ئه‌ڤرۆ، قه‌یس وه‌یس

تیما یانا زاخۆ دو خالێن گرنگ د ناڤ ئه‌رد و جه‌ماوه‌رێ‌ خوه‌ ژ ده‌ست دان پشتی ل گه‌ل مێڤانا خوه‌ یانا مینا یا به‌سرایی وه‌كهه‌ڤ بووین بێ‌ گۆل، د یارییا واندا ئه‌وا دوهی ژ چارچووڤێ‌ هه‌ڤڕكیێن گه‌ڕا 22ێ‌ یا خولا پلا نایابا ئیراقێ‌ ل یاریگه‌ها زاخۆ یا نێڤده‌وله‌تی هاتیه‌ كرن.

د ماوێ‌ هه‌ردو نیڤان دا یاریزانێن زاخۆ گڤاشتنه‌كا مه‌زن ل سه‌ر گۆلا مێڤانا كر و چه‌ندین هێرشێن مه‌ترسی ژ ده‌ست دان و ئه‌و هه‌موو بزاڤێن وان بێ‌ ئه‌نجام بوون، هه‌مبه‌ری وێ‌ یاریزانێن مینا و گۆلپارێزێ‌ وان لدووڤ پلانا راهێنه‌رێ‌ خوه‌ شیان خاله‌كێ‌ د ناڤ ئه‌ردێ‌ زاخۆ بینن و بێ‌ گۆل وه‌كهه‌ڤبن.

لدور ڤێ‌ یاریێ‌ ئه‌ركان ئه‌میر یاریزانێ‌ هێلا به‌ره‌ڤانیێ‌ یێ‌ تیما یانا زاخۆ بۆ رۆژناما ئه‌ڤرۆ گوت: هه‌ر ژ ده‌ستپێكا یاریێ‌ مه‌ ئێك پلان هه‌بوو كو راهێنه‌رێ‌ مه‌ بوو مه‌ دانایی ئه‌وژی گڤاشتن و تۆماركرنا گۆلان، د ماوێ‌ 95 خوله‌كان دا بێ‌ راوه‌ستیان یاریزانان ژ هه‌موو لایانڤه‌ هێرش ل سه‌ر گۆلا مێنا دكرن، لێ‌ نه‌بوونا چه‌نسی و شیانێن گۆلپارێزێ‌ وان كو زێده‌تری حه‌فت بزاڤێن تۆماركرنا گۆلان مه‌ ژ ده‌ست دان و هه‌مبه‌ری هێرشێن مه‌ راوه‌ستیان، بۆ یاریێن بهێت دڤێت قه‌ره‌بوو بكه‌ین و رژدین بۆ سه‌ركه‌فتنان و به‌رده‌وامیا هه‌ڤڕكیێ‌ بۆ رێزێن پێشیێ‌.

بڤێ‌ ئه‌نجامێ‌ زاخۆ خالێن خوه‌ گه‌هاندنه‌ 34 خالان و جهێ‌ خوه‌ ل رێزا شه‌شێ‌ پاراست، مینا ب 15 خالان رێزا 19ێ‌ و به‌ری دووماهیێ‌ دهێت.

ژلایێ‌ خوه‌ڤه‌ هه‌ردو نوونه‌رێن كوردستانێ‌ دێ‌ یاریێن خوه‌ یێن هه‌مان گه‌ڕ د ناڤ ئه‌رد و جه‌ماوه‌رێ‌ خوه‌ دا كه‌ن، یانا هه‌ولێرا پایته‌خی دێ‌ ل یاریگه‌ها خوه‌ شه‌هید فرانسۆ حه‌ریری مێڤانداریا یانا شورته‌ یا به‌غدایی كه‌ت ئێك ژ بهێزترین یاریێن تیما هه‌رێمێ‌ یه‌، هه‌ولێر ب 25 خالان رێزا ده‌هێ‌ دهێت هه‌مبه‌ری وێ‌ یانا شورته‌ سه‌رێ‌ لیستا خولێ‌ یه‌ ب كۆمكرنا 57 خالان، د یاریا دویێ‌ دا تیما نه‌وروز دێ‌ ل یاریگه‌ها خوه‌ زانكۆ مێڤانداریا نه‌فت ئه‌لوه‌سه‌ت كه‌ت، یانا باژێرێ‌ سلێمانیێ‌ ب 20 خالان رێزا 16ێ‌ دهێت و نه‌فت ئه‌لوه‌سه‌ت رێزا چارێ‌ دهێت ب كۆمكرنا 39 خالان.

