل باكورێ سووریێ ژی نیشا دده‌ن كو مه‌ترسیا داعشێ ل سووریێ هه‌یه و ژ به‌ر هندێ ژی ئه‌مریكا دێ ل سووریێ مینیت، ئه‌مریكا دێ هه‌ڤپه‌یمانێن خوه ل سووریێ پارێزیت و وان ب تنێ ناهێلیت و هه‌روه‌سا شه‌رێ ل دژی داعشێ و گرۆپێن دی یێن تیرۆرستی ژی دێ ب هه‌موو ره‌نگه‌كێ د به‌رده‌وام بیت.
وه‌زاره‌تا ده‌رڤه یا ئه‌مریكا به‌حسێ رۆلێ ئیرانێ ل سووریێ كریه و دیار كریه كو ئیران رۆله‌كا گه‌له‌ك خراب ل سووریێ دگێریت، چه‌كدارێن سه‌ر ب ئیرانێ دخوازن ره‌وشا سووریێ ژی وه‌كو ئیراقێ و لوبنانێ بكه‌ن و سووریێ بكه‌نه مه‌یدانا ئالۆزیان بۆ به‌رژه‌وه‌ندیێن خوه، ژ به‌ر هندێ ژی ئه‌مریكا و هه‌ڤپه‌یمانێن وێ كار دكه‌ن دا رێگریێ ل پیلانێن ئیرانێ بكه‌ن، چونكو دڤێت رێ نه‌ده‌ین ئیران وه‌كو گه‌له‌ك وه‌لاتێن دی سووریێ بكه‌ته مه‌یدانا دروستكرنا ئاژاوه‌گه‌ریێ، ژ به‌ر هندێ ژی هه‌بوونا هێزێن ئه‌مریكا ل سووریێ گه‌له‌ك گرنگه.
ئه‌و یه‌ك د ده‌مه‌كێ دایه كو به‌ری نها فه‌یسه‌ل ئیسماعیل ئه‌ندامێ سه‌ركردایه‌تیا پارتی دیموكراتی كوردستان- سووریێ ژی بۆ رۆژناما ئه‌ڤرۆ دیار كربوو كو پشتی ئیرشێن داعشێ یێن ل سه‌ر زیندانا حه‌سه‌كێ دێ ئه‌مریكا بۆ ده‌مه‌كێ درێژ ل سووریێ مینیت، چونكو ئه‌مریكی هه‌رده‌م دبێژن هه‌تا داعش و گرۆپێن دی یێن تیرۆرستی ل سووریێ بمینن ئه‌و ژی دێ بۆ پاراستنا هه‌ڤپه‌یمانێن خوه ل سووریێ مینن، ئێرشا داعشێ یا ل سه‌ر زیندانا حه‌سه‌كێ ژی نیشا دده‌ت كو هێشتا داعش ل سووریێ بهێزه و دشێت مه‌ترسیێ بۆ ئه‌مریكا و هه‌ڤپه‌یمانێن وێ دروست كه‌ت، ژ به‌ر هندێ ژی پشتی ئێرشا داعشێ یا ل سه‌ر زیندانا حه‌سه‌كێ ئه‌مریكا دێ بۆ ده‌مه‌كێ درێژ ل سووریێ مینیت كو بێگومان ئه‌و یه‌ك بۆ كوردان ژی گه‌له‌ك گرنگه.
نيشاندان