ئه‌ڤرۆ، زنار زوبێر:

ب پشكداریا 16 هه‌لبژارتیێن پارێزگه‌هێن هه‌موو ئیراقێ‌ ل ئه‌ینیا بوری مه‌زنترین قاره‌مانی سه‌ر ئاستێ‌ تازه‌پێگه‌هشتیان ل پارێزگه‌ها دهۆكێ‌ هاته‌ رێكخستن ئه‌وا دێ‌ بۆ ماوێ‌ پێنچ رۆژان ل هۆلێن یانا دهۆك و سه‌نحاریب ب سه‌رپه‌رشتیا ئێكه‌تیا باسكێت بۆلا ئیراقێ‌ و هه‌ڤكاری ژلایێ‌ ئێكه‌تیا پارێزگه‌ها دهۆكێ‌ هێته‌ كرن.

د داخویانیه‌كێ‌ دا سه‌ردار سالح سه‌رۆكێ‌ ئێكه‌تیا باسكێت بۆلا پارێزگه‌ها دهۆكێ‌ بۆ رۆژناما ئه‌ڤرۆ گۆت: مێڤانداریكرنا ڤێ‌ قاره‌مانیێ‌ ب هه‌ڤكاری ل گه‌ل ئێكه‌تیا باسكێت بۆلا ناڤه‌ندیا ئیراقێ‌ پێنگاڤه‌كا گرنگ بوویه‌ و ئارمانجا وێ‌ ژی بهێزكرنا تیمێن لاوان و پێشكه‌فتیانه‌ ژبه‌ركو یاریزان پێدڤی ب یاریانه‌ و هه‌لبژارتیێ‌ پارێزگه‌ها دهۆكێ‌ دێ‌ هه‌ڤركه‌كا بهێزبیت بۆ ده‌ستڤه‌ئینانا ڤێ‌ قاره‌مانیێ‌ یه‌ و نوكه‌ راهێنه‌رێ‌ هه‌لبژارتیێ‌ ئیراقێ‌ یێ‌ تازه‌پێگه‌هشتیان ئاماده‌یی ڤێ‌ قاره‌مانیێ‌ بوویه‌ پێخه‌مه‌ت هه‌لبژارتنا هژماره‌كا یاریزانان بۆ پێكهاتیێ‌ ئیراقێ‌.

ناڤهاتی زێده‌تر گۆت: ل هه‌یڤا نیسانا بهێت دێ‌ قاره‌مانیه‌كا 3×3 ل سه‌ر ئاستێ‌ پارێزگه‌هێ‌ ڤه‌كه‌ین دیسان ل ماوێ‌ بهێت دێ‌ خوله‌كا راهێنه‌ریێ‌ یا ڤاڤارتی بۆ راهێنه‌رێن پارێزگه‌هێ‌ هێته‌ رێكخستن كو دێ‌ راهێنه‌رێ‌ نێڤده‌له‌تی بۆ ڤێ‌ خولێ‌ به‌رهه‌ڤكه‌ین ب هه‌ڤكاریا ئێكه‌تیا باسكێت بۆلا ئیراقێ‌ پاشان دێ‌ خوله‌كا دی یا دادڤانیا پله‌ دو بۆ كو دێ‌ بیته‌ تمامكه‌را یا ئێكێ‌ هێته‌ ڤه‌كرن.

بۆ زانین هه‌لبژارتیێن پارێزگه‌هان پێكهاتینه‌ ژ، دهۆك، هه‌ولێر، سلێمانی، كه‌ركووك، دیالا، كه‌ربه‌لا، زیقار، قادسیه‌، میسان، واست، موسه‌نا، به‌غدا، بابل، مووسل، به‌سرا، نه‌جه‌ف، هاتینه‌ به‌لاڤكرن ل سه‌ر دو كۆمان هه‌ر كۆمه‌كێ‌ چار هه‌لبژارتی ده‌ربازنه‌ چار گۆشا زێرین.

ئه‌ڤرۆ،

كوڤان حه‌سه‌ن كوڕێ‌ پارێزگه‌ها دهۆكێ‌ و یاریزانێ‌ هه‌لبژارتیێ‌ ئیراقێ‌ بۆ یاریێن گوره‌پانێ‌ ل سه‌ر ئاستێ‌ خودان پێدڤیێن تایبه‌ت نوكه‌ ل وه‌لاتێ‌ به‌حرێنێ‌ یه‌ ژبۆ پشكداریێ‌ د قاره‌مانیا خولا یاریێن رۆژئاڤا ئاسیا ئه‌وا ژلایێ‌ هه‌ردو ئێكه‌تیێن ئاسیا و به‌حرێنی دهێنه‌ بڕێڤه‌برن و دبیته‌ ڤاڤارتنێن بۆ قاره‌مانیا ئاسیا.

لدور ڤێ‌ یه‌كێ‌ و دووماهی به‌رهه‌ڤیێن یاریزانێ‌ پارێزگه‌هێ‌ د داخویانیه‌كا تایبه‌ت دا بۆ رۆژناما ئه‌ڤرۆ گوت: پشتی ب دووماهی پشكداریا من یا نێڤده‌وله‌تی ل ئۆلۆمپیادێن تۆكیۆ 2020 ئه‌وا ل سالا بوری هاتیه‌ كرن ئه‌ڤ قاره‌مانیه‌ دێ‌ بیته‌ ده‌ستپێكا هه‌ڤڕكیێن من بۆ وه‌رزێ‌ نوو كو ئێك ژ بهێزترین قاره‌مانیێن ل سه‌ر ئاستێ‌ ئاسیا یه‌، وه‌كو یاریزانێ‌ ئێكانه‌ كورد دناڤ پێكهاتیێ‌ ئیراقێ‌ بۆ خودان پێدڤیێن تایبه‌ت دێ‌ پشكداری هه‌رسێ‌ یاریێن هاڤێتنا رۆمی، تلپێ‌ و هاڤێتنا قورسی و پشتی كه‌مپه‌كێ‌ راهێنانێ‌ ل گه‌ل هه‌ڤالێن خوه‌ به‌رهه‌ڤیێن باش كرینه‌ ژبۆ ب ده‌ستڤه‌ئینانا ئه‌نجامێن سه‌ركه‌فتی، سه‌رباری ئه‌ركێ‌ مه‌ ب سانه‌هی نابیت هه‌مبه‌ری یاریزانێن رۆژئاڤایێ‌ ئاسیا كو كۆمه‌كا باش و خودان شیان هه‌نه‌، لێ‌ گه‌شبینم دێ‌ پاراستنا ناسناڤێن خوه‌ كه‌م و ب میدالیێن زێرین ڤه‌گه‌ڕیێم.

بۆ زانین یاریزانێ‌ ناڤهاتی كوردێ‌ ئێكانیه‌ د ناڤ پێكهاتیێ‌ هه‌لبژارتیێ‌ ئیراقێ‌ یێ‌ گۆره‌پانێ‌ دا و شیایه‌ زێده‌تر120 میدالیێن ره‌نگین د قاره‌مانیێن جودا یێن نێڤده‌وله‌تی، ئه‌ره‌بی و جیهانی بده‌ستڤه‌ بینت ژوانا ده‌ستكه‌فتا ئۆلۆمپیادا ریۆ دی جانیرۆ یا 2016ێ‌ ل به‌رازیل میدالیا زێری بۆ هاڤێتنا رۆمی كو ژدووراتیا 41م و 82سم تۆماربكه‌ت و میدالیێن زێری و زیڤی د قاره‌مانیێن نێڤده‌وله‌تی، ل لندن، چیك، قه‌ته‌ر و ئیماراتێ‌.

ئه‌ڤرۆ،

ب نوونه‌راتیا دو كچێن پارێزگه‌ها دهۆكێ‌ هه‌لبژارتیێ‌ تێنسا ئه‌ردی یا ئیراقێ‌ بۆ ژیێ‌ بن 14 سالی دا ده‌ست ڤالا ژ ڤاڤارتنێن كێشوه‌رێ‌ ئاسیا بۆ قاره‌مانیا نێڤده‌وله‌تی ئه‌وا نوكه‌ هه‌ڤڕكیێن وێ‌ ل وه‌لاتێ‌ سریلانكا ب پشكداریا نه‌ه هه‌لبژارتیان سه‌ر ئاستێ‌ تازه‌پێگه‌هشتیا و لاوان دهێنه‌ ئه‌نجامدان.

لدور ڤێ‌ یه‌كێ‌ عه‌لا زه‌كی راهێنه‌رێ‌ هه‌لبژارتیێ‌ ئیراقێ‌ بۆ رۆژناما ئه‌ڤرۆ گوت: تیما مه‌ ب چار یاریزانێن كچ و ل گه‌ل من و راهێنه‌ر ئاڤده‌ل حه‌سه‌ن بناڤێ‌ هه‌لبژارتیێ‌ ئیراقێ‌ پشكداری قاره‌مانیا ئاسیا و ڤاڤارتنێن ده‌ربازبوونێ‌ بۆ قاره‌مانیا جیهانی دكه‌ین كو پێكهاتینه‌ ژ هانا ئاڤده‌ل، ڤینۆس گوهدار بۆ ژیێن لبن 14 سالی دا و زه‌لال سه‌عید و لارا ئاڤده‌ل بۆ ژیێن لبن 16 سالی دا و سه‌عید خه‌لیل سه‌رۆك شاند كو هه‌موو ژی خه‌لكێ‌ پارێزگه‌ها دهۆكێ‌ نه‌ ئه‌وا نه‌ه هه‌لبژارتی هه‌ڤڕكیێ‌ بۆ دو پلێتێن ده‌ربازبوونێ‌ به‌ره‌ ب قاره‌مانیا نێڤده‌وله‌تی دكه‌ن و ژلایێ‌ ئێكه‌تیا تێنسا ئه‌ردی یا جیهانی دهێته‌ رێكخستن.

هه‌روه‌سا ناڤهاتی گوت: بۆ ژیێن لبن 14 سالی دا ئه‌نجامێن لاواز هه‌بوون ئه‌وژی تشته‌كێ‌ سرۆشتی یه‌ هه‌مبه‌ری ئه‌و ئاست و به‌رهه‌ڤیێن تیمێن دی یێن پشكدار كو كچێن پارێزگه‌هێ‌ ل گه‌ل هه‌لبژارتیێن ئیران، پاكستان، مه‌نگۆلیا و عومان ئه‌وا یاریێن وان ب شێوێ‌ كت و جود دناڤبه‌را یاریزانان دهاته‌ كرن و چو سه‌ركه‌فتن ب ده‌ستڤه‌ نه‌ئینان، سه‌رباری سنورداركرنا ئاست و شیانێن مه‌ د هه‌مبه‌ری هه‌ڤڕكێن مه‌ لی ئه‌ڤ ڤاڤارتنه‌ بۆ كچێن پارێزگه‌هێ‌ تاقیكرنه‌كا ب مفایه‌ تایبه‌ت شاره‌زاهیێ‌ ژ یاریزانێن هه‌لبژارتیێن دی وه‌ردگرن ئه‌وێن پله‌دارێ‌ ئێكێ‌ ل ئاسیا، هه‌ردیسان ئه‌ڤرۆ دێ‌ قاره‌مانی بۆ ژیێن لبن 16 سالی دا هێته‌ ئه‌نجامدان و هه‌ردو یاریزانێن دی یێن پارێزگه‌هێ‌ دێ‌ یاریێن خوه‌ كه‌ن، ب هیڤییا وێ‌ یه‌كێ‌ ئه‌وژی مفایی ژێ‌ وه‌ربگرن.